Seëninge vir mense wat gehoorsaam is aan God

Die profeet Moses het gesê dat ons God se seëninge sal kry as ons gehoorsaam is aan Sy gebooie (Deuteronomium 10:13; 11:27). Ons is nie gehoorsaam aan God omdat ons bang is dat hy ons gaan straf nie. God se pragtige eienskappe beweeg ons om gehoorsaam te wees aan hom omdat ons lief is vir hom en enigiets wil vermy wat hom sal seermaak. “Die liefde vir God beteken dat ons sy gebooie gehoorsaam.” – 1 Johannes 5:3.

Maar hoe kan ons God se seën ontvang as ons gehoorsaam is aan hom? Kyk na twee maniere.

1. GEHOORSAAMHEID AAN GOD SAL ONS WYS MAAK

“Ek, Jehovah, is jou God, die Een wat jou leer om jouself te bevoordeel, . . . wat jou lei op die weg wat jy moet volg.” – JESAJA 48:17.

Jehovah God, ons Skepper, ken ons en gee vir ons die raad wat ons nodig het. As ons wil hê dat sy leringe ons moet help om wyse besluite te maak, moet ons uit die Heilige Skrif leer wat God wil hê ons moet doen en dit toepas.

2. GEHOORSAAMHEID AAN GOD SAL ONS GELUKKIG MAAK

“Gelukkig is dié wat die woord van God hoor en dit gehoorsaam!” – LUKAS 11:28.

Vandag geniet miljoene mense ware geluk omdat hulle gehoorsaam is aan God se Woord. Kyk na die voorbeeld van ’n man in Spanje. Hy het ’n slegte humeur gehad en het ander sleg behandel – insluitende sy vrou. Eendag het hy gelees oor wat die profeet Moses gesê het oor hoe sagmoedig Josef, die seun van Jakob, was. Josef was as ’n slaaf verkoop en onregverdig in die tronk gesit. Tog het hy sagmoedig en vreedsaam gebly en was hy bereid om ander te vergewe (Genesis, hoofstuk 37-45). Die man in Spanje erken: “Toe ek oor Josef se voorbeeld nagedink het, het dit my beweeg om sagmoedig en liefdevol te wees en selfbeheersing te hê. As gevolg hiervan geniet ek nou ’n gelukkige lewe.”

Die Heilige Skrif gee vir ons nog raad oor hoe ons ander moet behandel. Kom ons bespreek dit verder in die volgende artikel.