Maak God se naam bekend
1. Watter uitwerking kan dit op mense hê as hulle God se persoonlike naam leer ken?
1 Hoe het jy gereageer toe jy die eerste keer gehoor het wat God se naam is? Baie reageer soos die vrou wat gesê het: “Toe ek God se naam die eerste keer in die Bybel gesien het, was ek in trane. Die feit dat ek die persoonlike naam van God kon ken en gebruik, het my baie diep geraak.” Kennis van God se naam het haar grootliks gehelp om Jehovah as ’n persoon te leer ken en ’n verhouding met hom op te bou.
2. Waarom is dit noodsaaklik dat ons ander van Jehovah leer?
2 Waarom dit bekend maak? God se naam hou verband met sy eienskappe, voornemens en handelinge. Dit hou ook verband met redding. “Elkeen wat die naam van Jehovah aanroep, sal gered word”, het die apostel Paulus geskryf. Maar “hoe sal hulle hom aanroep”, het Paulus geredeneer, tensy hulle eers van Jehovah leer en geloof in hom beoefen? Dit is dus noodsaaklik dat Christene God se naam en alles wat dit verteenwoordig, aan mense bekend maak (Rom. 10:13, 14). Maar daar is selfs ’n belangriker rede waarom God se naam bekend gemaak moet word.
3. Wat is die vernaamste rede vir ons predikingswerk?
3 In die 1920’s het God se volk uit hulle studie van die Skrif die universele geskil onderskei waarby die regverdiging van God se soewereiniteit en die heiliging van sy naam betrokke is. Voordat Jehovah die goddeloses vernietig om die smaad te verwyder wat op sy naam gebring is, moet die waarheid aangaande hom “op die hele aarde bekend gemaak” geword (Jes. 12:4, 5; Eseg. 38:23). Die vernaamste rede vir ons predikingswerk is derhalwe om Jehovah in die openbaar te loof en sy naam voor die hele mensdom te heilig (Heb. 13:15). Liefde vir God en ons naaste sal ons beweeg om ’n volle deelname aan hierdie godgegewe werk te hê.
4. Hoe het dit gekom dat Jehovah se Getuies met God se naam verbind word?
4 “’n Volk vir sy naam”: In 1931 het ons die naam Jehovah se Getuies aangeneem (Jes. 43:10). Sedertdien het God se volk die goddelike naam in so ’n mate bekend gemaak dat die Verkondigers-boek op bladsy 124 sê: “Enigeen wat die naam Jehovah vryelik gebruik, [word] internasionaal gou as een van Jehovah se Getuies geïdentifiseer.” Is dit hoe jy geïdentifiseer word? Dankbaarheid vir Jehovah se goedheid moet ons beweeg om ‘sy naam te loof’ en by elke gepaste geleentheid van hom te praat.—Ps. 20:7; 145:1, 2, 7.
5. Hoe moet die feit dat ons God se naam dra, ons gedrag beïnvloed?
5 As “’n volk vir sy naam” moet ons sy standaarde handhaaf (Hand. 15:14; 2 Tim. 2:19). Wat mense dikwels eerste opmerk omtrent Jehovah se Getuies, is hulle goeie gedrag (1 Pet. 2:12). Ons sal nooit oneer op sy naam wil bring deur goddelike beginsels te ignoreer of deur sy aanbidding ’n minder belangrike plek in ons lewe te gee nie (Lev. 22:31, 32; Mal. 1:6-8, 12-14). Mag ons lewenswyse eerder toon dat ons die voorreg waardeer om God se naam te dra.
6. Watter voorreg kan ons nou en tot in ewigheid geniet?
6 Vandag sien ons die vervulling van Jehovah se woorde: “Van die opgang van die son af, ja, tot sy ondergang sal my naam groot wees onder die nasies” (Mal. 1:11). Laat ons voortgaan om die waarheid aangaande Jehovah bekend te maak en “sy heilige naam [te] loof tot onbepaalde tyd, ja, vir ewig”.—Ps. 145:21.