Verwysings vir die Lewe en Bediening-vergaderingwerkboek

7-13 MEI

SKATTE UIT GOD SE WOORD | MARKUS 7-8

“Neem jou folterpaal op en volg my voortdurend”

(Markus 8:34) En hy het die skare saam met sy dissipels na hom toe geroep en vir hulle gesê: “As iemand agter my aan wil kom, laat hy homself verloën en sy folterpaal opneem en my voortdurend volg.

Studienota oor Mr 8:34 in nwtsty

laat hy homself verloën: Of, “laat hy alle regte op homself opgee”. Dit wys dat iemand gewillig is om homself van alles te ontsê of om eienaarskap van homself aan God oor te gee. Die Griekse uitdrukking kan vertaal word as “hy moet vir homself nee sê”. Dit is gepas, want dit kan beteken dat hy nee sê vir persoonlike begeertes, doelwitte of gerief (2Ko 5:14, 15). Markus gebruik dieselfde Griekse werkwoord wanneer hy beskryf hoe Petrus gesê het dat hy Jesus nie ken nie. — Mr 14:30, 31, 72.

(Markus 8:38) Want elkeen wat hom in hierdie owerspelige en sondige geslag vir my en my woorde skaam, vir hom sal die Seun van die mens hom ook skaam wanneer hy in die heerlikheid van sy Vader met die heilige engele kom.”

jy-E 143 ¶4

Wie is die Seun van die mens?

Ja, Jesus se volgelinge moet moedig en selfopofferend wees om sy guns te verdien. Jesus sê: “Elkeen wat hom in hierdie owerspelige en sondige geslag vir my en my woorde skaam, vir hom sal die Seun van die mens hom ook skaam wanneer hy in die heerlikheid van sy Vader met die heilige engele kom” (Markus 8:38). Ja, wanneer Jesus kom, “sal hy elkeen volgens sy gedrag vergeld”. — Matteus 16:27.

14-20 MEI

SKATTE UIT GOD SE WOORD | MARKUS 9-10

“’n Geloofversterkende visioen”

(Markus 9:7) En ’n wolk het gevorm wat hulle oorskadu het, en ’n stem het uit die wolk gekom: “Dit is my Seun, die geliefde; luister na hom.”

Studienota oor Mr 9:7 in nwtsty

’n stem: Die tweede van drie kere in die Evangelieverslae waar daar gesê word dat Jehovah direk met mense praat. — Sien studienotas oor Mr 1:11; Joh 12:28.

(Markus 10:17, 18) En toe hy uitgaan om sy reis voort te sit, het ’n sekere man aangehardloop gekom en voor hom op sy knieë geval en hom gevra: “Goeie Leermeester, wat moet ek doen om die ewige lewe te beërf?” ¹⁸ Jesus het vir hom gesê: “Waarom noem jy my goed? Niemand is goed nie, behalwe een, God.

Studienotas oor Mr 10:17, 18 in nwtsty

Goeie Leermeester: Die man het waarskynlik die woorde “Goeie Leermeester” gebruik as ’n vleiende en tradisionele titel, omdat die godsdiensleiers gewoonlik daarop aangedring het om hierdie tipe eer te ontvang. Al het Jesus geen beswaar daarteen gehad as mense hom op die regte manier “Leermeester” en “Here” genoem het nie (Joh 13:13), het hy alle eer aan sy Vader gegee.

Niemand is goed nie, behalwe een, God: Jesus erken hier dat Jehovah die hoogste standaard is van wat goed is, die Een wat die absolute reg het om te besluit wat goed en wat sleg is. Toe Adam en Eva in opstand gekom het en van die boom van die kennis van goed en kwaad geëet het, het hulle daardie reg probeer oorneem. Maar Jesus is nie so nie. Hy is nederig en laat dit in sy Vader se hande om standaarde te stel. In sy Woord het God vir ons bevele gegee waar hy duidelik vir ons wys wat goed is. — Mr 10:19.

Studienotas oor Mr 10:4 in nwtsty

ontslagbrief: Of “skeibrief”. Die Wet het gesê dat ’n man wat daaraan dink om te skei ’n wetlike dokument moes voorberei en moontlik die ouer manne vir raad moes vra. Dit het hom die tyd gegee om hierdie ernstige besluit te heroorweeg. Die doel van die Wet was om vrouens ’n mate van beskerming te gee en om mans te keer om nie oorhaastig van hulle vrouens te skei nie (De 24:1). Maar teen die tyd dat Jesus op aarde was, het godsdiensleiers dit maklik gemaak om te skei. Die eerste-eeuse geskiedskrywer Josefus, wat ’n Fariseër en ’n geskeide man was, het gesê dat mense sommer “vir enige rede” kon skei “en dat mans die oorsaak van baie van hierdie redes was”.​ — Sien studienota oor Mt 5:31.

