Maak die voortreflikhede van Jehovah alom bekend
1. Wat beweeg ons om die voortreflikhede van Jehovah alom bekend te maak?
1 “Aan u, o Jehovah, behoort die grootheid en die mag en die luisterrykheid en die voortreflikheid en die waardigheid; want alles in die hemel en op die aarde behoort aan u” (1 Kron. 29:11). Watter uitwerking het ons liefde en waardering vir Jehovah op ons? Dit beweeg ons om ‘die voortreflikhede alom bekend te maak van die een wat ons uit die duisternis tot in sy wonderbare lig geroep het’ (1 Pet. 2:9). Ons kan nie ophou om ander van ons groot God te vertel nie! Ons sal gedurende Maart, April en Mei uitstekende geleenthede hê om Jehovah se voortreflikhede bekend te maak.
2. Watter spesiale kampanje word gereël om die Gedenkmaal te adverteer, en wie kan ’n aandeel daaraan hê?
2 Spesiale kampanje om die Gedenkmaal te adverteer: Op Maandag 2 April sal ons die aandag op Jehovah se voortreflikhede vestig deur die Here se Aandmaal te herdenk. ’n Spesiale uitnodiging na hierdie belangrike geleentheid sal van 17 Maart tot 2 April wêreldwyd versprei word. Almal word aangespoor om ’n volle aandeel daaraan te hê. Dit sal ’n uitstekende tyd wees vir nuwelinge om die goeie nuus te begin verkondig as hulle aan die vereistes voldoen. As jy Bybelstudente of kinders het wat moontlik aan die vereistes voldoen, moet jy die inisiatief neem om met die ouer manne te praat.
3. Wat kan ons sê om mense na die Gedenkmaal te nooi?
3 Hierdie kampanje sal soortgelyk wees aan wat in verband met die “Verlossing is op hande!”-streekbyeenkomste gedoen is. Genoeg uitnodigings sal aan gemeentes gestuur word sodat elke verkondiger 30 kan kry, en ekstra eksemplare sal vir die pioniers beskikbaar wees. Hou jou aanbieding kort deur dalk te sê: “Hier is jou uitnodiging na ’n belangrike jaarlikse geleentheid wat binnekort sal plaasvind. Jy sal hartlik verwelkom word. Die besonderhede is op die uitnodiging.” As die huisbewoner vrae het, moet ons natuurlik tyd maak om dit te beantwoord. Die artikel in die aanhangsel wat oor die Here se Aandmaal handel en op bladsy 206 van die Leer Bybel-boek begin, kan nuttig wees hiervoor. Oor naweke sal ons die jongste tydskrifte saam met die spesiale uitnodiging aanbied. Maak ’n aantekening van enige belangstelling wat jy vind, en reël om terug te gaan.
4. Hoe sal die spesiale Gedenkmaaluitnodigings versprei word?
4 Waar moontlik moet hierdie spesiale uitnodiging persoonlik aan elke huisbewoner gegee word. Hou dus rekord van die huise waar niemand tuis was nie, en probeer om op ’n ander tyd terug te gaan. Gemeentes wat baie uitnodigings oor het, kan dit gedurende die laaste week voor die Gedenkmaal by huise laat waar niemand tuis was nie, maar nie voor dit nie. Maak seker dat jou herbesoeke, Bybelstudente, familielede, werksmaats, bure en ander kennisse ook ’n uitnodiging ontvang.
5. Waarom moet ons nou ons planne begin maak om hulppionierdiens te doen?
5 Hulppionierdiens: Kan jy ’n groter aandeel daaraan hê om Jehovah se voortreflikhede bekend te maak deur gedurende Maart, April en Mei hulppionierdiens te doen? Dit sal waarskynlik vereis dat jy veranderinge in jou daaglikse rooster aanbring (Ef. 5:15-17). Jy kan seker wees dat jy vreugde sal smaak en Jehovah se seën sal geniet as jy jou inspan om meer in Jehovah se diens te doen (Spr. 10:22). Aangesien die Gedenkmaalseisoen nader kom, is dit nou die tyd om planne te begin maak.—Spr. 21:5.
