Verwysings vir die Lewe en Bediening-vergaderingwerkboek
6-12 AUGUSTUS
SKATTE UIT GOD SE WOORD | LUKAS 17-18
“Wys dat jy dankbaar is”
(Lukas 17:11-14) En terwyl hy na Jerusalem gegaan het, het hy deur Samariʹa en Galileʹa gereis. 12 En toe hy in ’n sekere dorpie ingaan, het tien melaatse manne hom tegemoetgekom, maar hulle het ver weg bly staan. 13 En hulle het hulle stem verhef en gesê: “Jesus, Onderrigter, wees ons barmhartig!” 14 En toe hy hulle sien, het hy vir hulle gesê: “Gaan wys julle vir die priesters.” En terwyl hulle weggegaan het, het hulle reiniging plaasgevind.
Studienotas oor Lu 17:12, 14 in nwtsty
tien melaatse manne: In Bybeltye was melaatses gewoonlik altyd in groepe bymekaar of het hulle in groepe saam gebly sodat hulle mekaar kon help (2Kn 7:3-5). Volgens God se Wet mag melaatses nie saam met ander gebly het nie. Wanneer ’n melaatse nadergekom het, moes hy ander ook waarsku deur uit te roep: “Onrein, onrein!’” (Le 13:45, 46). In ooreenstemming met wat die Wet voorgeskryf het, het die melaatses ver weg van Jesus af gestaan. — Sien studienota oor Mt 8:2 en Woordelys in die New World Translation, “Leprosy; Leper”.
gaan wys julle vir die priesters: Omdat Jesus Christus self onder die Wet was toe hy op die aarde was, het hy die Aäronitiese priesterskap erken en het hy die melaatses wat hy gesond gemaak het na die priesters toe gestuur (Mt 8:4; Mr 1:44). Volgens die Mosaïese Wet moes ’n priester bevestig dat ’n melaatse gesond gemaak is. Die melaatse wat gesond gemaak is, het dan na die tempel toe gekom en twee lewende rein voëls, sederhout, karmosynrooi stof en hisop as ’n offerande, of gawe, gebring. — Le 14:2-32.
Soek na geestelike skatte
(Lukas 17:7-10) “Wie van julle wat ’n slaaf het wat ploeg of die kudde oppas, sal, wanneer hy van die land af inkom, vir hom sê: ‘Kom dadelik hier aan tafel’? 8 Sal hy nie eerder vir hom sê nie: ‘Maak iets vir my aandete gereed, en sit ’n voorskoot aan en bedien my totdat ek klaar geëet en gedrink het, en agterna kan jy eet en drink’? 9 Hy sal tog nie dankbaar wees teenoor die slaaf omdat hy die dinge gedoen het wat aan hom opgedra is nie, of hoe? 10 So ook moet julle, wanneer julle alles gedoen het wat aan julle opgedra is, sê: ‘Ons is nikswerd slawe. Wat ons gedoen het, is wat ons behoort te gedoen het.’”
Studienota oor Lu 17:10 in nwtsty
nikswerd: Lett. “nutteloos; waardeloos”. Deur hierdie illustrasie het Jesus nie bedoel dat die slawe, sy dissipels, moes dink dat hulle niks werd of waardeloos is nie. Volgens die konteks beteken “nikswerd” dat die slawe beskeie moes wees en nie moes dink dat hulle spesiale eer verdien nie. Party geleerdes meen dat die woord, soos dit hier gebruik word, net ’n oordrywing is wat beteken: “Ons is net slawe wat nie spesiale aandag verdien nie.”
(Lukas 18:8) Ek sê vir julle: Hy sal gou reg aan hulle laat geskied. Maar sal die Seun van die mens werklik die geloof op die aarde vind wanneer hy kom?”
Studienota oor Lu 18:8 in nwtsty
die geloof: Of, “hierdie soort geloof”. Die gebruik van die Griekse bepalende lidwoord voor die woord “geloof” wys dat Jesus nie van geloof oor die algemeen gepraat het nie, maar van ’n spesifieke soort geloof, soos die geloof van die weduwee in sy illustrasie (Lu 18:1-8). Dit sou beteken dat ’n mens moet glo dat gebed krag het en dat God sal sorg dat sy uitverkorenes regverdig behandel sal word. Jesus het hierdie vraag oor geloof waarskynlik nie beantwoord nie sodat sy dissipels kon nadink oor die gehalte van hulle eie geloof. Die illustrasie oor gebed en geloof was veral gepas omdat Jesus kort tevore vir sy dissipels vertel het van die toetse wat hulle sou deurmaak. — Lu 17:22-37.
