Onderrig met oorredingskrag
1. Wat is dikwels nodig as ons God se Woord op bekwame wyse in die bediening wil gebruik?
1 Bekwame bedienaars, soos die apostel Paulus, besef dat meer nodig is om “die woord van die waarheid reg [te] hanteer” as om bloot uit die Heilige Skrif aan te haal (2 Tim. 2:15). Hoe kan ons met “oorredingskrag” onderrig wanneer ons God se Woord gebruik?—Hand. 28:23.
2. Hoe kan ons mense help om God se Woord meer te waardeer?
2 Laat God se Woord praat: Eerstens, vestig die aandag op die Bybel op ’n manier wat respek vir die goddelike wysheid daarin inboesem. Ons vertroue op God se Woord kan ons toehoorder beweeg om aandagtig te luister wanneer ’n teks gelees word (Heb. 4:12). Ons kan eenvoudig sê: “Ek het dit nuttig gevind om God se gedagtes oor hierdie saak te kry. Kyk wat sê sy Woord.” Laat God se Woord praat wanneer dit ook al moontlik is, deur regstreeks daaruit te lees.
3. Hoe kan ons ons toehoorder help om ’n teks wat ons gelees het, te verstaan?
3 Tweedens, verduidelik die teks wat gebruik word. Dit is vir baie mense moeilik om ’n vers te verstaan wanneer hulle dit die eerste keer lees. Ons moet gewoonlik verduidelik hoe dit met die onderwerp verband hou (Luk. 24:26, 27). Vestig die aandag op die belangrike woorde. ’n Vraag kan jou help om te sien of die punt gesnap is.—Spr. 20:5; Hand. 8:30.
4. Watter laaste stap is nodig om met oorredingskrag te onderrig?
4 Redeneer oor tekste: Derdens, probeer om die verstand en hart te bereik. Help die huisbewoner om te sien hoe die vers op hom persoonlik van toepassing is. As ons oor die tekste redeneer, kan dit iemand beweeg om sy denkwyse te verander (Hand. 17:2-4; 19:8). Nadat ons Psalm 83:18 gelees het, kan ons byvoorbeeld redeneer oor hoe noodsaaklik dit is om iemand se naam te ken as ons ’n persoonlike verhouding met hom wil opbou. Dan kan ons vra: “Dink jy dat jou gebede betekenisvoller sal wees as jy God se naam ken?” Deur die teks op hierdie manier op die huisbewoner se persoonlike lewe toe te pas, toon ons die praktiese waarde daarvan. Wanneer ons ander so met oorredingskrag uit God se Woord onderrig, word opregtes van hart getrek om die ware en lewende God, Jehovah, te aanbid.—Jer. 10:10.