Laat God se “onbeskryflike vrye gawe” jou beweeg

1, 2. (a) Wat sluit God se “onbeskryflike vrye gawe” in? (b) Watter vrae sal ons in hierdie artikel bespreek?

JEHOVAH het die allergrootste blyk van liefde aan ons betoon toe hy sy kosbare Seun, Jesus, na die aarde gestuur het! (Johannes 3:16; 1 Johannes 4:9, 10). Die apostel Paulus het dit ’n “onbeskryflike vrye gawe” genoem (2 Korintiërs 9:15). Waarom het Paulus hierdie uitdrukking gebruik?

² Paulus het geweet dat Jesus se offerande ons daarvan verseker dat al God se wonderlike beloftes bewaarheid sal word. (Lees 2 Korintiërs 1:20.) Dit beteken dat God se “onbeskryflike vrye gawe” Jesus se offerande insluit, sowel as al die goedheid en lojale liefde wat Jehovah aan ons betoon. Dit is onmoontlik om so ’n kosbare gawe te beskryf op ’n manier wat ons ten volle kan verstaan. Hoe moet hierdie spesiale gawe ons laat voel? En wat moet hierdie gawe ons beweeg om te doen terwyl ons voorberei vir die Herdenking van Christus se dood op Woensdag 23 Maart 2016?

GOD SE SPESIALE GAWE

3, 4. (a) Hoe voel jy wanneer iemand vir jou ’n geskenk gee? (b) Watter uitwerking kan ’n spesiale geskenk op jou lewe hê?

³ Ons hou daarvan wanneer iemand vir ons ’n geskenk gee. Maar sommige geskenke beteken so baie vir ons of is so spesiaal dat dit ons lewe kan verander. Gestel jy was by ’n misdaad betrokke. Die straf vir daardie misdaad is die dood. Maar dan bied ’n vreemdeling aan om die straf namens jou te ontvang. Hy is bereid om in jou plek te sterf! Hoe sou so ’n spesiale geskenk jou laat voel?

⁴ So ’n liefdevolle en spesiale geskenk sou jou beweeg om veranderinge in jou lewe aan te bring. Dit sou jou waarskynlik ook beweeg om vrygewiger en liefdevoller teenoor ander te wees en om enigiemand te vergewe wat jou te na gekom het. Jy sou vir die res van jou lewe wou toon dat jy dankbaar is vir daardie opoffering.

5. In watter opsig is God se gawe van die losprys veel groter as enige ander geskenk?

⁵ God se gawe van die losprys is veel groter as die geskenk in die voorbeeld wat genoem is (1 Petrus 3:18). Dink hieraan: Ons het almal sonde van Adam geërf, en die straf vir sonde is die dood (Romeine 5:12). Liefde het Jehovah beweeg om Jesus na die aarde te stuur om vir alle mense te sterf, om “vir elke mens die dood [te] smaak” (Hebreërs 2:9). Maar Jesus se offerande sal selfs meer doen! Dit sal die dood vir ewig vernietig (Jesaja 25:7, 8; 1 Korintiërs 15:22, 26). Almal wat geloof in Jesus beoefen, sal in vrede lewe en vir ewig gelukkig wees, hetsy as konings saam met Christus in die hemel of as onderdane van God se Koninkryk op die aarde (Romeine 6:23; Openbaring 5:9, 10). Watter ander seëninge hou Jehovah se gawe vir ons in?

6. (a) Na watter seëninge wat deur Jehovah se gawe moontlik gemaak word, sien jy uit? (b) Noem drie dinge wat God se gawe ons sal beweeg om te doen.

⁶ God se gawe sluit ook in dat die aarde ’n paradys sal word, die siekes genees sal word en die dooies opgewek sal word (Jesaja 33:24; 35:5, 6; Johannes 5:28, 29). Ons is lief vir Jehovah en sy geliefde Seun omdat hulle hierdie “onbeskryflike vrye gawe” aan ons gegee het. Wat sal hierdie gawe ons beweeg om te doen? Dit sal ons beweeg (1) om Christus Jesus noukeurig na te volg, (2) om ons broers lief te hê en (3) om ander uit die hart te vergewe.

“DIE LIEFDE WAT DIE CHRISTUS HET, DRING ONS”

7, 8. Hoe moet ons oor Christus se liefde voel, en wat moet dit ons beweeg om te doen?

⁷ Eerstens moet ons voel dat ons graag ons lewe wil gebruik om Jesus te eer. Die apostel Paulus het gesê: “Die liefde wat die Christus het, dring ons.” (Lees 2 Korintiërs 5:14, 15.) Paulus het geweet dat ons gedring, of beweeg, sal word om Jesus lief te hê en te eer as ons Jesus se groot liefde aanvaar. As ons ten volle verstaan wat Jehovah vir ons gedoen het, sal sy liefde ons beweeg om op ’n manier te lewe wat toon dat ons Jesus eer. Hoe doen ons dit?