13-19 AUGUSTUS
SKATTE UIT GOD SE WOORD | LUKAS 19-20
“Leer uit die illustrasie van die tien minas”
(Lukas 19:12, 13) Daarom het hy gesê: “’n Sekere man van adellike geboorte het na ’n ver land gereis om vir homself koninklike mag te verkry en terug te keer. 13 Hy het tien van sy slawe geroep, hulle tien minas gegee en vir hulle gesê: ‘Dryf handel totdat ek kom.’
jy-E 232 ¶2-4
Sy illustrasie oor die tien minas
Hy sê: “’n Sekere man van adellike geboorte het na ’n ver land gereis om vir homself koninklike mag te verkry en terug te keer” (Lukas 19:12). ’n Reis soos hierdie sou lank neem. Dit is duidelik dat Jesus die “man van adellike geboorte” is, wat reis na ’n “ver land”, na die hemel, waar sy Vader hom koninklike mag sal gee.
Voordat die “man van adellike geboorte” in die illustrasie weggaan, roep hy die tien slawe en gee vir hulle elkeen ’n silwer mina, en sê vir hulle: “Dryf handel totdat ek kom” (Lukas 19:13). Letterlike silwer minas is muntstukke van groot waarde. ’n Mina se waarde is gelyk aan die betaling wat ’n landbouwerker in meer as drie maande verdien.
Die dissipels kan agterkom dat hulle soos die tien slawe in die illustrasie is omdat Jesus hulle al voorheen met werkers in ’n oes vergelyk het (Matteus 9:35-38). Hy het hulle natuurlik nie gevra om graan te oes nie, maar die oes het eerder bestaan uit ander dissipels wat ’n plek in God se Koninkryk kan kry. Die dissipels gebruik alles wat hulle het om meer erfgename van die Koninkryk in te samel.
(Lukas 19:16-19) Toe het die eerste vorentoe gekom en gesê: ‘Heer, u mina het tien minas opgelewer.’ 17 En hy het vir hom gesê: ‘Mooi so, goeie slaaf! Omdat jy in ’n baie klein saak getrou was, moet jy gesag voer oor tien stede.’ 18 En die tweede het gekom en gesê: ‘U mina, Heer, het vyf minas opgelewer.’ 19 Hy het ook vir hierdie een gesê: ‘En jy moet beheer uitoefen oor vyf stede.’
jy-E 232 ¶7
Sy illustrasie oor die tien minas
As die dissipels besef dat hulle soos die slawe is wat alles wat hulle het ten volle gebruik om meer dissipels te maak, kan hulle daarvan seker wees dat dit Jesus sal bly maak. En hulle kan die vertroue hê dat hy hulle ywer sal beloon. Al Jesus se dissipels het natuurlik nie dieselfde omstandighede, geleenthede of vermoëns nie. Nogtans sal Jesus, wat “koninklike mag” ontvang, hulle getroue pogings in die dissipelmaakwerk raaksien en seën. — Matteus 28:19, 20.
(Lukas 19:20-24) Maar ’n ander een het gekom en gesê: ‘Heer, hier is u mina, wat ek in ’n doek weggebêre het. 21 U sien, ek het u gevrees, omdat u ’n harde man is; u eis op wat u nie gedeponeer het nie en u oes wat u nie gesaai het nie.’ 22 Hy het vir hom gesê: ‘Uit jou eie mond oordeel ek jou, goddelose slaaf. Jy het dus tog geweet dat ek ’n harde man is wat opeis wat ek nie gedeponeer het nie en oes wat ek nie gesaai het nie? 23 Waarom het jy dan nie my silwergeld in ’n bank gesit nie? Dan sou ek dit by my aankoms met rente ingevorder het.’ 24 “Daarop het hy vir dié wat daar gestaan het, gesê: ‘Neem die mina van hom af weg en gee dit vir hom wat die tien minas het.’
jy-E 233 ¶1
Sy illustrasie oor die tien minas
Omdat die slaaf niks gedoen het om die rykdom van sy heer se koninkryk te vermeerder nie, verloor hy iets. Die apostels weet dat Jesus in God se Koninkryk gaan regeer. Jesus se woorde oor hierdie laaste slaaf laat hulle waarskynlik besef dat hulle nie ’n plek in daardie Koninkryk sal hê as hulle nie ywerig is nie.
