Deel 6: Hou progressiewe Bybelstudies
Wanneer ’n student ’n vraag vra
1 Wanneer ’n Bybelstudie goed op dreef is, is dit gewoonlik raadsaam om Bybelleringe stelselmatig te dek eerder as om van onderwerp tot onderwerp te spring. Dit help die student om ’n grondslag van juiste kennis te lê en om geestelike vooruitgang te maak (Kol. 1:9, 10). Maar tydens die studie vra studente dikwels vrae oor verskillende onderwerpe. Hoe moet dit hanteer word?
2 Lê onderskeidingsvermoë aan die dag: Vrae in verband met die studiemateriaal onder bespreking kan gewoonlik onmiddellik beantwoord word. As ’n vraag later in die studiepublikasie beantwoord gaan word, sal dit moontlik voldoende wees om dit vir die student te sê. Maar as die vraag nie verband hou met die studiemateriaal nie of navorsing sal verg om ’n behoorlike antwoord te gee, sal dit dalk goed wees om dit ná die studie of by ’n ander geleentheid te bespreek. Party skryf die vraag neer omdat dit die student die versekering gee dat sy vraag ernstig opgeneem word en help om te voorkom dat hulle van die onderwerp afdwaal.
3 Baie Bybelleringe word slegs kortliks in ons basiese studiepublikasies bespreek. Sê nou ’n student vind dit moeilik om ’n sekere lering te aanvaar of glo vas in ’n valse lering? Dit sal dalk goed wees om bykomende materiaal te bespreek wat die Bybel se beskouing oor die onderwerp deeglik uiteensit. As die student nog steeds nie oortuig is nie, kan jy die onderwerp tot later laat oorstaan en met sy gereelde studie voortgaan (Joh. 16:12). Wanneer hy meer kennis van die Bybel verkry en geestelike vooruitgang gemaak het, sal hy dalk daardie Bybellering verstaan.
4 Wees beskeie: As jy onseker is oor die antwoord op ’n vraag, moet jy die versoeking weerstaan om jou eie opinie te gee (2 Tim. 2:15; 1 Pet. 4:11). Verduidelik dat jy navorsing oor die saak sal doen en dan vir hom ’n antwoord sal gee. Jy kan selfs van die geleentheid gebruik maak om die student te leer om navorsing te doen. Leer hom progressief hoe om die verskillende navorsingshulpe te gebruik wat deur Jehovah se organisasie voorsien word. Sodoende sal hy uiteindelik self antwoorde op sy vrae kan vind.—Hand. 17:11.