Intensief besig met die goeie nuus
DIE apostel Paulus het hom in ’n moeilike situasie bevind waarmee voltydse bedienaars van Jehovah se Getuies nie onbekend is nie—sy geld was skraps. Gevolglik het hy in Korinthe die nederige ambag begin uitoefen om tente te maak, iets wat hy as jongeling geleer het. Dit was harde werk, en soms het sy hande moontlik gebloei van die growwe tentdoeke waarmee hy gewerk het. Die inkomste het hom nouliks van voedsel en klere voorsien, maar hy was tevrede, want elke dag wanneer hy met sy sekulêre werk klaar was, het hy sy tentmaakgereedskap neergelê en dít gedoen waarvoor hy in die eerste plek na Korinthe gekom het—hy het die goeie nuus verkondig!—Filippense 4:11, 12.
Op die Sabbat het Paulus na die sinagoge gegaan. Paulus het weliswaar sy Korinthiese gehore aanvanklik “in swakheid en in vrees en in veel bewing” genader (1 Korinthiërs 2:1, 3). Maar Paulus is so aangevuur deur die belangstelling van sommige in sy boodskap dat hy daarna “elke sabbat in die sinagoge gespreek en Jode sowel as Grieke oortuig” het.—Handelinge 18:1-4.
Paulus kon egter ’n ruk lank weinig meer doen as om net deeltyds predikingswerk te doen. Toe het Silas en Timotheüs van Macedonië af gekom met ’n milde bydrae wat ‘sy tekort oorvloedig aangevul het’ (2 Korinthiërs 11:9, NW; Filippense 4:15). Die nuus dat die broers in Thessalonika ondanks vervolging vasgestaan het, was ook bemoedigend.—1 Thessalonicense 3:6.
Watter uitwerking het dit op Paulus gehad? “Toe . . . begin Paulus hom intensief besig hou met die woord [“al sy tyd aan prediking bestee”, The Jerusalem Bible; Today’s English Version], en hy het aan die Jode getuienis gegee om te bewys dat Jesus die Christus is” (Handelinge 18:5, NW). Met sy finansiële probleme ’n ruk lank opgelos, kon Paulus nie rus totdat hy weer voltyds begin preek het nie. Hy het hierdie werk weer met groot geesdrif aangepak en nie net vir die Jode gepreek nie, maar selfs die tyd geneem om sy eerste geïnspireerde sendbrief te skryf—die brief aan die Thessalonicense!
’n Voorbeeld vir ons vandag
Die verslag van Paulus se intensiewe werk in Korinthe het bewaar gebly ten einde alle Christene aan te moedig om hulle intensief besig te hou met die goeie nuus. Paulus het besef dat die Here Jesus self aan sy dissipels die groot eer toevertrou het om “die lig van die wêreld” te wees. Hulle moes nie hierdie lig wegsteek nie. Jesus het vir hulle gesê: “Laat julle lig só skyn voor die mense, dat hulle julle goeie werke kan sien en julle Vader wat in die hemel is, verheerlik” (Mattheüs 5:14-16). Dit het beteken dat hulle ’n volle aandeel aan die predikingswerk moes hê wat deur Jesus voorspel is (Mattheüs 24:14; 28:19; Handelinge 1:6-8). Die prediking van hierdie goeie nuus van die Koninkryk was een van die vernaamste redes vir die bestaan van die Christengemeente.
Net soos Paulus het vroeë Christene hierdie predikingswerk ernstig opgeneem. Toe die vyande van God derhalwe gemeen het dat hulle die ware lig uitgedoof het deurdat hulle “die vernaamste Bewerker van die lewe” wreed om die lewe gebring het, het sy volgelinge aangehou om as die lig van die wêreld op te tree en met ywer te preek (Handelinge 3:15, NW). Nie eers vervolging het hulle prediking gesmoor nie. Die Bybelverslag sê: “Hulle het nie opgehou om elke dag in die tempel en van huis tot huis te leer nie, en die evangelie te verkondig dat Jesus die Christus is” (Handelinge 5:42). Niks kon hulle keer nie!
In ons dag het Christene hulle insgelyks intensief besig gehou met getuieniswerk. Pligsgetroue studente van God se Woord het teen die einde van die 19de eeu die nodigheid begin besef om Bybelwaarhede aan ander mee te deel. Zion’s Watch Tower Tract Society—’n organisasie wat mettertyd internasionaal geword het—is in 1884 geïnkorporeer. Hierdie Bybelstudente, wat sedert 1931 as Jehovah se Getuies bekend staan, het letterlik die aarde met die kennis van God se Woord gevul. Hulle intensiewe bedrywigheid het ’n groot skare voortgebring wat meer as viermiljoen sterk is! En hulle getal sal ongetwyfeld onder Jehovah se leiding steeds toeneem.—Jesaja 60:22.
Doen jy jou deel?
Jesus het gesê: “Die oes is wel groot, maar die arbeiders min” (Mattheüs 9:37, 38). In 1990 het bykans tienmiljoen mense die herdenking van Christus se dood bygewoon. Wat ’n wonderlike potensiaal is daar tog vir ’n groter oes wêreldwyd! Maar terwyl ons ons in hierdie voortdurende uitbreiding verheug, moet elkeen hom afvra: ‘In watter mate het ek ’n aandeel aan hierdie groot werk? Doen ek dit gereeld—elke week indien moontlik?’
