‘Wees vreedsaam teenoor alle mense’
1. Watter Bybelraad moet ons toepas wanneer ons huisbewoners teëkom wat omgekrap is?
1 Jehovah se volk is vredeliewend, en ons bediening is ’n bediening van vrede (Jes. 52:7). Maar soms kom ons mense teë wat omgekrap is omdat ons hulle besoek. Wat sal ons help om in hierdie situasies vreedsaam te wees?—Rom. 12:18.
2. Waarom is dit vir ons belangrik om insig te hê?
2 Openbaar insig: Hoewel party met woede reageer omdat hulle die waarheid teëstaan, hou die redes vir ander se ergerlikheid dalk glad nie verband met ons boodskap nie. Miskien het ons hulle op ’n ongeleë tyd besoek. Die huisbewoner is dalk omgekrap oor persoonlike probleme. Al is dit die goeie nuus wat hom kwaad gemaak het, moet ons onthou dat hy waarskynlik so reageer omdat hy mislei is (2 Kor. 4:4). As ons insig het, sal dit ons help om kalm te bly en te besef dat sy woorde nie op ons persoonlik gemik is nie.—Spr. 19:11.
3. Hoe kan ons respek teenoor die huisbewoner betoon?
3 Betoon respek: Baie mense in die gebied het oortuigings waaroor hulle sterk voel (2 Kor. 10:4). Hulle het die reg om te kies of hulle sal luister of nie. Ons moet nooit ’n huisbewoner se oortuigings verkleineer of ’n meerderwaardige gesindheid hê nie. As ons gevra word om te loop, moet ons beleefd aan die versoek voldoen.
4. Wat beteken dit om aangename woorde te gebruik?
4 Gebruik aangename woorde: Al word ons beledig, moet ons antwoord sag en aangenaam wees (Kol. 4:6; 1 Pet. 2:23). Moenie by ’n rusie betrek word nie, maar probeer eerder gemeenskaplike grond vind. Miskien kan ons vriendelik vra wat die redes vir die huisbewoner se beswaar is. Maar soms is dit die beste om nie die gesprek te probeer voortsit nie, sodat ons hom nie nog meer omkrap nie.—Spr. 9:7; 17:14.
5. Watter voordele bring dit mee as ons vreedsaam in die bediening is?
5 As ons vreedsaam is, sal die huisbewoner heel moontlik onthou hoe ons gereageer het en luister die volgende keer dat iemand vir hom probeer getuig (Rom. 12:20, 21). Al lyk dit of hy onversetlik is wat sy teenstand betref, sal hy dalk eendag ons broer word (Gal. 1:13, 14). Hetsy hy ooit belangstelling in die waarheid toon of nie, ons sal Jehovah eer en ons leer versier as ons ons selfbeheersing behou en vreedsaam is.—2 Kor. 6:3.