Moenie jou bediening beperk nie—Hou ’n studie ondanks ’n besige program
1. Waarom huiwer party om ’n Bybelstudie aan te bied?
1 Party huiwer om ’n Bybelstudie aan te bied omdat hulle ’n besige program het. Dit verg tyd om na ’n Bybelstudent om te sien. Tyd is nodig om vir die studie voor te berei, om dit te hou en om die student te help om persoonlike struikelblokke te oorkom. Die apostel Paulus het gesê dat hy sy siel meegedeel het om die mense in Tessalonika te help om Jehovah te leer ken (1 Tess. 2:7, 8). Hoe kan ons ’n Bybelstudie hou, al het ons ’n besige program?
2. Watter uitwerking het liefde vir Jehovah op hoe ons ons tyd gebruik?
2 Aanbidding verg tyd: Die eenvoudige waarheid is dat aanbidding tyd verg. Byvoorbeeld, ons ruim gereeld tyd in om die vergaderinge by te woon, aan die bediening deel te neem, die Bybel te lees en te bid. ’n Besige getroude persoon sal met graagte tyd maak vir sy of haar maat. Hoeveel te meer moet ons met graagte tyd “uitkoop” om Jehovah te aanbid omdat ons lief is vir hom (Ef. 5:15-17; 1 Joh. 5:3). Volgens Jesus is die dissipelmaakwerk ’n noodsaaklike deel van ons aanbidding (Matt. 28:19, 20). As ons hieroor nadink, sal dit ons help om nie te huiwer om die verantwoordelikheid te aanvaar om ’n Bybelstudie te hou nie.
3. Hoe kan ons na ’n Bybelstudie omsien, al ontwrig omstandighede ons program vir die bediening?
3 Maar sê nou ons program word deur sekulêre werk, chroniese gesondheidsprobleme of teokratiese toewysings ontwrig? Party verkondigers wat van tyd tot tyd weg moet wees, hou hulle Bybelstudie oor die telefoon of met behulp van ’n Internet-oproepdiens. Diegene wie se program deur chroniese gesondheidsprobleme ontwrig word, het al gereël dat die student na hulle huis toe kom vir die studie. Party het al gereël dat ’n betroubare verkondiger vir hulle instaan en die studie hou wanneer hulle nie beskikbaar is nie.
4. Watter seëninge bring dit mee wanneer ons aan die Bybelstudiewerk deelneem?
4 Paulus het baie vreugde gesmaak omdat hy van sy tyd en energie gebruik het om ander te help om die waarheid te leer (Hand. 20:35). Toe hy nagedink het oor die vrug van sy arbeid in Tessalonika, is hy beweeg om Jehovah te dank (1 Tess. 1:2). Ons vreugde en bevrediging in die bediening kan toeneem as ons nie toelaat dat ’n besige program ons daarvan weerhou om aan die Bybelstudiewerk deel te neem nie.