Wanneer mense nie tuis is nie
1. Wat is dikwels ’n uitdaging in die deur-tot-deur-bediening?
1 In baie gebiede word dit al hoe moeiliker om mense tuis te vind. In hierdie “kritieke tye” is baie verplig om lang ure te werk net om die pot aan die kook te hou (2 Tim. 3:1). Party is dalk weg van die huis af, besig om geld te spandeer of om te ontspan. Hoe kan ons hierdie mense met die goeie nuus bereik?
2. Hoe kan ons seker maak dat iemand sal teruggaan na die huise waar niemand tuis was nie?
2 Hou goeie verslae: Die eerste stap is om aantekening te hou van huise waar niemand tuis is nie. Dit is veral belangrik as julle julle gebied gereeld deurwerk. Skryf jy die straatnaam, die nommer van die gebiedskaart, jou naam en die datum neer? Jy kan plek laat om nog aantekeninge te maak wanneer jy of ’n ander verkondiger teruggaan na die huise waar niemand tuis was nie. Wanneer jy klaar gewerk het, moet jy onthou om die verslag of aantekeninge vir die persoon te gee wat die gebiedskaart het, tensy hy instem dat jy kan teruggaan na die huise waar niemand tuis was nie. Skryf enige belangstelling wat jy gaan opvolg, êrens anders neer.
3. Wat is ’n paar wenke om diegene wat nie tuis was nie, te bereik?
3 Gaan op ’n ander tyd terug: Dalk is party wat nie op ’n werksdag tuis was nie, in die aand of oor naweke by die huis. Kan jy reël om op ’n meer geleë tyd terug te gaan? (1 Kor. 10:24). Indien nie, kan jy dalk jou verslag van huise waar niemand tuis was nie, vir ’n verkondiger gee wat wel op ’n ander tyd sal kan teruggaan. Andersins kan jy vir die huisbewoners skryf of hulle probeer bel. Verkondigers wie se gesondheidsprobleme hulle aandeel aan die deur-tot-deur-bediening beperk, sal jou dalk graag hiermee wil help.
4. Wat lig toe hoe belangrik dit is om terug te gaan na huise waar niemand tuis was nie?
4 Een geval lig toe hoe belangrik dit is om in aanraking te probeer kom met mense wat nie tuis was nie. Nadat verkondigers drie jaar lank een huis herhaaldelik besoek het, het hulle uiteindelik die huisbewoner tuis gevind. Dit het aan die lig gekom dat sy nog die hele tyd gewag het vir ’n Getuie om haar te besoek sodat sy die Bybelstudie kon voortsit wat sy gehad het voordat sy na daardie gebied verhuis het.
5. Wanneer kan ons sê dat ’n gebied deeglik gedek is?
5 Dek die gebied deeglik: Wanneer kan ons sê dat ’n gebied deeglik gedek is? Gewoonlik is dit wanneer redelike pogings aangewend is om met iemand by elke huis in aanraking te kom. Dit sal dalk gepas wees om ’n traktaat of ’n ouer tydskrif onopsigtelik by huise te laat waar niemand tuis is nie, veral in gebiede wat nie gereeld gedek word nie. Die gebied behoort binne vier maande gedek te word. Dan moet dit teruggegee word aan die gebiedskneg sodat hy sy gebiedsverslae kan bywerk.
6. Waarom moet ons al die mense in ons gebied met die goeie nuus probeer bereik?
6 Ons wil hê dat soveel mense moontlik ’n geleentheid moet kry om te leer om die naam van Jehovah aan te roep en gered te word (Rom. 10:13, 14). Dit sluit diegene in wat nie tuis is nie wanneer ons van huis tot huis werk. Soos die apostel Paulus, moet dit jou begeerte wees “om deeglik van die goeie nuus van die onverdiende goedhartigheid van God te getuig”.—Hand. 20:24.