Ons vertel ander van ons Koninkrykshoop
1 Gedurende hierdie kritieke laaste dae is baie mense in die wêreld sonder hoop (Ef. 2:12). Ander tree onverstandig op deur hulle vertroue te stel in materiële rykdom, menseheersers, die hedendaagse wetenskap of iets soortgelyks. Hoe bly is ons tog dat ons ’n ware hoop vir die toekoms het, ’n hoop wat “’n anker vir die siel [is], seker sowel as vas”!—Heb. 6:19.
2 Onder God se Koninkryksheerskappy sal die aarde in ’n paradys omskep word. Geliefdes wat gesterf het, sal opgewek word (Hand. 24:15). Armoede, ongeregtigheid, siekte, veroudering en die dood sal daar nie meer wees nie (Ps. 9:18; Matt. 12:20, 21; Op. 21:3, 4). Dit is party van Jehovah se beloftes wat binnekort vervul sal word. Na watter aspek van ons hoop sien jy die meeste uit?
3 Maak goeie nuus bekend: Ons moenie die Koninkrykshoop vir onsself hou nie. Liefde vir God en ons naaste beweeg ons om Jesus na te volg en “om goeie nuus aan die armes bekend te maak, . . . om ’n vrylating aan die gevangenes te verkondig en ’n herstel van gesig aan die blindes, om die verbryseldes in vryheid weg te stuur” (Luk. 4:18). Die apostel Paulus het die goeie nuus verkondig by die mark en oral waar mense gevind kon word. Hy het hom intensief met die bediening besig gehou (Hand. 18:5). As ons sy voorbeeld volg deur ywerig aan die bediening deel te neem, sal dit voorkom dat “die sorge van hierdie stelsel van dinge en die bedrieglike krag van rykdom” ons Christelike hoop laat vervaag.—Mark. 4:19.
4 Ons Koninkrykshoop vervaag nie wanneer ons mense ontmoet wat onverskillig is, die Koninkryksboodskap geringag of ons openlik teëstaan nie. Ons ‘hou vas aan die openbare bekendmaking van ons hoop sonder om te wankel’ (Heb. 10:23). Ons “skaam [ons] nie vir die goeie nuus nie” (Rom. 1:16). As ons oortuiging en volharding duidelik gesien kan word, sal dit party dalk uiteindelik beweeg om te luister.
5 Hoewel ons tereg die aandag vestig op verslegtende wêreldtoestande wat Bybelprofesieë vervul, is ons nie doemprofete nie. Ons bediening is eerder toegespits op ons Koninkrykshoop—die goeie nuus van God se Koninkryk. Laat ons dus hierdie goeie nuus met oortuiging en ywer verkondig “om tot die einde toe die volle versekerdheid van die hoop te hê”.—Heb. 6:11.