Laat ons ons Koninkryksale bou en in stand hou

¹ Hoe bly is ons om te weet dat daar 600 Koninkryksale is wat ware aanbidding in die gemeenskappe van suidelike Afrika verhef. Hierdie geboue is mooi, funksioneel en beskeie. Ons broers vergader vreugdevol in hierdie pragtige plekke van aanbidding waar daar altyd wedersydse aanmoediging is.—Heb. 10:24, 25.

² Die 60 nuwe sale wat verlede jaar toegewy is, word deur 3 539 verkondigers en baie belangstellendes gebruik. Ons wil almal prys wat hierdie uitstekende poging op die een of ander manier heelhartig ondersteun het. Maar meer as 300 gemeentes wat bestaan uit 19 472 verkondigers, het nog nie ’n behoorlike plek van aanbidding nie. Om ons bouprogram dus nog verder te bespoedig, is ’n doelwit van 100 nuwe sale vir hierdie diensjaar gestel. Dit lyk of ons hierdie doelwit sal kan bereik, aangesien 84 bouprojekte op die oomblik aan die gang is en ’n verdere 104 gemeentes reeds grond vir ’n saal het. Omdat die meeste stedelike gemeentes in ons veld wel Koninkryksale het, gee ons nou aandag aan die kleiner dorpe.

³ ’n Goeie getuienis word elke keer gegee wanneer ’n Koninkryksaal in ’n gemeenskap opgerig word. In Botswana is baie belangstelling gewek toe ’n snelbou-saal in die hoofstad gebou is. Getuies uit die Johannesburg-omgewing het vir die naweek gekom en hulle vaardighede en gereedskap aangebied. Die koerant Botswana Guardian het aangekondig: “Laat daar ’n saal wees.” ’n Omroeper het wetlike kwessies oor die bouwerk geopper, wat verdere belangstelling by die publiek gewek het. Maar die owerheid het reeds toestemming gegee, en die mense van Gaborone het die volgende drie dae die bedrywighede met belangstelling dopgehou. Ná die naweek het The Midweek Sun berig dat die saal wat die Getuies “belowe het opgerig en gereed vir gebruik sou wees, inderdaad voltooi is”.

Het julle ’n Koninkryksaal nodig?

⁴ Die plaaslike ouer manne moet die saak met die kringopsiener bespreek. Die kringopsiener kan die tien punte op bladsy 6 van die byvoegsel tot Ons Koninkryksbediening vir Maart 1994 hersien en sy eie waarnemings gee aangaande die behoeftes en vermoëns van die gemeente. Hy sal ook die adres en telefoonnommer van die streekkomitee se voorsitter voorsien. Die 23 Streekboukomitees het duidelike riglyne van die takkantoor, en hulle gesamentlike ondervinding en leiding help gemeentes om slaggate te vermy wanneer hulle eiendom aankoop en ’n bouprojek beplan. Wanneer ’n gemeente besluit om hulle Koninkryksaal te bou, sal dit gepas wees om ’n plaaslike boukomitee aan te stel.

⁵ Om ’n Koninkryksaalterrein te bekom wat wettig geregistreer is, verg dringende en volgehoue aandag, veral as ons die momentum van Koninkryksaalkonstruksie wil volhou. Maak seker dat julle behoorlike dokumentasie kry wanneer grond toegestaan word. Dit moet in die naam van die gemeente wees, byvoorbeeld: Krugersdorp-gemeente van Jehovah se Getuies. Onthou asseblief dat gemeentes met die Streekboukomitee in aanraking moet kom lank voordat enige eiendom aangekoop word. Dit is belangrik omdat die keuse van die terrein die koste van die Koninkryksaal grootliks kan beïnvloed (Spr. 15:22). Die streekkomitee kan die gemeente help om gebalanseerde besluite te neem in verband met die ontwerp van die saal. Moet asseblief nie voortgaan met ’n ontwerp sonder dat julle eers die Streekboukomitee geraadpleeg het nie. Dit sal duur projekte en ernstige ontwerpfoute voorkom. Die takkantoor het ’n brosjure met standaardontwerpe voorsien waaruit die ouer manne kan kies. Die takkantoor moet ook die bou van ’n woonstel goedkeur as daar werklik ’n behoefte hieraan is.

