Nuwe kringbyeenkomsprogram
1 Om vas te staan in die geloof in ’n onbestendige wêreld, moet ons op Jehovah vertrou. Wat beteken dit in praktiese terme? Hoe raak vertroue op Jehovah ons persoonlike en gesinslewe? Hoe help dit ons om die invloed van Satan se wêreld te weerstaan? Die kringbyeenkomsprogram vir die 2003-diensjaar beantwoord hierdie vrae. Die tema daarvan is “Vertrou op Jehovah en doen wat goed is”.—Ps. 37:3.
2 Ons vertrou nie net op Jehovah op spesiale tye of wanneer dit baie moeilik gaan nie. Dit raak elke aspek van ons daaglikse lewe. Dit word beklemtoon in die eerste toespraak “Vertrou te alle tye op Jehovah” (Ps. 62:8). Die vierdelige simposium “Openbaar vertroue in Jehovah” sal toon hoe ons Bybelse inligting kan vind en kan toepas wat ons kan help om ’n suksesvolle huwelik te hê, probleme te hanteer wat in die gesin ontstaan en in ons materiële behoeftes te voorsien.
3 Satan se wêreld probeer ’n verdraaide beskouing van reg en verkeerd op ons afdwing en verwarring veroorsaak oor wat belangrik en onbelangrik is (Jes. 5:20). Die toesprake “Waak teen die nietighede van die lewe” en “Verwerp wat sleg is, doen wat goed is” sal ons versterk in ons voorneme om Jehovah se verhewe standaarde te handhaaf.—Amos 5:14.
4 Wanneer Jehovah ’n einde maak aan die huidige goddelose stelsel van dinge, sal God se knegte ten volle op hom moet vertrou. Die aandag word hierop gevestig in die openbare toespraak “Verlossing uit wêreldbenoudheid is op hande”. Daarna sal ons genooi word om onsself te ondersoek in die deel “Sal jy die Koninkryk van God waardig geag word?” Die program sal afsluit met dié aansporing: “Vertrou op Jehovah se beloftes.”
5 ’n Hoogtepunt van elke byeenkoms is die dooptoespraak. Enigiemand wat graag gedoop wil word, moet die presiderende opsiener so gou as moontlik hiervan vertel sodat die nodige reëlings getref kan word.
6 In hierdie onsekere tye is Jehovah die enigste ware bron van bestendigheid op wie ons kan vertrou (Ps. 118:8, 9). Mag ons almal ons vertroue in hom versterk deur die hele kringbyeenkomsprogram by te woon.