Verwysings vir die Lewe en Bediening-vergaderingwerkboek
2-8 OKTOBER
SKATTE UIT GOD SE WOORD | DANIËL 7-9
“Daniël se profesie het die Messias se koms voorspel”
(Daniël 9:24) “Sewentig weke is oor jou volk en oor jou heilige stad vasgestel, om die oortreding te beëindig en om aan sonde ’n einde te maak en om vir die ongeregtigheid versoening te doen en om regverdigheid vir onbepaalde tye in te bring en om op visioen en profeet ’n seël te druk en om die Heilige der Heilige te salf.
it-2-E 902 ¶2
Sewentig weke
Oortreding en sonde word beëindig. Jesus se dood, opstanding en verskyning in die hemel het ‘oortreding beëindig en ’n einde gemaak aan sonde en vir die ongeregtigheid versoening gedoen’ (Da 9:24). Die Wetsverbond het gewys dat die Jode sondaars is en het hulle veroordeel. Dit is asof hulle as verbondsoortreders gevonnis is. Maar waar dit duidelik was dat sonde volgens die Wetsverbond “oorvloedig geword het”, het God se barmhartigheid en guns nog oorvloediger geword deur sy Messias (Ro 5:20). Deur die Messias se offerande is berouvolle sondaars se oortreding en sonde uitgewis en die vonnis teruggetrek.
(Daniël 9:25) En jy moet weet en die insig hê dat daar vanaf die uitgang van die woord om Jerusalem te herstel en te herbou tot op Messias die Leier sewe weke sal wees, ook twee-en-sestig weke. Dit sal terugkeer en herbou word, met ’n openbare plein en grag, maar in tye van benoudheid.
it-2-E 900 ¶7
Sewentig weke
Die Messias se koms ná ‘nege-en-sestig weke’. Die volgende “twee-en-sestig weke” (Da 9:25), wat deel van die 70 uitmaak en tweede genoem word, sou begin nadat die “sewe weke” geëindig het. Daarom sou die tyd “vanaf die uitgang van die woord” om Jerusalem te herbou tot op “Messias die Leier” 7 plus 62 “weke”, of 69 “weke”—483 jaar— wees, vanaf die jaar 455 VHJ tot 29 HJ. Soos hierbo genoem, is Jesus in die herfs van daardie jaar, 29 HJ, in water gedoop, met heilige gees gesalf en het hy sy bediening as “Messias die Leier” begin.—Lu 3:1, 2, 21, 22.
(Daniël 9:26, 27a) “En ná die twee-en-sestig weke sal die Messias uitgeroei word, met niks vir hom nie. “En die volk van ’n leier wat kom, sal die stad en die heilige plek verwoes. En die einde daarvan sal deur die vloed wees. En tot die einde toe sal daar oorlog wees; dit waarop besluit is, is verwoestings. 27 “En hy sal die verbond een week lank vir baie van krag laat bly; en teen die helfte van die week sal hy offerande en offergawe laat ophou.
it-2-E 901 ¶2
Sewentig weke
“Uitgeroei” teen die helfte van die week. Gabriël het nou vir Daniël verduidelik: “Ná die twee-en-sestig weke sal die Messias uitgeroei word, met niks vir hom nie” (Da 9:26). ’n Rukkie nadat die ‘sewe plus twee-en-sestig weke’ verby was, ongeveer drie en ’n half jaar later, is Christus uitgeroei deur aan ’n folterpaal te sterf, en het hy sodoende alles prysgegee om die losprys vir die mensdom te voorsien (Jes 53:8). Bewyse toon dat die eerste helfte van die “week” na Jesus se bediening verwys het. Jesus het eenkeer, heel moontlik in die noordelike herfs van 32 HJ, ’n gelykenis vertel en die Joodse nasie skynbaar vergelyk met ’n vyeboom (vergelyk Mt 17:15-20; 21:18, 19, 43) wat vir “drie jaar” geen vrugte gedra het nie. Die wingerdarbeider het vir die eienaar van die wingerd gesê: “Heer, laat staan dit ook hierdie jaar, totdat ek daarom spit en mis gooi; en as dit dan in die toekoms vrugte voortbring, goed en wel; maar so nie, moet u dit afkap” (Lu 13:6-9). Hy het dalk na sy eie bediening onder daardie hardkoppige nasie verwys, wat op daardie stadium al drie jaar geduur het en nou die begin van die vierde jaar bereik het.
it-2-E 901 ¶5
Sewentig weke
“Die helfte van die week” sou in die middel van sewe jaar, of ná drie en ’n half jaar in daardie “week” van jare, wees. Omdat die 70ste “week” in ongeveer die herfs van 29 HJ begin het toe Jesus gedoop en as die Christus gesalf is, sou die helfte van daardie week (drie en ’n half jaar) voortduur tot die lente van 33 HJ, of die tyd van die Pasga (14 Nisan) van daardie jaar. Dit lyk asof hierdie dag 1 April 33 HJ is, volgens die Gregoriaanse kalender. (Sien LORD’S EVENING MEAL [Time of Its Institution].) Die apostel Paulus verduidelik vir ons dat Jesus ‘gekom het om die wil van God te doen’, naamlik om ‘weg te doen met die eerste [die offerandes volgens die Wet] sodat hy die tweede tot stand kon bring’. Hy het dit gedoen deur sy eie liggaam as offerande aan te bied.—Heb 10:1-10.