Studienotas oor Mr 10:11 in nwtsty

van sy vrou skei: Of “sy vrou wegstuur”. Om hierdie woorde van Jesus in Markus reg te verstaan, moet mens na die volledige aanhaling kyk in Mt 19:9. Daar het Jesus gesê: “Behalwe op grond van hoerery.” (Sien studienota oor Mt 5:32.) Toe Markus sê dat ’n mens egbreuk pleeg wanneer jy skei, het hy nie gepraat van mense wat skei omdat hulle huweliksmaat ontrou was deur “hoerery” (Grieks, por·neiʹa) te pleeg nie.

pleeg egbreuk teen haar: Die rabbi’s, wat mense die Wet geleer het, het mans toegelaat om “op sommer enige grond” van hulle vrouens te skei. Maar Jesus het gesê dat dit verkeerd is (Mt 19:3, 9). Die gedagte dat ’n man teen sy vrou egbreuk kan pleeg, was vir die meeste Jode heeltemal iets nuuts. Hulle rabbi’s het geleer dat ’n man nie teen sy vrou egbreuk kon pleeg nie omdat net vrouens ontrou kon wees. Deur te sê dat mans ook egbreuk pleeg wanneer hulle sonder goeie rede skei, het Jesus eintlik vrouens vereer en nie gemaak as of hulle minder waarde het nie.

21-27 MEI

SKATTE UIT GOD SE WOORD | MARKUS 11-12

“Sy het meer ingegooi as al die ander”

(Markus 12:41, 42) En hy het gaan sit waar hy die skatkiste kon sien en begin toekyk hoe die skare geld in die skatkiste gooi; en talle ryk mense het baie muntstukke ingegooi. ⁴² En ’n arm weduwee het gekom en twee muntstukkies ingegooi wat baie min waarde het.

Studienotas oor Mr 12:41, 42 in nwtsty

skatkiste: Ou Joodse bronne sê dat hierdie bydraekiste, of houers, soos trompette of horings gelyk het, blykbaar met klein openinge aan die bokant. Mense het verskillende offergawes daarin gegooi. Die Griekse woord wat hier gebruik is, kom ook in Joh 8:20 voor waar dit as “die skatkisgedeelte” vertaal is. Daardie uitdrukking verwys klaarblyklik na ’n area in die voorhof van die vroue. (Sien studienota oor Mt 27:6 en sgd deel 15.) Volgens rabbynse bronne was daar 13 skatkiste by die mure van daardie voorhof. Blykbaar het die tempel ook ’n groot skatkamer gehad waarheen die geld van die skatkiste geneem is.

twee muntstukkies: Lett., “twee lepta”, die meervoudsvorm van die Griekse woord le·ptonʹ wat iets klein en dun beteken. ’n Lepton is ’n muntstuk wat gelyk was aan 1/128 van ’n denarius en was blykbaar die kleinste koper- of bronsmuntstuk wat in Israel gebruik is. — Sien die Woordelys in die New World Translation of the Holy Scriptures, “Lepton”, en sgd deel 18.

wat baie min waarde het: Lett., “wat ’n quadrans is”. Die Griekse woord ko·dranʹtes (van die Latynse woord quadrans) verwys na ’n Romeinse koper- of bronsmuntstuk met die waarde van 1/64 van ’n denarius. Markus gebruik hier Romeinse geld om die waarde te verduidelik van muntstukke wat gewoonlik deur die Jode gebruik is. — Sien sgd deel 18.

Soek na geestelike skatte

(Markus 11:17) maar hy het bly leer en sê: “Staan daar nie geskrywe: ‘My huis sal ’n huis van gebed genoem word vir al die nasies’ nie? Maar julle het dit ’n rowerspelonk gemaak.”

Studienota oor Mr 11:17 in nwtsty

’n huis van gebed . . . vir al die nasies: Van die drie Evangelieskrywers wat Jes 56:7 aanhaal, is dit net Markus wat byvoeg: “Vir al die nasies [mense]” (Mt 21:13; Lu 19:46). Die tempel in Jerusalem was veronderstel om ’n plek te wees waar Israeliete en godvresende uitlanders tot Jehovah kon bid en hom kon loof (1Kn 8:41-43). Jesus het die mense tereg veroordeel wat die tempel gebruik het om handel te dryf en dit só ’n rowerspelonk, of ’n grot van rowers, gemaak het. Hulle optrede het mense van alle nasies ontmoedig om Jehovah in sy huis van gebed te aanbid. So is hulle beroof van die geleentheid om Hom te leer ken.

(Markus 11:27, 28) En hulle het weer in Jerusalem gekom. En terwyl hy in die tempel geloop het, het die hoofpriesters en die skrifgeleerdes en die ouer manne na hom toe gekom ²⁸ en vir hom begin sê: “Deur watter gesag doen jy hierdie dinge? Of wie het jou hierdie gesag gegee om hierdie dinge te doen?”

jy-E 244 ¶7

’n Vyeboom word gebruik om ’n les oor geloof te leer

Kort daarna gaan Jesus en sy dissipels Jerusalem binne. Soos gewoonlik gaan Jesus na die tempel waar hy begin onderrig. Die hoofpriesters en ouer manne van die volk dink heel moontlik aan wat Jesus die vorige dag met die geldwisselaars gedoen het en vra uitdagend: “Deur watter gesag doen jy hierdie dinge? Of wie het jou hierdie gesag gegee om hierdie dinge te doen?” — Markus 11:28.