⁸ Liefde vir Jehovah sal ons beweeg om Jesus se voetstappe noukeurig te volg (1 Petrus 2:21; 1 Johannes 2:6). Wanneer ons God en Christus gehoorsaam, bewys ons dat ons hulle liefhet. Jesus het gesê: “Hy wat my gebooie het en hulle bewaar, dit is hy wat my liefhet. En hy wat my liefhet, hóm sal my Vader liefhê, en ek sal hom liefhê en my duidelik aan hom toon.”​—Johannes 14:21; 1 Johannes 5:3.

9. Voor watter druk kom ons te staan?

⁹ Dit is goed om gedurende hierdie Gedenkmaalseisoen na te dink oor hoe ons ons lewe gebruik. Vra jou dus af: ‘Op watter gebiede volg ek Jesus reeds na? Op watter gebiede kan ek verbeter?’ Dit is belangrik dat ons ons hierdie vrae moet afvra, want die wêreld wil hê dat ons soos hulle moet lewe (Romeine 12:2). As ons nie versigtig is nie, kan ons voel dat ons die wêreld se filosowe, beroemdes en sporthelde moet begin navolg (Kolossense 2:8; 1 Johannes 2:15-17). Hoe kan ons hierdie druk weerstaan?

10. Watter vrae kan ons ons gedurende hierdie Gedenkmaalseisoen afvra, en wat kan die antwoorde ons beweeg om te doen? (Sien prent aan begin van artikel.)

¹⁰ Dit is goed om gedurende die Gedenkmaalseisoen tyd te neem om deur ons klere, rolprente en musiek te gaan en om te kyk wat op ons rekenaar, selfoon of tablet is. Vra jou af: ‘Sou ek skaam kry as Jesus hier was en gesien het watter klere ek dra?’ (Lees 1 Timoteus 2:9, 10.) ‘Toon my klere dat ek ’n volgeling van Christus is? Sou Jesus na my rolprente wou kyk? Sou hy na my musiek luister? Sou ek skaam kry oor wat Jesus op my selfoon of tablet sou sien as hy dit sou leen? Sou dit moeilik wees om vir Jesus te verduidelik waarom ek dit geniet om sekere videospeletjies te speel?’ Ons liefde vir Jehovah moet ons beweeg om ontslae te raak van enigiets wat nie vir ’n Christen gepas is nie, ongeag hoe duur dit was (Handelinge 19:19, 20). Toe ons ons lewe aan Jehovah toegewy het, het ons belowe om ons lewe te gebruik om Christus te eer. Ons moet dus nie aan enigiets vashou wat dit vir ons moeilik kan maak om Jesus na te volg nie.​—Matteus 5:29, 30; Filippense 4:8.

11. (a) Wat sal ons liefde vir Jehovah en Jesus ons beweeg om te doen wanneer dit kom by die predikingswerk? (b) Hoe kan ons liefde ons beweeg om ander in die gemeente te help?

¹¹ Ons liefde vir Jesus beweeg ons om ywerig te preek en te onderrig (Matteus 28:19, 20; Lukas 4:43). Kan jy reël om gedurende die Gedenkmaalseisoen hulppionierdiens te doen en 30 of 50 uur in die predikingswerk deur te bring? ’n Vier-en-tagtigjarige wewenaar het gedink dat hy weens sy ouderdom en swak gesondheid nie kon pionier nie. Maar die pioniers in sy gebied wou hom help. Hulle het hom gehelp met vervoer en het geskikte gebied gekies waar hy kon werk. Gevolglik het die broer sy doelwit van 30 uur bereik. Kan jy iemand in jou gemeente help om in Maart of April hulppionierdiens te doen? Ons kan natuurlik nie almal pionier nie, maar ons kan ons tyd en energie gebruik om meer in Jehovah se diens te doen. As ons dit doen, sal ons toon dat ons, soos Paulus, deur Jesus se liefde gemotiveer word. Wat anders sal God se liefde ons beweeg om te doen?

ONS IS VERPLIG OM MEKAAR LIEF TE HÊ

12. Wat beweeg God se liefde ons om te doen?

¹² Tweedens moet God se liefde ons beweeg om ons broers lief te hê. Die apostel Johannes het geskryf: “Geliefdes, as dit is hoe God ons liefgehad het, dan staan ons ook onder verpligting om mekaar lief te hê” (1 Johannes 4:7-11). As ons God se liefde aanvaar, moet ons dus ons broers liefhê (1 Johannes 3:16). Hoe kan ons toon dat ons hulle liefhet?

13. Hoe het Jesus getoon dat hy ander liefhet?

¹³ Dink aan die voorbeeld wat Jesus gestel het. Toe hy op die aarde was, het hy mense gehelp, veral die nederiges. Hy het die siekes, kreupeles, blindes, dowes en stommes genees (Matteus 11:4, 5). Anders as die godsdiensleiers het Jesus dit geniet om mense te onderrig wat van God wou leer (Johannes 7:49). Hy was lief vir hierdie nederige mense en het hard gewerk om hulle te help.​—Matteus 20:28.

