Die Koninkrykspredikingswerk—’n kosbare voorreg
1 Elke dag vind miljarde van die aarde se bewoners baat by Jehovah se mildelike voorsienings vir lewe (Matt. 5:45). Maar baie min het die unieke voorreg om hulle waardering vir hulle Skepper te toon deur die goeie nuus van God se Koninkryk te verkondig (Matt. 24:14). Hoe hoog stel jy hierdie kosbare voorreg op prys?
2 Koninkryksverkondiging bring eer aan God en gee hoop en vrede aan mense wat angstig is weens die onstuimige tye waarin ons vandag lewe (Heb. 13:15). Vir diegene wat gunstig op die boodskap reageer, beteken dit die ewige lewe (Joh. 17:3). Watter sekulêre loopbaan of beroep bring sulke voordele mee? Die apostel Paulus het sy waardering vir die bediening getoon deur die manier waarop hy dit uitgevoer het. Hy het dit as ’n skat beskou.—Hand. 20:20, 21, 24; 2 Kor. 4:1, 7.
3 Ons moet ons kosbare voorreg as ’n skat beskou: Een manier waarop ons waardering toon vir die voorreg om te getuig, is deur aandag te skenk aan die gehalte van ons diens. Neem ons tyd om ’n aanbieding voor te berei wat die harte van ons toehoorders sal raak? Kan ons meer bedrewe daarin word om die Skrif te gebruik en met mense te redeneer? Dek ons ons toegewese gebied deeglik? Kan ons ’n Bybelstudie begin en hou? Soos getroue Christene in die verlede en vandag, word ons aangedryf deur die regte beskouing van hierdie bedrywigheid, en ons koester ons voorreg.—Matt. 25:14-23.
4 Wanneer ons die uitdagings van bejaardheid, swak gesondheid of ander moeilike omstandighede die hoof probeer bied, is dit vertroostend om te weet dat ons ywerige pogings in die bediening hoog op prys gestel word. God se Woord verseker ons dat Jehovah sulke pogings in sy diens waardeer, selfs pogings wat dalk vir ander gering lyk.—Luk. 21:1-4.
5 Die Koninkrykspredikingswerk verskaf groot bevrediging. ’n Suster van 92 het gesê: “Wat ’n voorreg is dit tog om terug te kyk op 80 jaar van toegewyde diens aan God—sonder dat ek oor enigiets spyt is! As ek my lewe kon oorhê, sou ek dit dieselfde wou hê, want ‘God se liefderyke goedhartigheid is beter as die lewe self’” (Ps. 63:3). Mag ons die kosbare voorreg wat God ons gegee het om die Koninkrykspredikingswerk te doen, as ’n skat beskou.