Hoe om ander te oorreed
1 Die apostel Paulus was bekend as ’n oorredende bedienaar (Hand. 19:26). Selfs koning Agrippa het vir hom gesê: “Jy sal my in ’n kort tydjie oorreed om ’n Christen te word” (Hand. 26:28). Wat het Paulus se bediening so oorredend gemaak? Hy het logies uit die Skrif geredeneer en sy argumente by sy luisteraars aangepas.—Hand. 28:23.
2 In navolging van Paulus moet ons ook oorredend in ons bediening wees. Hoe? Deur insig te gebruik wanneer ons met ander praat en na hulle te luister (Spr. 16:23, NW). Drie belangrike stappe sal ons help om dit te doen.
3 Luister aandagtig: Terwyl die ander persoon praat, moet jy luister sodat jy ’n gemeenskaplike grondslag kan vind waarop jy kan voortbou. As hy ’n beswaar opper, moet jy probeer bepaal wat die redenasie daaragter is. Dit sal jou help om presies te weet wat hy glo, waarom hy dit glo en wat hom daarvan oortuig het (Spr. 18:13). Lok hom op ’n taktvolle manier uit om daaroor te praat.
4 Vra vrae: As iemand sê dat hy in die Drie-eenheid glo, kan jy vra: “Het jy nog altyd in die Drie-eenheid geglo?” Vra dan: “Het jy al ooit ’n deeglike studie gemaak van wat die Bybel oor die onderwerp sê?” Jy kan ook vra: “As God wel deel van ’n Drie-eenheid is, dink jy nie die Bybel sou uitdruklik so gesê het nie?” Die reaksies wat jy kry, sal jou help om met die persoon te redeneer oor wat die Skrif sê.
5 Gebruik grondige redenasies: ’n Getuie het ’n vrou wat geglo het dat Jesus God is, gevra: ‘Watter verwantskap sou jy gebruik om toe te lig dat twee mense gelyk is?’ Sy het geantwoord: “Ek sou moontlik twee broers gebruik.” Hy het bygevoeg: “Miskien selfs ’n identiese tweeling. Maar watter punt het Jesus gemaak deur ons te leer om God as die Vader en homself as die Seun te beskou?” Die vrou het die punt gesnap dat die een ouer is en groter gesag het (Matt. 20:23; Joh. 14:28; 20:17). Haar verstand en hart is met die oorredingskuns bereik.
6 Nie almal is natuurlik ontvanklik vir die waarheid nie, ongeag hoe logies en akkuraat ons dit dalk aanbied. Maar laat ons, soos Paulus, ywerig na opregtes van hart in ons gebied soek en hulle oorreed om die Koninkryksboodskap te aanvaar.—Hand. 19:8.