Seëninge vir mense wat ander help

Baie mense regoor die wêreld het nie kos of ’n dak oor hulle kop nie. Ander soek na ’n hoop vir die toekoms. Hoe kan dit vir ons God se goedkeuring en seën bring as ons ons bes doen om hierdie mense te help?

WAT DIE HEILIGE SKRIF SÊ

“Die een wat goed is vir die armes, leen aan Jehovah, en Hy sal hom terugbetaal vir wat hy doen.” – SPREUKE 19:17.

WAT DIT BETEKEN OM IEMAND TE HELP

Jesus het ’n storie vertel van ’n man wat deur rowers aangeval is en halfdood agtergelaat is (Lukas 10:29-37). ’n Behulpsame vreemdeling het gestop en die man wat erg beseer is, gehelp. Hy het dit gedoen al was hy van ’n ander ras.

Hierdie goeie man het die beseerde man se wonde versorg en in sy fisiese behoeftes voorsien. Hy het hom ook vertroos en hom deur sy moeilike situasie gehelp.

Wat leer hierdie storie ons? Jesus het gewys dat ons alles moet doen wat ons kan om ander te help (Spreuke 14:31). Die Heilige Skrif wys dat God binnekort ’n einde sal maak aan armoede en swaarkry. Maar ons wonder dalk hoe en wanneer God dit sal doen? Die volgende artikel sal die seëninge bespreek wat jou liefdevolle Skepper vir jou toekoms belowe.