Soek na geestelike skatte
(Lukas 19:43) Want die dae sal oor jou kom wanneer jou vyande ’n verskansing met spits pale rondom jou sal bou en jou sal omsingel en jou van alle kante in benoudheid sal bring,
Studienota oor Lu 19:43 in nwtsty
verskansing met spits pale: Of, “palissade”. Dit is die enigste keer dat die Griekse woord khaʹrax in die Christelike Griekse Geskrifte verskyn. Dit is al beskryf as ’n “stok of balk met ’n skerp punt wat gebruik word om iets toe te kamp; ’n paal” en ook as ’n “militêre kamp wat met pale gemaak word; palissade”. Jesus se woorde het waar geword in 70 HJ toe die Romeine, onder bevel van Titus, ’n beleëringsmuur, of palissade, rondom Jerusalem gebou het. Titus wou drie dinge hiermee bereik — hy wou keer dat die Jode vlug, hy wou hulle sover kry om oor te gee en hy wou die inwoners laat honger ly om hulle te dwing om onderdanig te wees. Die Romeinse soldate het amper al die bome in die omgewing om die stad afgekap sodat hulle hierdie kamp om Jerusalem kon bou.
(Lukas 20:38) Hy is ’n God, nie van die dooies nie, maar van die lewendes, want vir hom lewe hulle almal.”
Studienota oor Lu 20:38 in nwtsty
want vir hom lewe hulle almal: Of, “in sy oë is hulle almal lewend”. Die Bybel wys dat diegene wat lewe, maar wat van God vervreemd is, dood is in Sy oë (Ef 2:1; 1Ti 5:6). Net so is goedgekeurde knegte van God wat sterf nog steeds lewend in Jehovah se oë, want sy voorneme om hulle op te wek sal beslis waar word. — Ro 4:16, 17.
20-26 AUGUSTUS
SKATTE UIT GOD SE WOORD | LUKAS 21-22
Soek na geestelike skatte
(Lukas 21:33) Hemel en aarde sal verbygaan, maar my woorde sal hoegenaamd nie verbygaan nie.
Studienotas oor Lu 21:33 in nwtsty
Hemel en aarde sal verbygaan: Ander verse wys dat die hemel en die aarde tot onbepaalde tyd sal bly staan (Ge 9:16; Ps 104:5; Pr 1:4). ’n Mens kan sê dat Jesus hier ’n hiperbool, of oordrywing, gebruik het. Jesus het bedoel dat sy woorde vervul sal word, al gaan die hemel en die aarde verby — iets wat onmoontlik is. (Vergelyk Mt 5:18.) Maar die hemel en die aarde kan hier net sowel verwys na die figuurlike hemele en aarde wat in Op 21:1 “die vorige hemel en die vorige aarde” genoem word.
my woorde sal hoegenaamd nie verbygaan nie: Of, “my woorde sal beslis nie verbygaan nie”. Die feit dat die Grieks die woorde “hoegenaamd nie” gebruik, beklemtoon dat iets nie sal gebeur nie. Jesus se woorde sal dus nooit verbygaan nie.
27 AUGUSTUS – 2 SEPTEMBER
SKATTE UIT GOD SE WOORD | LUKAS 23-24
Soek na geestelike skatte
(Lukas 23:31) Want as hulle hierdie dinge doen wanneer die boom vogtig is, wat sal gebeur wanneer hy verdor is?”
Studienota oor Lu 23:31 in nwtsty
wanneer die boom vogtig is . . . wanneer hy verdor is: Jesus praat waarskynlik hier van die Joodse nasie. Die nasie was soos ’n boom wat besig was om dood te gaan, maar wat nog ’n bietjie vog oorgehad het, want Jesus was nog daar, asook ’n hele paar Jode wat in hom geglo het. Maar Jesus sou binnekort tereggestel word, en die getroue Jode sou met heilige gees gesalf en deel van geestelike Israel word (Ro 2:28, 29; Ga 6:16). Die letterlike nasie Israel sou dan geestelik dood wees, net soos ’n verdorde boom. — Mt 21:43.
(Lukas 23:33) En toe hulle by die plek kom wat Skedel genoem word, het hulle hom en die kwaaddoeners daar aan pale gehang, een aan sy regter- en een aan sy linkerkant.
Media in nwtsty
Spyker in ’n hakskeenbeen
Hierdie foto wys ’n replika van ’n ysterspyker van 11,5 cm wat deur ’n mens se hakskeenbeen geslaan is. Die oorspronklike hakskeenbeen is in 1968 tydens uitgrawings in Noord-Jerusalem gevind, en dit kom uit die tyd van die Romeine. Dit bewys dat spykers heel moontlik in die ou tyd gebruik is om iemand aan ’n houtpaal te hang wanneer hy tereggestel is. Toe die Romeinse soldate Jesus Christus aan die paal gehang het, het hulle dalk dieselfde soort spykers gebruik. Hierdie hakskeenbeen is in ’n klipkissie, wat ’n ossuarium genoem word, gevind. Wanneer die dooie persoon heeltemal ontbind het, is die droë bene in so ’n klipkissie gebêre. Dit wys dat iemand wat aan ’n paal gesterf het, wel begrawe kon word.