Vraebus
◼ Keur “die getroue en verstandige slaaf” onafhanklike groepe Getuies goed wat bymekaarkom om navorsing oor die Skrif te doen of daaroor te debatteer?—Matt. 24:45, 47.
Nee, dit word nie goedgekeur nie. En tog is daar in verskeie wêrelddele ’n paar in ons organisasie wat groepe gevorm het om onafhanklike navorsing oor Bybelverwante onderwerpe te doen. Party doen onafhanklike groepstudie van Bybelse Hebreeus en Grieks sodat hulle die akkuraatheid van die Nuwe Wêreld-vertaling kan ontleed. Ander ondersoek wetenskaplike onderwerpe wat met die Bybel verband hou. Hulle het webwerwe en kletskamers geskep sodat hulle hulle beskouings kan bespreek en daaroor kan debatteer. Hulle het ook al konferensies gehou en publikasies gedruk om hulle bevindinge bekend te maak en om aan te vul wat by ons Christelike vergaderinge en deur ons lektuur voorsien word.
Dwarsdeur die wêreld ontvang Jehovah se volk oorgenoeg geestelike onderrigting en aanmoediging by gemeentelike vergaderinge en byeenkomste sowel as deur die publikasies van Jehovah se organisasie. Onder die leiding van sy heilige gees en op grond van sy Woord van waarheid voorsien Jehovah wat nodig is sodat al God se knegte “paslik verenig kan wees in dieselfde denke en in dieselfde gedagtegang” en “in die geloof standvastig” kan bly (1 Kor. 1:10; Kol. 2:6, 7). Ons is ongetwyfeld dankbaar vir Jehovah se geestelike voorsienings in hierdie laaste dae. Daarom keur “die getroue en verstandige slaaf” nie enige lektuur, vergaderinge of webwerwe goed wat nie onder hulle toesig uitgegee, gereël of geskep word nie.—Matt. 24:45-47.
Dit is prysenswaardig dat mense hulle denkvermoë wil gebruik om die goeie nuus te ondersteun. Maar geen persoonlike strewe moet die aandag aflei van wat Jesus Christus vandag deur middel van sy gemeente op die aarde uitrig nie. In die eerste eeu het die apostel Paulus daarteen gewaarsku om betrokke te raak by die bespreking van vermoeiende, tydrowende onderwerpe soos “geslagsregisters, wat op niks uitloop nie, maar wat eerder vrae vir navorsing lewer as enigiets in verband met geloof wat deur God uitgedeel word” (1 Tim. 1:3-7). Alle Christene moet daarna streef om “dwase twisvrae en geslagsregisters en twis en stryery oor die Wet [te vermy], want dit is nutteloos en vergeefs”.—Tit. 3:9.
Ons beveel aan dat dié wat bykomende Bybelstudie en navorsing wil doen, gebruik maak van Insight on the Scriptures, “Die hele Skrif is deur God geïnspireer en is nuttig” en ons ander publikasies, soos dié wat die profesieë in die Bybelboeke Daniël, Jesaja en Openbaring bespreek. Hierdie middele voorsien oorvloedige materiaal vir Bybelstudie en bepeinsing, waardeur ons “in alle wysheid en geestelike insig vervul mag word met die juiste kennis van [God se] wil, sodat [ons] kan wandel op ’n wyse wat Jehovah waardig is om hom ten volle te behaag terwyl [ons] voortgaan om vrug te dra in elke goeie werk en toe te neem in die juiste kennis van God”.—Kol. 1:9, 10.