Verbeter jou vaardighede in die bediening—Hoe om te reageer wanneer ’n huisbewoner kwaad is

Waarom dit belangrik is: Baie mense wat ons in die bediening ontmoet, is beleefd. Maar Jesus het voorspel dat party mense ons sal haat (Joh. 17:14). Daarom moet ons nie verbaas wees as ons ’n huisbewoner teëkom wat kwaad is nie. Wanneer dit gebeur, wil ons op ’n manier optree wat Jehovah behaag, aangesien ons hom verteenwoordig (Rom. 12:17-21; 1 Pet. 3:15). As ons dit doen, kan ons moontlik verhoed dat die situasie vererger. Dit sal ook as ’n getuienis dien vir die huisbewoner en enige toeskouers, en hulle sal dan meer geneig wees om te luister wanneer Jehovah se Getuies hulle weer besoek.—2 Kor. 6:3.

Hoe om dit te doen:

Bly kalm en vriendelik. Dit sal help om die spanning te verlig. Moenie die huisbewoner se reaksie persoonlik opneem nie (Pred. 7:9). Hy is dalk ontsteld omdat hy persoonlike probleme het of omdat jy hom op die verkeerde tyd besoek het. Selfs al is dit ons boodskap wat hom ontstel, is dit dikwels die geval omdat hy mislei is.—2 Kor. 4:4.
Gee ’n sagte antwoord en kies jou woorde wyslik (Spr. 15:1). Het jy hom wakker gemaak of gesteur? Hoewel ons nie om verskoning vra vir ons werk nie, kan jy nederig om verskoning vra dat jy hom op ’n ongeleë tyd besoek het. Is hy kwaad omdat hy ’n valse gerug van ons gehoor het? Indien wel, kan jy sê: “Ek kan verstaan waarom dit jou sou ontstel. Maar dit klink asof die dinge wat jy oor ons gehoor het, nie waar is nie. Kan ek verduidelik?” Dalk stem hy nie saam met een van ons oortuigings nie, byvoorbeeld in verband met uitsetting of bloed. Jy kan sê: “Ek verstaan. Daar is ander wat ook so voel. Kan ek jou in die Bybel wys hoekom ons so glo?”
As die persoon hoogs ontsteld is, is dit dalk beter om jou te verskoon en te loop sonder om iets te sê. As hy vra dat Jehovah se Getuies hom nie weer moet besoek nie, kan jy hom verseker dat sy wense gerespekteer sal word.

Wenk vir die maand:

Hou oefensessies gedurende julle aand vir Gesinsaanbidding.
As julle ’n huisbewoner teëgekom het wat kwaad is, kan jy met jou velddiensmaat bespreek hoe jy dit dalk beter kon hanteer het.