Hoe jy in ’n nuwe wêreld kan lewe

Die vorige artikels het gewys dat God binnekort ’n einde aan hierdie goddelose mensegemeenskap – met al sy probleme – sal maak. Ons kan seker wees dat dit sal gebeur. Hoekom? Want God se Woord, die Bybel, het belowe:

“Die wêreld . . . gaan verby.” – 1 JOHANNES 2:17.

Ons kan seker wees dat daar oorlewendes sal wees omdat die Bybelvers hierbo ook belowe:

“Die een wat die wil van God doen, bly vir ewig.”

Daarom is die sleutel tot oorlewing om God se wil te doen. Om uit te vind wat God se wil is, moet ons hom eers leer ken.

OORLEEF DIE EINDE DEUR GOD TE “LEER KEN”

Collage: 1. ’n Verpleegster in ’n hospitaal sit op die grond, uitgeput en oorweldig. 2. Sy vat ’n breek in die eetsaal en sien een van haar werksmaats lees ’n tydskrif. 3. Die werksmaat lees ’n Bybelvers vir haar en gee haar ’n jw.org-kontakkaartjie.

Jesus het gesê: “Om die ewige lewe te ontvang, moet hulle u leer ken, die enigste ware God” (Johannes 17:3). Om die einde te oorleef en vir ewig te lewe, moet ons God “leer ken”. Dit beteken meer as om net te erken dat God bestaan of om ’n paar feite oor hom te ken. Ons moet vriende met hom wees. As ons wil hê dat ’n vriendskap sterk moet word, moet ons tyd met ons vriende spandeer. Dit geld ook vir ’n vriendskap met God. Kyk na ’n paar belangrike waarhede wat ons uit die Bybel leer wat ons help om ’n vriendskap met God te ontwikkel en te behou.

Waarhede wat ons uit die Bybel leer

Ons leer dat God wou hê dat ons in die Paradys moes lewe.

Hy het die eerste mense, Adam en Eva, geskep en hulle in ’n pragtige plek met die naam die tuin van Eden gesit. Hulle was volmaak, en God het hulle alles gegee wat hulle nodig gehad het om ’n gelukkige lewe te geniet. Hulle kon vir ewig gelewe het. Solank as wat hulle vriende met God gebly het, sou hulle nooit sterf nie. Maar hulle het besluit om ongehoorsaam te wees aan ’n eenvoudige bevel wat God aan hulle gegee het.

Ons leer hoekom ons nou swaarkry.

Die eerste man, Adam, was ongehoorsaam aan God en het die geleentheid om vir ewig te lewe vir homself en die res van die mensdom verloor. Die Bybel verduidelik: “Sonde het . . . deur een mens in die wêreld ingekom en die dood deur die sonde, en die dood het so na alle mense versprei omdat hulle almal gesondig het” (Romeine 5:12). Net soos ’n persoon dalk ’n gebrek by sy ouers oorgeërf het, het al Adam se kinders onvolmaaktheid by hom oorgeërf. As gevolg hiervan word ons oud en sterf ons.

Ons leer wat God alreeds gedoen het om ons te help.

Die Bybel sê: “God het die wêreld so liefgehad dat hy sy eniggebore Seun gegee het, sodat elkeen wat geloof in hom beoefen, nie vernietig sal word nie, maar die ewige lewe kan hê” (Johannes 3:16). God het Jesus na die aarde toe gestuur om sy lewe vir ons te gee. ’n Indiese man met die naam Prabhakar wat 86 jaar oud is, sê oor hierdie daad van liefde: “Dit wys Jehovaha se intense liefde vir my. Sy liefde het my die hoop op ewige lewe gegee.”

Ons leer hoe ons waardering kan wys vir wat God vir ons gedoen het.

Die Bybel sê dat ons ons waardering kan wys vir wat God vir ons gedoen het deur “sy gebooie te gehoorsaam” (1 Johannes 2:3). Jehovah God wys liefdevol vir ons wat ons kan doen om die lewe nou te geniet (Jesaja 48:17, 18, voetnoot). God wil nie hê dat ons moet swaarkry nie. Hy belowe dat ons nie net nou ’n gelukkige lewe sal hê nie, maar ook die geleentheid sal hê om vir ewig te lewe as ons sy leiding volg.

LEES GOD SE WOORD, DIE BYBEL, ELKE DAG

Die verpleegster kyk op na die hemel nadat sy die Bybel gelees het gedurende haar middagete buite. — Jy kan die einde van die wêreld oorleef deur vir God se hulp te bid en sy wil te doen

Ons eet gereeld kos om aan die lewe te bly. Maar Jesus het gesê: “Die mens moenie van brood alleen lewe nie, maar van elke woord wat uit Jehovah se mond kom.” – Matteus 4:4.

Vandag vind ons Jehovah se woorde in die bladsye van die Bybel. Terwyl jy daardie heilige boek studeer, sal jy belangrike waarhede leer oor wat God in die verlede gedoen het, wat hy nou doen en wat hy in die toekoms sal doen.

BID TOT GOD VIR HULP

Wat kan jy doen as jy gehoorsaam aan God wil wees, maar dit moeilik vind om op te hou om dinge te doen wat hy sê verkeerd is? As dit die geval is, kan dit jou op ’n spesiale manier help as jy God leer ken.

Kyk na die voorbeeld van ’n vrou wat ons Sakura sal noem, wat ’n onsedelike lewe gehad het. Toe sy die Bybel begin studeer het, het sy oor God se bevel geleer om te “vlug vir seksuele onsedelikheid” (1 Korintiërs 6:18). Sakura het tot God vir krag gebid en kon ophou met hierdie slegte gewoonte. Maar sy moet nog steeds teen versoekings stry. Sy sê: “As onsedelike gedagtes by my opkom, praat ek eerlik met Jehovah in gebed omdat ek weet dat ek nie op my eie daarteen kan stry nie. Die krag van gebed het my nader aan Jehovah laat kom.” Soos Sakura, het miljoene mense God leer ken. Hy gee vir hulle die krag wat hulle nodig het om hulle lewe te verander en op ’n manier te lewe wat hom gelukkig maak. – Filippense 4:13.

Hoe beter jy God leer ken, hoe meer sal jy “deur God geken” word as ’n kosbare vriend (Galasiërs 4:9; Psalm 25:14). Dan sal jy die einde kan oorleef en in God se nuwe wêreld kan lewe. Maar hoe sal daardie nuwe wêreld wees? Die volgende artikel sal verduidelik.

a Volgens die Bybel is God se naam Jehovah.