’n Brief van die Bestuursliggaam
Liewe Mede-Getuies van Jehovah
Die apostel Paulus het elke geleentheid aangegryp om sy liefde en waardering vir sy medegelowiges uit te spreek. Hy het aan Christene in Rome geskryf: “Ek [dank] my God deur Jesus Christus oor julle almal, omdat daar in die hele wêreld oor julle geloof gepraat word” (Rom. 1:8). Ja, daardie eerste-eeuse Christene was oor die hele Romeinse Ryk heen bekend vir hulle sterk geloof sowel as vir hulle ywerige predikingswerk (1 Tess. 1:8). Dit is geen wonder dat Paulus sulke innige geneentheid vir sy broers gehad het nie!
Soos Paulus dank ons Jehovah elke keer as ons aan julle dink. Ons het julle almal baie lief! En julle kan seker wees dat Jehovah elkeen van julle liefhet. Party van julle ondervind hewige teenstand, maar julle hou eenvoudig aan om te preek. Hoe bly moet julle moedige en onverskrokke gees Jehovah se hart tog maak!—Spr. 27:11.
Terwyl julle “Die bedrywighede van Jehovah se Getuies in hedendaagse tye” in hierdie opwindende en geloofversterkende uitgawe van die Jaarboek noukeurig lees en daaroor peins, sal julle oorvloedige bewyse sien dat die Here Jesus Christus uitgegaan het en besig is “om te oorwin en om sy oorwinning te voltooi” en dat geen wapen wat teen die volgelinge van Christus gesmee word, enige sukses sal hê nie.—Op. 6:2; Jes. 54:17.
Paulus het aan die Christene in Filippi geskryf: “Ek dank my God . . . weens julle bydrae ten behoewe van die goeie nuus” (Fil. 1:3-5). Ons as lede van die Bestuursliggaam voel net so oor julle. Gedurende die 2007-diensjaar het 6 691 790 verkondigers altesaam 1 431 761 554 uur daaraan bestee om die goeie nuus in 236 lande regoor die aarde te verkondig. Wat ’n ontsaglike bydrae lewer julle tog ter bevordering van die goeie nuus! Dink aan die honderdduisende lewens wat deur ons gesamentlike pogings geraak is, alles tot lof van Jehovah!
By ’n ander geleentheid het Paulus getoon dat hy groot empatie met sy broers het. Hy het aan dié in Tessalonika geskryf: “Ons dink onophoudelik aan . . . julle volharding weens julle hoop op ons Here Jesus Christus voor ons God en Vader” (1 Tess. 1:2, 3). Ja, die lewe is nie sonder uitdagings nie. Probleme ontstaan, maar dit is noodsaaklik dat ons volhard. Watter uitdagings ondervind jy? Is jy gefrustreerd omdat jy weens ’n ernstige siekte nou baie min in Jehovah se diens kan doen? Het jou geliefde en jarelange huweliksmaat ’n slagoffer geword van daardie absoluut onversadigbare vyand, Sjeool? (Spr. 30:15, 16). Soek jy skynbaar tevergeefs na ’n huweliksmaat wat ook vir Jehovah lief is, terwyl jy getrou die skriftuurlike raad volg om net in die Here te trou? (1 Kor. 7:39). Probeer jy jou kinders te midde van uiters moeilike ekonomiese toestande grootmaak? Wat jou situasie ook al is, as jy Koninkryksbelange eerste stel, kan jy seker wees dat Jehovah nie ‘jou werk sal vergeet en die liefde wat jy vir sy naam getoon het nie’. Broers en susters, moet asseblief “nie ophou om te doen wat goed is nie”!—Heb. 6:10; Gal. 6:9.
Wat sal julle in staat stel om te volhard? Die “hoop op ons Here Jesus Christus”, soos dit die geval was met die Tessalonisense. Paulus het later tereg “die hoop op redding” met ’n sterk helm vergelyk wat ’n Christen teen negatiewe denke en knaende twyfelgedagtes kan beskerm.—1 Tess. 5:8.
Deur vreugdevol te volhard, voorsien julle inderdaad ’n antwoord op Satan se uittartings in die groot geskil oor universele soewereiniteit. Satan beweer dat knegte van God inherent selfsugtig is en dat hulle, hoewel hulle miskien gewillig is om God vir ’n beperkte tyd te dien, traag sal word in hulle aanbidding as beproewinge toeneem of as die stelsel van dinge langer voortduur as wat hulle verwag het. Julle het die voorreg om te bewys dat die Duiwel inderdaad ’n gemene leuenaar is! Elke dag van julle lewe bring julle nader aan die verwesenliking van julle hoop.
Net soos Paulus geleenthede verwelkom het om sy broers te prys vir hulle kragtige geloof, hulle groot bydrae tot die predikingswerk asook hulle volharding, verwelkom ons hierdie geleentheid om julle te prys en om ons liefde vir julle te bevestig. Hou aan met die goeie werk!
Mag die komende jaar vol ryk geestelike seëninge wees. Ons wens julle alles van die beste toe.
Julle broers
Bestuursliggaam van Jehovah se Getuies