Die Gemeentelike Boekstudie—Waarom ons dit nodig het
1. Hoe het die Gemeentelike Boekstudiereëling destyds begin?
1 In 1895 het studiegroepe van die Bybelstudente, soos Jehovah se Getuies destyds bekend was, die naam Dawn Circles for Bible Study gekry. Dele van die Millennial Dawn is as grondslag vir die studie gebruik. Hierdie vergaderinge is later Berean Circles for Bible Study genoem (Hand. 17:11). Klein groepe het dikwels in privaat huise vergader, op ’n aand wat vir die groep geleë was. Hierdie vergaderinge was die voorlopers van die Gemeentelike Boekstudie.
2. Hoe kan ons tot “wedersydse aanmoediging” by die boekstudie bydra?
2 Aanmoediging en bystand: Aangesien boekstudiegroepe doelbewus klein gehou word, is daar meer geleenthede vir dié wat dit bywoon, om uiting te gee aan hulle geloof. Die gevolg is “wedersydse aanmoediging . . . , deurdat elkeen aangemoedig word deur middel van die ander een se geloof”.—Rom. 1:12.
3, 4. Hoe help die boekstudiereëling ons om ons bediening uit te voer?
3 As ons let op die boekstudieopsiener se onderrigmetodes, kan dit ons help om ‘die woord van die waarheid reg te hanteer’ (2 Tim. 2:15). Let op hoe hy die aandag vestig op die skriftuurlike grondslag van die materiaal. As dit gepas is vir die publikasie wat bestudeer word, beklemtoon hy moontlik die hoofpunte deur middel van ’n hersiening aan die einde waartydens net die Bybel gebruik word. Sy goeie voorbeeld kan ons help om ons onderrigting in die Christelike bediening te verbeter.—1 Kor. 11:1.
4 Benewens die feit dat hy die weeklikse studie hou, neem die boekstudieopsiener ook die leiding in die evangelisasiewerk. In samewerking met die diensopsiener tref hy praktiese velddiensreëlings. Hy probeer almal in die groep help om hulle Christelike verantwoordelikheid na te kom om die goeie nuus te verkondig en dissipels te maak.—Matt. 28:19, 20; 1 Kor. 9:16.
5. Watter persoonlike bystand is beskikbaar deur middel van die boekstudie?
5 Die boekstudieopsiener stel belang in die geestelike welsyn van elkeen in die groep. Hy toon hierdie belangstelling by gemeentelike vergaderinge en wanneer hy saam met ander in die velddiens werk. Hy maak ook gebruik van tye wanneer hy die broers by hulle huise besoek, om ’n geestelike gawe aan hulle mee te deel. Almal moet die boekstudieopsiener met vrymoedigheid kan nader wanneer hulle ook al geestelike bystand nodig het.—Jes. 32:1, 2.
6. (a) Hoe is ons broers in sommige lande versterk deur in kleiner groepe bymekaar te kom? (b) Hoe vind jy persoonlik baat by die boekstudiereëling?
6 Versterk mekaar: In lande waar die bedrywighede van God se volk beperk word, kom die broers dikwels in kleiner groepe bymekaar. Een broer vertel: “Hoewel ons Christelike bedrywighede verbied was, het ons, wanneer moontlik, ons weeklikse vergaderinge in groepe van 10 tot 15 gehou. Ons het geestelike krag uit die vergaderinge geput, uit ons Bybelstudie sowel as ons assosiasie ná die studie. Ons het ons ondervindinge vir mekaar vertel, en dit het ons help besef dat elkeen van ons dieselfde stryd voer” (1 Pet. 5:9). Mag ons mekaar eweneens versterk deur die Gemeentelike Boekstudiereëling ten volle te ondersteun.—Ef. 4:16.