Waarom verslag hou van waar mense nie tuis was nie?
1 ’n Getuie-egpaar het vroeg in die dag velddiens gedoen. Later daardie selfde dag het hulle teruggegaan na waar mense in die gebied nie tuis was nie. Een man het hulle ingenooi en aandagtig geluister. Hy het ’n Paradys op aarde-boek geneem en die Getuies gevra om weer te kom. Hy het nog nooit vantevore met Jehovah se Getuies gepraat nie en wou antwoorde op baie vrae hê; ’n Bybelstudie is begin. Hierdie egpaar was verheug om ’n skaapgeaarde persoon soos hierdie te vind. Sal jy graag so ’n ondervinding wil hê? As jy goed verslag hou van waar mense nie tuis was nie en stiptelik teruggaan, sal jy dalk.
2 Ons word gedurig aangespoor om noukeurig verslag te hou van waar mense nie tuis was nie en om gou terug te gaan. Soos die ondervinding hierbo toon, kan nog ’n besoek op dieselfde dag uitstekende resultate lewer. Hoewel ons ons dalk daarop toespits om ons toegewese gebied te dek, hou ons miskien nie so getrou verslag van waar daar nie mense tuis was nie. Party sê: ‘Ons werk elke twee of drie weke deur ons gebied; dit is nie nodig om so ’n verslag te hou nie omdat ons in elk geval binnekort sal teruggaan.’ Maar dit gee ons selfs meer rede om ’n verslag te hou. Wanneer ons teruggaan na ’n gebied wat gereeld gedek word om mense te besoek wat nie tuis was nie, stel dit ons in staat om deegliker te wees in ons soeke na verdienstelikes. Hoe so?
3 In baie gebiede is 50 persent of meer van die mense nie gedurende die dag tuis nie. Daarom skep ons in werklikheid meer gebied deur meer aandag te gee aan mense wat nie tuis was nie. Selfs al word daar selde in ’n gebied gewerk, kan ons beter resultate kry as ons ’n poging aanwend om almal te bereik voordat ons sê dat die gebied deurgewerk is.
4 Daar kan gewoonlik gereël word om op ’n ander dag terug te gaan na waar daar nie mense tuis was nie, verkieslik binne ’n week. Baie vind dat dit beter is om op ’n ander dag en tyd terug te gaan as toe die eerste besoek gedoen is. Jy kan besluit om tyd op ’n Saterdag of Sondag te gebruik om terug te gaan na waar daar nie mense tuis was gedurende die week nie. Baie gemeentes het weer gevind dat dit goeie vrugte afwerp om sulke besoeke vroeg in die aand te doen. Hulle vind soms meer as die helfte van die mense tuis.
5 Jy moet in jou persoonlike verslag ’n lys maak van jou herbesoeke. As dit nie vir jou moontlik is om terug te gaan na waar daar niemand tuis was nie, moet jy hierdie besonderhede vir die broer gee wat die leiding in die groep neem, sodat die volgende groep wat in die gebied werk dit kan gebruik.
6 As ons meer aandag aan hierdie aspek van ons bediening gee, kan dit ons produktiwiteit asook ons vreugde vergroot. Dit kan ons die bevrediging gee wat spruit uit die wete dat ons deeglik na skaapgeaardes soek en vir hulle sorg.—Eseg. 34:11-14.