Spesiale kampanje om die nuwe brosjure te versprei
1 Vandag is baie mense bekommerd oor wêreldtoestande, maar min verstaan waarom dit so sleg gaan, wat die toekoms inhou en wat hulle moet doen om die komende oordeel te oorleef (Eseg. 9:4). Om hulle van die betekenis van ons tye bewus te maak, sal die nuwe brosjure Hou aan waak! van Maandag 21 Maart tot Sondag 17 April tydens ’n spesiale kampanje in ons gebied versprei word.
2 Die brosjure kan in die huis-tot-huis-bediening, tydens herbesoeke en informele getuieniswerk of in openbare plekke aangebied word. Maar Hou aan waak! moenie onoordeelkundig versprei word nie. Die brosjures moet net gelaat word by diegene wat belangstel in wat die Bybel oor die betekenis van wêreldgebeure sê. Mense wat nie juis in die boodskap belangstel nie, kan eerder ’n traktaat aangebied word.
3 Jy kan iemand se belangstelling wek deur te sê:
◼ “Baie mense is bekommerd oor die ernstige probleme en skokkende gebeure wat vandag so algemeen is. [Noem ’n voorbeeld waarvan mense in julle gebied bewus is.] Het jy geweet dat hierdie dinge in die Bybel voorspel is? [Wag vir ’n antwoord. Lees dan ’n Bybelteks wat pas by die voorbeeld wat jy genoem het, soos Matteus 24:3, 7, 8; Lukas 21:7, 10, 11 of 2 Timoteus 3:1-5.] Die Bybel verduidelik wat die betekenis van ons tye is en wat die toekoms vir die mensdom inhou. Wil jy graag meer hieroor weet? [Wag vir ’n antwoord. Bied brosjure aan as opregte belangstelling getoon word.] Die brosjure word kosteloos beskikbaar gestel. As jy ’n klein bydrae vir ons wêreldwye werk wil gee, sal ons dit met graagte aanvaar.”
4 Of dalk is hierdie benadering doeltreffend:
◼ “Baie mense is vandag ontsteld oor skokkende gebeure of oor ’n groot persoonlike verlies. Party wonder waarom God nie ingryp om hierdie dinge te verhoed nie. Die Bybel gee ons die versekering dat God binnekort sal optree om die mensdom se lyding te verlig. Kyk watter seëninge God vir die mensdom sal bring. [Lees Psalm 37:10, 11.] Wil jy graag meer hieroor weet?” Sluit af soos hierbo.
5 Probeer die naam en adres kry van elkeen wat ’n brosjure neem, en reël om terug te gaan om die belangstelling te kweek. Wenke oor hoe dit gedoen kan word, sal in Ons Koninkryksbediening vir April 2005 verskyn. As iemand tydens die eerste besoek baie belangstelling toon, kan jy dadelik ’n Bybelstudie begin deur Hou aan waak! of ’n ander publikasie, soos die Vereis-brosjure, te gebruik.
6 Eksemplare van die nuwe brosjure sal beskikbaar wees ná die Diensvergadering waartydens hierdie artikel bespreek word. Ons stel voor dat verkondigers en pioniers aanvanklik net soveel neem as wat hulle vir die eerste paar dae van die kampanje nodig sal hê. Mag Jehovah hierdie spesiale bedrywigheid seën tot sy lof en tot voordeel van opregtes van hart oral in die wêreld.—Ps. 90:17.