28 MEI – 3 JUNIE

SKATTE UIT GOD SE WOORD | MARKUS 13-14

“Moenie deur mensevrees verstrik word nie”

(Markus 14:47) Een van dié wat daar gestaan het, het egter sy swaard getrek en die slaaf van die hoëpriester geslaan en sy oor afgekap.

(Markus 14:54) Maar Petrus het hom op ’n aansienlike afstand tot in die binnehof van die hoëpriester gevolg; en hy het saam met die huisbediendes gesit en hom by ’n helder vuur warm gemaak.

(Markus 14:66-72) En terwyl Petrus onder in die binnehof was, het een van die diensmeisies van die hoëpriester gekom, ⁶⁷ en toe sy Petrus sien, besig om hom warm te maak, het sy hom reguit aangekyk en gesê: “Jy was ook saam met die Nasarener, dié Jesus.” ⁶⁸ Maar hy het dit ontken en gesê: “Ek ken hom nie en ek verstaan ook nie wat jy sê nie”, en hy het buitentoe gegaan na die voorportaal. ⁶⁹ Toe die diensmeisie hom daar sien, het sy weer vir dié wat daar staan, begin sê: “Hy is een van hulle.” ⁷⁰ Weer het hy dit ontken. En na ’n klein rukkie het dié wat daar gestaan het, weer eens vir Petrus begin sê: “Jy is beslis een van hulle, want jy is ’n Galileër.” ⁷¹ Maar hy het begin vloek en sweer: “Ek ken nie hierdie man van wie julle praat nie.” ⁷² En onmiddellik het ’n haan ’n tweede keer gekraai; en Petrus het die woord onthou wat Jesus vir hom gesê het: “Voordat ’n haan twee keer kraai, sal jy my drie keer verloën.” En hy het begin huil.

it-2-E 619 ¶6

Petrus

’n Ander dissipel het Petrus blykbaar gevolg of saam met hom na die hoëpriester se huis gegaan. Hy het Petrus gehelp om by die binnehof in te kom (Joh 18:15, 16). Petrus het nie stil in ’n donker hoekie gaan wegkruip nie, hy het by die vuur gaan staan om warm te word. Omdat hy langs die vuur gestaan het waar dit lig was, kon ander hom herken as iemand wat saam met Jesus was. Hulle het selfs sterker hieroor gevoel toe hulle aan sy aksent hoor dat hy van Galilea af kom. Toe hulle Petrus beskuldig, het hy drie keer gesê dat hy Jesus nie eers ken nie. Petrus het so kwaad vir hulle geword dat hy gevloek het. Iewers in die stad het ’n haan ’n tweede keer gekraai, en Jesus het “omgedraai en Petrus aangekyk”. Petrus het buitentoe gegaan en bitterlik gehuil (Mt 26:69-75; Mr 14:66-72; Lu 22:54-62; Joh 18:17, 18). Maar Jesus se gebed vir Petrus is beantwoord, en Petrus het nie sy geloof heeltemal verloor nie. — Lu 22:31, 32.

Soek na geestelike skatte

(Markus 14:60-62) Uiteindelik het die hoëpriester in hulle midde opgestaan en Jesus ondervra en gesê: “Antwoord jy niks nie? Wat getuig hulle teen jou?” ⁶¹ Maar hy het stilgebly en hoegenaamd geen antwoord gegee nie. Weer het die hoëpriester hom begin ondervra en vir hom gesê: “Is jy die Christus, die Seun van die Geseënde?” ⁶² Toe het Jesus gesê: “Ek is; en julle sal die Seun van die mens aan die regterhand van krag sien sit en met die wolke van die hemel sien kom.”

jy-E 287 ¶4

Jesus word na Annas en dan na Kajafas geneem

Kajafas weet hoe sensitief die Jode daaroor is as enigiemand beweer dat hy die Seun van God is. Vroeër, toe Jesus gesê het dat God sy Vader is, wou die Jode hom doodmaak omdat hy hom, volgens hulle, “aan God gelykgemaak het (Johannes 5:17, 18; 10:31-39). Kajafas, wat geweet het hoe die Jode hieroor voel, beveel Jesus nou op ’n slinkse manier: “Ek stel jou onder eed by die lewende God om vir ons te sê of jy die Christus, die Seun van God, is!” (Matteus 26:63). Jesus het natuurlik bekend gemaak dat hy die Seun van God is (Johannes 3:18; 5:25; 11:4). As hy dit nou nie sou doen nie, kon daar gesê word dat hy ontken dat hy God se Seun en die Christus is. Daarom sê Jesus: “Ek is; en julle sal die Seun van die mens aan die regterhand van krag sien sit en met die wolke van die hemel sien kom.” — Markus 14:62.