14. Hoe kan jy toon dat jy jou broers liefhet?

¹⁴ Die Gedenkmaalseisoen is ook ’n goeie tyd om te dink aan hoe jy die broers en susters in jou gemeente kan help, veral dié wat bejaard is. Kan jy hierdie dierbare broers en susters besoek? Kan jy vir hulle ’n ete neem, hulle met huishoudelike takies help, aanbied om hulle na die vergadering te neem of hulle nooi om saam met jou in die bediening te werk? (Lees Lukas 14:12-14.) Laat God se liefde jou beweeg om liefde vir jou broers te toon!

BEWYS BARMHARTIGHEID AAN ONS BROERS EN SUSTERS

15. Wat moet ons erken?

¹⁵ Derdens moet Jehovah se liefde ons beweeg om ons broers en susters te vergewe. Omdat ons almal sonde en die dood van Adam geërf het, kan niemand sê: “Ek het nie die losprys nodig nie.” Selfs die getrouste kneg van God het die gawe van die losprys nodig. Elkeen van ons is ’n groot skuld vergewe! Waarom is dit belangrik om dit te erken? Ons vind die antwoord in een van Jesus se illustrasies.

16, 17. (a) Wat moet ons leer uit Jesus se illustrasie van die koning en die slawe? (b) Wat is jy vasbeslote om te doen nadat jy oor Jesus se illustrasie nagedink het?

¹⁶ Jesus het ’n illustrasie gegee van ’n koning wat sy slaaf ’n groot skuld van 60 000 000 denarii kwytgeskeld het. Maar later het daardie slaaf nie ’n medeslaaf ’n veel kleiner skuld van net 100 denarii kwytgeskeld nie. Die koning se barmhartigheid moes sy slaaf beweeg het om sy medeslaaf te vergewe. Die koning was woedend toe hy hoor dat sy slaaf nie so ’n klein skuld kwytgeskeld het nie. Hy het gesê: “Goddelose slaaf, ek het jou al daardie skuld kwytgeskeld toe jy my gesoebat het. Moes jy nie op jou beurt jou medeslaaf barmhartig gewees het soos ek jou ook barmhartig was nie?” (Matteus 18:23-35). Soos die koning het Jehovah ons ’n groot skuld vergewe, of kwytgeskeld. Wat moet Jehovah se liefde en barmhartigheid ons beweeg om te doen?

¹⁷ Gedurende die Gedenkmaalseisoen kan ons ons afvra: ‘Het ’n broer my seergemaak? Is dit vir my moeilik om hom te vergewe?’ Indien wel, is dit ’n goeie tyd om Jehovah na te volg, wat “vergewensgesind” is (Nehemia 9:17; Psalm 86:5). As ons Jehovah se groot barmhartigheid waardeer, sal ons barmhartigheid aan ander bewys en hulle uit die hart vergewe. As ons ons broers nie liefhet en vergewe nie, kan ons nie verwag dat Jehovah ons moet liefhê en vergewe nie (Matteus 6:14, 15). Wanneer ons ander vergewe, verander dit nie die feit dat hulle ons seergemaak het nie, maar dit sal ons help om ’n gelukkiger toekoms te hê.

18. Hoe het God se liefde ’n suster gehelp om die onvolmaakthede van ’n ander suster te verdra?

¹⁸ Dit kan moeilik wees om die onvolmaakthede van ons broers en susters te verdra. (Lees Efesiërs 4:32; Kolossense 3:13, 14.) Lily is ’n suster wat dit gedoen het.^[1] (Sien eindnota.) Sy het ’n weduwee met die naam Carol gehelp. Sy het Carol geneem waar sy ook al moes gaan, haar met die nodige inkopies gehelp en baie ander dinge vir haar gedoen. Ten spyte van alles wat Lily gedoen het, was Carol altyd krities en was dit soms nie maklik om haar te help nie. Maar Lily het op Carol se goeie eienskappe gekonsentreer en haar etlike jare lank gehelp totdat Carol baie siek geword en gesterf het. Al was dit vir Lily moeilik om Carol te help, sê sy: “Ek sien uit daarna om Carol in die opstanding te sien. Ek wil haar ken wanneer sy volmaak is.” Dit is duidelik dat God se liefde ons kan beweeg om ons broers en susters te verdra en om uit te sien na die tyd wanneer menslike onvolmaaktheid vir ewig uit die weg geruim sal wees.

19. Wat sal God se “onbeskryflike vrye gawe” jou beweeg om te doen?

¹⁹ Jehovah het waarlik vir ons ’n “onbeskryflike vrye gawe” gegee. Mag ons dit altyd waardeer! Die Gedenkmaalseisoen is ’n uitstekende tyd om na te dink oor alles wat Jehovah en Jesus vir ons gedoen het. Mag hulle liefde ons beweeg om Jesus noukeurig na te volg, liefde vir ons broers te toon en ons broers uit die hart te vergewe.