Ons waardeer ons voorregte!
1 Van die begin van die mensdom se bestaan af het Jehovah ’n verskeidenheid voorregte aan sy knegte gegee. Hy het hulle voorregte gegee ongeag hulle geslag, ouderdom of stand in die lewe (Luk. 1:41, 42; Hand. 7:46; Fil. 1:29). Watter voorregte gee hy vandag aan ons?
2 Party van ons voorregte: Ons het die voorreg om deur Jehovah geleer te word (Matt. 13:11, 15). ’n Ander voorreg wat ons geniet, is om Jehovah gedurende gemeentelike vergaderinge te loof deur kommentaar te lewer (Ps. 35:18). Ons is gretig om kommentaar te lewer wanneer ons die geleentheid kry. As ons elke toewysing in die gemeente as ’n eer beskou, sal ons dit ook na die beste van ons vermoë uitvoer. Neem ons gereeld deel aan die voorreg om die Koninkryksaal skoon en in ’n goeie toestand te hou?
3 Hoewel miljoene mense wonder of God hulle gebede hoor, geniet ons die voorreg dat ons gebede deur die belangrikste Persoon in die heelal gehoor word (Spr. 15:29). Jehovah luister persoonlik na die gebede van sy knegte (1 Pet. 3:12). Hy stel geen beperking op hoe dikwels ons hom kan nader nie. Wat ’n kosbare gawe het ons tog om “by elke geleentheid” te kan bid!—Ef. 6:18.
4 “God se medewerkers”: Een van ons kosbaarste voorregte is om die goeie nuus van God se Koninkryk as “God se medewerkers” te verkondig (1 Kor. 3:9). Dit is ’n bevredigende werk wat ons verkwik (Joh. 4:34). Jehovah hoef nie mense te gebruik om hierdie werk te doen nie, maar hy het ons hierdie toewysing gegee as ’n blyk van sy liefde (Luk. 19:39, 40). Jehovah het hierdie voorreg nie sommer aan enigiemand gegee nie. Diegene wat aan die openbare bediening deelneem, moet aan sekere geestelike vereistes voldoen en dan daardie standaard handhaaf (Jes. 52:11). Toon ons dat ons hierdie voorreg waardeer deur die bediening ’n belangrike deel van ons weeklikse roetine te maak?
5 Voorregte wat van Jehovah kom, verryk ons lewe (Spr. 10:22). Moet dit nooit as vanselfsprekend aanneem nie! As ons toon dat ons waarlik ons diensvoorregte waardeer, behaag ons ons hemelse Vader, die Gewer van “elke goeie gawe en elke volmaakte geskenk”.—Jak. 1:17.