Toevertrou met ’n skat
1 Die apostel Paulus het sy godgegewe opdrag om te getuig, kosbaar geag en het daarna verwys as ’n “skat” (2 Kor. 4:7). Hy het ontberinge en vervolging verduur terwyl hy daardie opdrag uitgevoer het. Hy het onvermoeid getuig vir enigeen wat naby was. Hy het talle moeilike en gevaarlike reise oor land en see onderneem. Hoe kan ons Paulus navolg en toon dat ons ons bediening kosbaar ag? (Rom. 11:13). Wat maak ons bediening ’n onvergelyklike skat?
2 ’n Skat van oortreffende waarde: Aardse skatte gaan dikwels gepaard met baie hartseer en bring slegs beperkte of tydelike voordele mee. Ons bediening aan die ander kant bring blywende voordele vir ons en vir ander mee (1 Tim. 4:16). Dit help opregtes om Jehovah te leer ken, die nodige veranderinge in hulle lewe aan te bring en ’n werklike hoop op die ewige lewe te verkry (Rom. 10:13-15). As ons groot waarde aan ons bediening heg, kry ons ’n bevredigende doel in die lewe, ’n blywende gevoel van voldoening en ’n bemoedigende hoop vir die toekoms.—1 Kor. 15:58.
3 Toon dat jou skat vir jou kosbaar is: Die waarde wat ons aan iets heg, word dikwels geopenbaar deur wat ons bereid is om daarvoor op te offer. Wat ’n voorreg is dit tog om ons tyd en energie op te offer om Jehovah te loof! (Ef. 5:16, 17). Die manier waarop ons ons tyd bestee, moet toon dat ons meer waarde heg aan geestelike dinge as aan materiële strewes. Aangesien ons iets kosbaars het om aan ander mee te deel, sal ons met entoesiasme wil getuig en daarop ingestel wil wees om die goeie nuus by elke geleentheid te verkondig.
4 Kosbare skatte word gewoonlik nie weggesteek nie, maar word uitgestal sodat ander dit kan geniet. As ons ons bediening as ’n skat beskou, sal dit ’n belangrike deel van ons lewe wees (Matt. 5:14-16). Mag ons, met harte vol waardering, die apostel Paulus altyd navolg en elke geleentheid aangryp om te toon dat ons ons bediening werklik kosbaar ag en dit as ’n skat beskou.