Beklee julle met nederigheid
1 ’n Herderseun vertrou op Jehovah en verslaan ’n magtige krygsman (1 Sam. 17:45-47). ’n Ryk man verduur teëspoed geduldig (Job 1:20-22; 2:9, 10). God se Seun gee sy Vader alle eer vir wat hy ander leer (Joh. 7:15-18; 8:28). In elkeen van hierdie voorbeelde het nederigheid ’n sleutelrol gespeel. Nederigheid is vandag net so noodsaaklik in die situasies waarmee ons te kampe het.—Kol. 3:12.
2 In die predikingswerk: As Christenbedienaars verkondig ons die goeie nuus nederig aan alle soorte mense en oordeel ons hulle nie vooraf op grond van hulle ras, kultuur of agtergrond nie (1 Kor. 9:22, 23). As party ongeskik is of die Koninkryksboodskap op verwaande wyse verwerp, vergeld ons nie kwaad vir kwaad nie, maar hou ons aan om geduldig na verdienstelikes te soek (Matt. 10:11, 14). Ons probeer ander nie met ons kennis of opvoeding beïndruk nie, maar vestig eerder die aandag op God se Woord omdat ons besef dat dit meer oorredend is as enigiets wat ons dalk sê (1 Kor. 2:1-5; Heb. 4:12). In navolging van Jesus gee ons Jehovah al die eer.—Mark. 10:17, 18.
3 In die gemeente: Christene moet hulle ook ‘omgord met ootmoed teenoor mekaar’ (1 Pet. 5:5). As ons ander hoër ag as onsself, sal ons na maniere soek om ons broers te dien en nie van hulle verwag om ons te dien nie (Joh. 13:12-17; Fil. 2:3, 4). Ons sal nie voel dat take soos die skoonmaak van die Koninkryksaal benede ons waardigheid is nie.
4 Nederigheid help ons om “mekaar in liefde [te] verdra” en bevorder gevolglik vrede en eenheid in die gemeente (Ef. 4:1-3). Dit help ons om onderdanig te wees aan diegene wat aangestel is om die leiding te neem (Heb. 13:17). Dit beweeg ons om enige raad of dissipline te aanvaar wat ons miskien ontvang (Ps. 141:5). En nederigheid spoor ons aan om op Jehovah te vertrou wanneer ons omsien na enige voorregte wat ons dalk in die gemeente ontvang (1 Pet. 4:11). Soos Dawid erken ons dat sukses nie van menslike vermoëns afhang nie, maar van God se seën.—1 Sam. 17:37.
5 Voor ons God: Ons moet ons bowenal ‘verneder onder die magtige hand van God’ (1 Pet. 5:6). Wanneer ons met moeilike omstandighede te doen kry, smag ons moontlik na die verligting wat die Koninkryk sal bring. Maar ons beoefen nederig geduld en wag dat Jehovah sy beloftes op sy vasgestelde tyd vervul (Jak. 5:7-11). Soos in die geval van Job, wat sy onkreukbaarheid gehandhaaf het, is dit vir ons van die allergrootste belang dat “die naam van Jehovah voortdurend geloof word”.—Job 1:21.
6 Die profeet Daniël ‘het hom voor sy God verneder’ en is met Jehovah se guns en talle wonderlike voorregte geseën (Dan. 10:11, 12). Laat ons ons eweneens met nederigheid beklee, in die wete dat “die gevolg van nederigheid en die vrees van Jehovah . . . rykdom en heerlikheid en die lewe” is.—Spr. 22:4.