Put groter vreugde uit die predikingswerk
1 Die vreugde om die goeie nuus te verkondig—ondervind jy dit in jou bediening? As ons nie versigtig is nie, kan die goddelose wêreld om ons ons terughoudend laat word in die predikingswerk, en dit kan ons ons vreugde laat verloor. Om in onontvanklike gebied te werk, kan ook ons gees demp. Watter praktiese stappe kan ons neem om groter vreugde uit die predikingswerk te put?
2 Wees positief: Dit help werklik om ’n positiewe gesindheid te behou. Een manier om dit te doen, is om te peins oor ons groot voorreg om “God se medewerkers” te wees (1 Kor. 3:9). Jesus is ook met ons in die uitvoering van hierdie werk (Matt. 28:20). En hy ondersteun ons met ’n engeleleër (Matt. 13:41, 49). Ons het derhalwe die versekering dat ons pogings deur God gerig word (Op. 14:6, 7). Ongeag hoe party mense dus op ons werk reageer, in die hemel is daar groot blydskap!
3 Berei goed voor: Goeie voorbereiding dra ook by tot ons vreugde. Om voor te berei vir die bediening, hoef nie baie werk te behels nie. Dit neem net ’n paar minute om na ’n gesprekspunt uit die jongste tydskrifte of na die lektuuraanbod vir die maand te kyk. Kies ’n aanbieding uit “Wat ons oor die tydskrifte kan sê” in Ons Koninkryksbediening. Raadpleeg die byvoegsel, “Voorgestelde velddiensaanbiedings”, vir Januarie 2002, of kyk in die Redenering-boek vir ’n doeltreffende inleiding. As ’n beswaar wat huisbewoners gewoonlik opper, vir jou ’n struikelblok is, kan jy ’n antwoord voorberei wat hulle kommentaar sal erken en die aandag sal vestig op ’n onderwerp wat belangstelling wek. Die Redenering-boek is baie nuttig in hierdie verband. As ons hierdie hulpmiddele gebruik, sal dit ons die nodige vertroue gee om met vreugde te getuig.
4 Bid ernstig: Gebed is noodsaaklik vir blywende vreugde. Aangesien ons Jehovah se werk doen, moet ons hom smeek om sy gees, waarvan een vrug vreugde is (Gal. 5:22). Jehovah sal ons die krag gee om aan te hou met die predikingswerk (Fil. 4:13). As ons oor ons bediening bid, kan dit ons help om die regte beskouing te behou wanneer ons negatiewe ondervindinge het (Hand. 13:52; 1 Pet. 4:13, 14). As ons geïntimideer voel, kan gebed ons help om vrymoedig en opgeruimd te volhard.—Hand. 4:31.
5 Skep geleenthede: Ons bediening is natuurlik aangenamer wanneer ons mense kan vind en vir hulle kan getuig. Dit sal dalk groter sukses tot gevolg hê as jy jou rooster aanpas om op ’n ander tyd van huis tot huis te gaan, dalk laatmiddag of vroegaand. Jy kom mense teë elke keer wanneer jy in die straat afloop, inkopies gaan doen, op ’n bus ry of in die park gaan stap. Berei gerus ’n kort gedagte voor waarmee jy ’n gesprek kan aanknoop of neem die inisiatief om diegene te nader wat vriendelik lyk. Of dalk werk jy sekulêr of is jy in ’n openbare skool, waar jy daagliks met ander gesels. Jy sal moontlik die geleentheid kry om ’n getuienis te gee deur bloot ’n skriftuurlike onderwerp te opper wat belangstelling wek. Goeie wenke kan op die eerste bladsy van die byvoegsel tot Ons Koninkryksbediening vir Januarie 2002 gevind word. Enige van hierdie pogings kan ’n mens baie help om groter vreugde uit die predikingswerk te put.
6 Aangesien vreugde ons help om te volhard, is dit lewensbelangrik dat ons dit behou! Sodoende sal ons ’n groot beloning ontvang wanneer hierdie werk wat nooit weer gedoen sal word nie, tot ’n einde kom. Daardie vooruitsig op sigself kan ons groter vreugde uit die predikingswerk laat put.—Matt. 25:21.