⁶ Wanneer ’n Koninkryksaalbouprojek onderneem word, moet die belangrikheid van plaaslike finansiële ondersteuning openlik met die betrokke gemeente(s) bespreek word. (Sien Memorandum T-36, Information Regarding Ownership of Kingdom Halls, van 1 Januarie 2001.) Die ouer manne moet plaaslik ’n opname doen om te bepaal (1) hoeveel daar aanvanklik bygedra sal word om met die aankoop van die eiendom en die boukoste te help en (2) hoeveel daar maandeliks bygedra sal word om ’n lening by die takkantoor terug te betaal, sowel as om die gemeentelike bedryfskoste te dek. Party gevestigde gemeentes wat reeds hulle eie Koninkryksaal het, het aangebied om ’n groeiende gemeente met hulle Koninkryksaalprojek te help. Dit word gedoen sonder dat hulle gevra word. Hierdie gemeentes gaan ’n klein lening aan by die takkantoor ter ondersteuning van die nuwe projek. Wat ’n pragtige gees bring dit onder God se volk voort.

⁷ Aangesien ’n Koninkryksaalbouprojek baie geld kos, moet die Streekboukomitee en die plaaslike ouer manne seker maak dat daar op ’n verantwoordelike manier met die geld gewerk word. Akkurate rekeningstate moet gehou word, en duidelike maandelikse verslae moet aan die gemeente gegee word. Die presiderende opsiener moet toesien dat die boufonds en alle verwante rekeninge kwartaalliks geouditeer word in dieselfde maande as wat die gewone gemeentelike rekeninge geouditeer word. Die gemeente moet die hele projek goedkeur nadat hulle ten volle ingelig is oor die besonderhede en beraamde koste. (Sien Ons Koninkryksbediening vir Augustus 1984, bladsy 4.) Party gemeentes vra die Streekboukomitee om hulle fondse direk te behartig as dit praktieser is. Aan die einde van die projek moet daar ’n duidelike verslag wees van alle geld wat bestee is. ’n Oudit moet gedoen word, wat in die gemeente se lêers moet bly, en ’n afskrif van die finansiële opsomming moet aan die takkantoor gestuur word.—Fil. 4:5.

⁸ ’n Klein gemeente op die platteland het hulle saal voltooi ondanks sterk teenstand van ’n vooraanstaande geestelike. Ná baie pogings om grond te bekom, is die saak na die magistraatshof geneem, en die gemeente se versoek is toegestaan. Toe was die probleem om die nodige fondse te kry, en die broers het besluit om varke te verkoop. Die geld is in die Koninkryksaalspaarrekening gesit, en hulle kon dus met die bouwerk begin. Toe die geld opraak, het een van die broers ’n os en ’n perd verkoop. Later is tien skape verkoop, en toe weer ’n os, ’n perd en nog vyf skape. ’n Suster het aangebied om al die verf vir die saal te koop, ’n ander die matte en ’n ander weer die gordyne. Uiteindelik is nog ’n os en vyf skape verkoop om stoele te koop. Die kringopsiener vertel dat hierdie broers baie trots is op hulle saal. Dit is voltooi danksy Jehovah se seën op hulle onselfsugtige opofferings.

Meer vrywilligers nodig

⁹ Streekboukomitees rapporteer dat daar baie meer vrywilligers nodig is. Dit is ’n noodsaaklike diens ter ondersteuning van Koninkryksbelange, en kringopsieners skenk spesiale aandag aan hierdie saak (1 Kor. 15:58). As jy graag jou hulp wil aanbied vir Koninkryksaalkonstruksie in jou omgewing en jy ’n bedieningskneg, ’n ouer man of ’n voorbeeldige Christen is wat ’n geskoolde werker is, kan jy julle sekretaris vra vir twee vorms (S-82). Die voltooide vorms moet vir die ouer manne gegee word, wat hulle kommentare sal byskryf en dit na die Streekboukomitee sal stuur. As jou persoonlike omstandighede dit toelaat en jy as ’n vrywillige werker kwalifiseer, sal jy groot seëninge ontvang as jy die vreugde van jou broers en susters sien wanneer hulle Koninkryksaalbouprojek voltooi is.