6. Wat kan ons leer uit die ondervinding van ’n 90-jarige suster wat verlede jaar as ’n hulppionier gedien het?
6 Verlede jaar het ’n 90-jarige suster die voorreg gehad om as ’n hulppionier te dien. Sy het gesê: “Hoewel ek baie van tuinwerk hou en wou begin plant, het ek besef dat ek my prioriteite moet regkry. Ek wou graag Koninkryksbelange eerste stel en het dus besluit om in Maart hulppionierdiens te doen.” Is sy vir haar moeite geseën? Sy sê: “Ek voel nou meer deel van die gemeente, en dit het my nader aan Jehovah laat kom.” Kan ons ons prioriteite ontleed en soortgelyke veranderinge aanbring as dit nodig is?
7. Is dit moeilik om as ’n hulppionier te dien?
7 Dit is miskien nie so moeilik as wat jy dink om aan die vereiste van 50 uur vir hulppioniers te voldoen nie. Oorweeg jou daaglikse bedrywighede biddend, stel ’n rooster op en skryf dit dan neer op jou teokratiese kalender. Jy ken jou persoonlike omstandighede die beste. As jou gesondheid swak is en jy min uithouvermoë het, kan jy miskien ’n paar uur per dag aan die bediening deelneem. As jy voltyds werk of skoolgaan, kan jy moontlik as ’n hulppionier dien deur in die aande of oor naweke velddiens te doen.
8. Wat het ’n egpaar in staat gestel om as hulppioniers te dien?
8 Baie kon al as ’n gesin hulppionierdiens doen. ’n Egpaar het vorige jare gehuiwer om hulppionierdiens te doen omdat hulle gedink het dat hulle omstandighede dit nie toelaat nie. Wat het hulle daaromtrent gedoen? “Ons het tot Jehovah gebid vir hulp om dít wat ons so lank saam wou doen, te bereik.” Met behoorlike beplanning kon hulle hulle doel bereik. Hulle het bygevoeg: “Dit was wonderlik. Ons het saam baie seëninge ontvang. Ons stel voor dat julle dit probeer. As ons dit gedoen het, sal julle dit dalk ook kan doen.”
9. Wat kan jy tydens julle volgende gesinstudie doen om vir die komende maande van spesiale bedrywigheid voor te berei?
9 Sit gerus tyd opsy tydens julle volgende gesinstudie om te bespreek hoe almal gedurende die komende maande meer in die bediening kan doen. Al kan julle hele gesin nie as hulppioniers dien nie, kan een lid dit dalk met die hulp en samewerking van die ander gesinslede doen. Anders kan julle gesin moontlik doelwitte stel om gedurende hierdie maande van spesiale bedrywigheid meer tyd in die bediening deur te bring.
10. Waarom moet ons met ander gesels oor ons begeerte om tydens hierdie Gedenkmaalseisoen as ’n hulppionier te dien?
10 Help mekaar: Geesdrif is aansteeklik. Praat oor jou begeerte om as ’n hulppionier te dien. Dit kan ander aanspoor om ook daarvoor aansoek te doen. En diegene wat in die verlede pionierdiens gedoen het, sal jou dalk wenke kan gee wat jou sal help om jou sake te reël en jou rooster op te stel sodat jy jou doel kan bereik (Spr. 15:22). As jy in staat is om hulppionierdiens te doen, kan jy gerus ’n ander verkondiger, miskien iemand met soortgelyke omstandighede, nooi om hierdie genotvolle werk saam met jou te doen.
