Gereelde vergaderingbywoning—’n prioriteit
1 Vir Christengesinne is dit ’n prioriteit om gemeentelike vergaderinge gereeld by te woon. Maar die eise van die moderne lewe kan ’n uitdaging bied. Maak huishoudelike pligte, sekulêre werk of skoolwerk inbreuk op die tyd wat jy opsygesit het vir die aanbidding van Jehovah? As ons sake vanuit Jehovah se standpunt beskou, sal dit ons help om ons prioriteite in orde te hou.—1 Sam. 24:6; 26:11.
2 ’n Israeliet het eenkeer hout op die Sabbat opgetel en sodoende Jehovah se standpunt doelbewus geïgnoreer. Hy het moontlik geredeneer dat hy in sy gesin se behoeftes voorsien of dat dit ’n geringe saak is. Maar deur die regspraak wat Jehovah gelewer het, het hy getoon dat dit ’n ernstige saak is om jou met alledaagse bedrywighede besig te hou gedurende tye wat vir aanbidding opsygesit is.—Num. 15:32-36.
3 Bied die uitdaging die hoof: Dit is vir baie ’n stryd om nie toe te laat dat sekulêre werk op hulle vergaderingbywoning inbreuk maak nie. Party het hierdie uitdaging die hoof gebied deur met hulle werkgewer daaroor te praat, met werksmaats skofte te ruil, ’n geskikter werk te soek of hulle lewenswyse te vereenvoudig. Sulke opofferings ter wille van ware aanbidding is ongetwyfeld vir God welbehaaglik.—Heb. 13:16.
4 Skoolwerk kan ook ’n uitdaging bied. “Ek doen van my skoolwerk voor die vergaderinge en die res wanneer ek by die huis kom”, het een jong persoon gesê. Wanneer dit nie moontlik was om alle skoolwerk op ’n vergaderingaand te doen nie, het sommige ouers vir onderwysers verduidelik dat die bywoning van Christelike vergaderinge vir hulle gesin ’n prioriteit is.
5 Samewerking en goeie beplanning is belangrik om huishoudelike take af te handel sodat die gesin betyds vir vergaderinge kan wees (Spr. 20:18). Selfs jonger kinders kan geleer word om teen ’n spesifieke tyd aangetrek en gereed te wees om vergadering toe te gaan. Ouers kan deur hulle voorbeeld die belangrikheid van vergaderinge by hulle kinders inskerp.—Spr. 20:7.
6 Terwyl die druk van die huidige stelsel van dinge toeneem, is dit lewensbelangrik dat ons gemeentelike vergaderinge gereeld bywoon. Laat ons voortgaan om sake vanuit Jehovah se standpunt te beskou en gereelde vergaderingbywoning ’n prioriteit te maak.—Heb. 10:24, 25.