Ouere manne moet as “voorbeelde vir die kudde” die leiding in hierdie werk neem (1 Petrus 5:3). Die meeste ouere manne doen weliswaar sekulêre werk. Die apostel Paulus het dit ook gedoen terwyl hy in Korinthe was. Hy het nogtans tyd vir gereelde predikingswerk ingeruim. Baie ouere manne is vandag oor naweke net so intensief besig met geestelike bedrywighede. Dit kan ’n sterk en aanmoedigende invloed op almal in die gemeente hê. Gedurende sekere maande wanneer ’n spesiale poging aangewend word, is daar ’n hele aantal gemeentes waar die meeste van hulle verkondigers aan die pionierdiens deelneem. Die geheim? Die ouere manne neem die leiding in die predikingswerk sowel as in die organisering van velddiensreëlings.
Bedieningsknegte kan insgelyks ’n heilsame invloed op die gemeente hê as hulle gereeld aan velddiens deelneem. Onthou, die Skrif vereis dat hulle “ernstig” moet wees, manne “wat op ’n voortreflike wyse dien” (1 Timotheüs 3:8, 13, NW). Getrouheid in die velddiens is noodsaaklik vir ’n broer om aan die vereistes vir diensvoorregte as ’n ouere man of bedieningskneg te voldoen.—Titus 1:8, 9.
Sommige vind dit moontlik om, soos Paulus, minder sekulêre werk te begin doen en so pioniers te word. Die aantal gewone, hulp- en spesiale pioniers het nét die afgelope tien jaar van 137 861 tot 536 508 in 1990 vermeerder. Dit is gewis net die seën en goedkeuring van Jehovah wat dit tot stand kon bring. Pioniers moet nietemin sorg dat hulle hulle tyd verstandig bestee, en nie net baie ure preek ter wille van ’n goeie rapport nie. Pioniers, is julle goed voorberei en behaal julle welslae in die bediening? Strewe julle daarna om voortdurend te verbeter sodat julle bediening werklik vrugbaar sal wees?
Beloninge van ’n gebalanseerde bediening
Waardeer jy die lewegewende inligting wat elke maand in Die Wagtoring en sy medetydskrif die Ontwaak! verskyn? Jy waardeer dit ongetwyfeld. Het jou waardering jou beweeg om deel te neem aan die verspreiding van hierdie tydskrifte? Een suster in Botswana het dit gedoen. Sy was vroeër gekant teen die waarheid, maar haar man het vir haar uit die tydskrifte voorgelees. Mettertyd het sy ’n hartsverandering ondergaan en ’n Getuie geword. Hoewel sy nie kan lees nie, behaal sy baie welslae in die verspreiding van tydskrifte deur te sê: “Ek kan nie lees nie, maar my man lees hierdie tydskrifte vir my. Ek geniet hulle, en ek is seker jy sal hulle ook geniet.”
Waarom neem jy nie elke week aan hierdie reddingswerk deel nie? Die Christengemeente sal jou met genoeë help om daarmee te begin sodra jy aan die geestelike vereistes voldoen. Die verspreiding van tydskrifte is egter net een aspek van die diens. Almal wat hulle intensief besig hou met die goeie nuus strewe daarna om ’n gebalanseerde bediening te hê. Die Wagtoringgenootskap publiseer byvoorbeeld miljoene hardebandboeke, en hulle word vir die publiek aangebied as ’n meer permanente bron van goeie geestelike voedsel. Is jy al bedrewe genoeg in jou bediening om boeke te versprei, soos Jy kan vir ewig in die Paradys op aarde lewe?
En wat van mense wat belangstel? Hou jy ’n goeie verslag sodat jy herbesoeke op hulle kan doen? Sulke besoeke kan lei tot die aspek van die diens wat die allergrootste vreugde verskaf—die tuisbybelstudiewerk. Onthou, Jesus het ons in Mattheüs 28:19 beveel om ‘dissipels te maak, en hulle te doop’. Dit beteken om die Bybel saam met hulle te bestudeer. Om ’n studie te begin, vereis inderdaad dikwels volharding. Een Getuie het ’n bejaarde egpaar ontmoet wat gretig toegestem het tot ’n tuisbybelstudie. Maar hulle het drie weke na mekaar die studie uitgestel. Uiteindelik is die studie begin. Daarna het die egpaar ’n ruk lank feitlik al om die ander week die studie afgestel. Die vrou het egter uiteindelik so ver gevorder dat sy gedoop kon word. “Nadat sy gedoop is”, vertel die broer, “het haar oë vol trane van geluk geskiet, wat my en my vrou ook trane van geluk laat stort het.” Ja, dit bring onbeskryflike vreugde mee as ’n mens jou intensief met die goeie nuus besig hou!
Stel jou beskikbaar!
Jesus Christus en die apostel Paulus het vir ons pragtige voorbeelde van toegewydheid gestel wat ons kan navolg. En ons het vandag talle wonderlike voorbeelde onder Jehovah se Getuies. Die tyd is ryp vir almal wat vertroud is met die goeie nuus om ’n volle aandeel daaraan te begin hê om dit aan ander bekend te maak. Die Bybel verseker ons dat al sulke arbeid “nie tevergeefs” is nie.—1 Korinthiërs 15:58.
Die meeste van ons het, soos Paulus, finansiële verpligtinge om na te kom. Weens hierdie verpligtinge kan baie miskien nie pionierdiens doen nie. Maar almal kan met Jehovah se hulp die goeie raad volg wat in Romeine 12:11 gegee word: “Wees nie traag in die ywer nie; wees vurig van gees; dien die Here.” En almal wat Jehovah waarlik liefhet, sal, soos Paulus, die geleentheid aangryp indien omstandighede verander wat dit vir hulle moontlik maak om meer tyd in Jehovah se diens te bestee. Hou jou intensief besig met die goeie nuus! Dit sal nie net nou seëninge bring nie, maar sal in die toekoms tot die ewige lewe met eindelose vreugde en geluk lei!—Mattheüs 19:28, 29.