11. Hoe kan die ouer manne geesdrif wek vir hulppionierdiens in die komende maande?
11 Baie ouer manne tref die nodige reëlings om aan hierdie spesiale vorm van diens deel te neem (Heb. 13:7). Dit is beslis aanmoedigend vir die gemeente! Ouer manne wek ook geesdrif deur hulle gesprekke met ander. ’n Paar vriendelike woorde van aanmoediging of praktiese wenke is dalk net wat nodig is om party te beweeg om hulppionierdiens te doen. Die diensopsiener sal waarskynlik bykomende velddiensvergaderinge reël sodat almal groepgetuieniswerk kan doen, selfs ná werk of skool. Hierdie reëlings moet gereeld aangekondig word. Hy sal ook seker maak dat almal genoeg gebied en lektuur het.
12. Wat kan jy moontlik doen as jy nie as ’n hulppionier kan dien nie?
12 Al laat jou omstandighede jou nie toe om as ’n hulppionier te dien nie, kan jy diegene wat dit doen, aanmoedig en vir hulle bid (Spr. 25:11; Kol. 4:12). Miskien kan jy reëlings tref om ’n bykomende dag gedurende die week saam met hulle velddiens te doen of om langer as gewoonlik uit te bly.
13. Watter doelwit is vir lande onder die Suid-Afrikaanse takkantoor gestel, en hoe kan julle gemeente help om dit te bereik?
13 Doelwit van 14 000 hulppioniers in April: Die meeste hulppioniers wat ons nog ooit gehad het in lande onder die Suid-Afrikaanse takkantoor was 11- 214 (Botswana 270, Lesotho 326, Namibië 183, St. Helena 18, Suid-Afrika 10 126 en Swaziland 291). Gevolglik is ’n realistiese doelwit vir die komende April 14- 000 hulppioniers (Botswana 275, Lesotho 550, Namibië 250, St. Helena 20, Suid-Afrika 12 480 en Swaziland 425). Ons kan dit bereik as gemiddeld net 1 uit elke 6 verkondigers in elke gemeente hulppionierdiens doen. Party gemeentes sal natuurlik selfs meer verkondigers hê wie se omstandighede hulle toelaat om as hulppioniers te dien. Die meeste gemeentes sal hierdie gemeentedoelwit maklik kan bereik. Dink net aan die opwinding wat dit in julle gemeente tot gevolg sal hê en die goeie uitwerking wat dit op die predikingswerk in julle gebied sal hê!
14. Waarom is April ’n uitstekende maand om hulppionierdiens te doen?
14 Waarom is April ’n uitstekende maand om hulppionierdiens te doen? Die Gedenkmaal sal aan die begin van die maand gehou word, wat ons baie geleenthede sal bied om die mense te besoek wat dit bygewoon het. Ons sal ons tydskrifte aanbied, met die doel om die Leer Bybel-boek tydens herbesoeke by mense te laat en Bybelstudies te begin. Die spesiale Tydskrifdag vir Suid-Afrika en buurlande val op 14 April. Gevolglik sal hulppionierdiens in April ons baie geleenthede bied om Bybelstudies te begin. In April is die weer gewoonlik matig. Daar is ook vyf Sondae en ’n openbare vakansiedag in April, wat dit vir dié wat sekulêre werk doen en skoolgaan, makliker sal maak om hulppionierdiens te doen.
15. Waarom moet ons ’n gevoel van dringendheid hê terwyl hierdie Gedenkmaalseisoen nader kom?
15 Met elke Gedenkmaalseisoen wat verbygaan, is ons ’n jaar nader aan die einde van hierdie stelsel van dinge. Die oorblywende tyd om ander van ons groot God te vertel, is kort (1 Kor. 7:29). Wanneer hierdie Gedenkmaalseisoen verby is, sal die kosbare geleenthede wat dit ons bied om ons hemelse Vader te loof, vir ewig verby wees. Laat ons nou voorbereidings tref om gedurende Maart, April en Mei ons bes te doen om die voortreflikhede van Jehovah alom bekend te maak!
[Venster op bladsy 4]
Kan ons in April 14 000 hulppioniers hê?
◼ Ontleed jou prioriteite
◼ Bespreek doelwitte as ’n gesin
◼ Gesels met ander oor jou planne