Behoorlike instandhouding van ons plek van aanbidding

¹⁰ Jy ken ongetwyfeld die woorde van die apostel Paulus: “God is nie ’n God van wanorde nie, maar van vrede”, en “laat alles welvoeglik en volgens reëling geskied” (1 Kor. 14:33, 40). Daarom moet ons sorg dat ons Koninkryksale respek en waardigheid weerspieël. Ouer manne en bedieningsknegte moet ywerig die voorbeeld stel deur respek vir die Koninkryksaal te toon. Oor die algemeen is daar twee of drie ouer manne, of bedieningsknegte, wat aangewys is om sake in verband met die instandhoudingswerk van die Koninkryksaal te koördineer. Waar meer as een gemeente dieselfde saal gebruik, hou ’n bedryfskomitee van ouer manne toesig oor hierdie sake, maar almal moet ’n opregte belangstelling in die saal toon. Hulle besef dat die Koninkryksaal aan Jehovah toegewy is.

¹¹ Ouer manne moenie uitstel wanneer herstelwerk gedoen moet word nie (2 Kron. 24:5, 13; 29:3; 34:8). Elke Koninkryksaal word jaarliks geïnspekteer sodat nodige herstelwerk onmiddellik gedoen kan word. As gemeentes gereeld instandhouding doen en daarvoor betaal, kan hulle baie duur opknapwerk vermy en sal dit dan nie nodig wees om ’n lening aan te gaan nie. Daarom moet die gemeente van tyd tot tyd aangemoedig word om seker te maak dat daar genoeg geld is om na hulle plek van aanbidding om te sien. Rekeninge vir water en elektrisiteit moet stiptelik betaal word. Party gemeentes het hierdie betalings nagelaat en agtergeraak daarmee, wat ’n slegte indruk van Jehovah se volk geskep het. Die liggaam van ouer manne moet ook seker maak dat hulle bydrae tot die Koninkryksaal-bystandsreëling elke jaar gestuur word. Dit is belangrik dat elke gemeente hierdie reëling ondersteun.

¹² Elke Koninkryksaal behoort ’n plek te hê waar voorraad, gereedskap en skoonmaaktoerusting gebêre kan word wat skoon en netjies gehou word. Diegene wat by die lektuur- en tydskriftoonbanke werk, moet seker maak dat leë kartonhouers en plastiekomslae nie in die saal rondlê nie (Heb. 13:7). Vir die miljoene Getuies van Jehovah is daar geen plek wat hulle nader aan die hart lê, as hulle gereelde plek van aanbidding, die Koninkryksaal, nie. Hulle waardeer die feit dat hulle ’n Koninkryksaal het en openbaar ’n ywerige gees deur dit in stand te hou. (Sien die byvoegsel tot Ons Koninkryksbediening vir Mei 2000.)

Die werk wat voorlê

¹³ Ja, ons het almal rede tot vreugde terwyl ons in die behoeftes voorsien wat die oeswerk meebring. Hoe bly is ons tog dat ons aangestelde manne het wat die leiding neem in geestelike sake sowel as in die bou van nodige fasiliteite! Ons moet ’n gees van samewerking hê—deur saam hierdie nodige bedrywigheid ten volle te ondersteun (Ps. 133:1). Paulus het ’n beroep op die Filippense gedoen en gesê: “Maak dan my vreugde volkome deur eendersdenkend te wees en dieselfde liefde te hê.”—Fil. 2:2.

¹⁴ Die takkantoor se Koninkryksaalfonds maak dit moontlik om voortdurend lenings te voorsien vir nuwe sale. Baie gemeentes en individue stuur gereeld bydraes vir hierdie fonds, en julle liefde en vrygewigheid word baie waardeer. Dit is ook prysenswaardig dat baie gemeentes maand na maand hulle Koninkryksaallenings terugbetaal en sodoende hulle dankbaarheid betoon vir hierdie goedhartige hulp wat hulle ontvang het. Op hierdie manier versterk hulle die wentelfonds, wat weer voorsien in die behoeftes van die baie ander gemeentes wat nog ’n plek van aanbidding nodig het.

¹⁵ Of ons nou ons eie saal in stand hou, geld bydra vir nuwe Koninkryksale of as konstruksiewerkers dien, ons neem ’n ferm standpunt in aan die kant van die Koninkryk en werk lojaal vir die belange daarvan. Wat ’n merkwaardige voorreg het ons tog om vreugdevol saam met Jesus Christus aan Jehovah se werk deel te neem!

[Prent op bladsy 5]

Rathanda, Gauteng

[Prente op bladsy 6, 7]

Morija, Lesotho

Otjiwarongo (binnekant: bo), Namibië

Grange Westgate, Kwazulu-Natal

Gaborone-Noord (buitekant: bo), Botswana

Ntabamhlophe (buitekant: onder), Swaziland

Nseleni, Kwazulu-Natal