In die tronk weens hulle geloof – Suid-Korea
Op 26 Oktober 2020, vir die eerste keer in die geskiedenis, is dié in Suid-Korea wat gewetensbesware teen diensplig het die geleentheid gegee om alternatiewe burgerlike diens te doen. Maar menseregte-instansies het gesê dat Suid-Korea se alternatiewe burgerlike diens bestraffend en diskriminerend is, beide in tydsduur en erns. Die alternatiewe burgerlike diens van 36 maande is twee keer so lank as militêre diens, wat in stryd is met internasionale standaarde. Volgens hierdie standaarde moet alternatiewe burgerlike diens nie langer as een en ’n half keer die tydsduur van die diensplig wees nie, tensy daar redelike en objektiewe redes daarvoor is. ’n Paar Getuiemans in Suid-Korea het geweier om hierdie alternatiewe burgerlike diens te aanvaar. Party het klagtes by die howe ingedien. Op 30 Mei 2024 het Suid-Korea se konstitusionele hof alle klagtes teen alternatiewe burgerlike diens in ’n 5-teen-4 beslissing verwerp. Maar die hof het wel die bestraffende aard van die alternatiewe burgerlike diens uitgewys: “Sulke alternatiewe burgerlike diens is niks meer as ’n ander vorm van straf wat die gewetensvryheid van die gewetensbeswaardes skend nie.”
Woo-jin Bjeon, ’n 29-jarige getroude man, is die eerste gewetensbeswaarde in Suid-Korea wat in die tronk is omdat hy teen die alternatiewe burgerlike diens beswaar gemaak het. Hy het ’n persoonlike besluit gemaak om op ’n respekvolle manier te weier om alternatiewe burgerlike diens te doen. Al het hy gesê dat hy bereid is om alternatiewe burgerlike diens wat nie bestraffend is nie te doen indien dit beskikbaar word, het die hof hom, op 24 Julie 2024, ’n tronkvonnis van een jaar en ses maande gegee.
Sover het 14 Getuiemans beswaar gemaak teen die alternatiewe burgerlike diens, insluitende Mr. Bjeon, en 11 mans word op die oomblik verhoor. Afhangende van die uitslae van hulle verhore, kan hulle ook krimineel gestraf en tronk toe gestuur word. Intussen het die meerderheid van die gewetensbeswaardes besluit om alternatiewe burgerlike diens te doen ten spyte van die bestraffende aard daarvan.
Tydlyn
24 Julie 2024
Woo-jin Bjeon word tot 18 maande tronkstraf gevonnis omdat hy weier om alternatiewe burgerlike diens te doen.
10 November 2022
Nadat Woo-jin Bjeon ’n kennisgewing ontvang het wat hom vir militêre diens oproep, het hy ’n brief aan die Administrasiekantoor van Militêre Mannekrag gestuur waarin hy beswaar gemaak het teen diensplig sowel as alternatiewe burgerlike diens op grond van gewetensbeswaar.
26 Oktober 2020
Die regering van Suid-Korea stel alternatiewe burgerlike diens vir gewetensbeswaardes in.
1 November 2018
Die Hooggeregshof van Suid-Korea besluit in ’n 9-teen-4 beslissing dat weiering om diensplig te doen op grond van gewetensbeswaar nie ’n misdaad is nie.
28 Junie 2018
Suid-Korea se konstitusionele hof verklaar ’n gedeelte van die Dienspligwet ongrondwetlik omdat dit nie alternatiewe burgerlike diens vir gewetensbeswaardes voorsien nie.
18 Oktober 2016
Die Gwangjoe-appèlhof beslis vir die eerste keer dat drie gewetensbeswaardes wat teen die uitspraak geappelleer het, onskuldig is.
30 Augustus 2011
Die konstitusionele hof bevestig weer dat dit wettig is om gewetensbeswaardes te straf.
26 Augustus 2004
Die konstitusionele hof bevestig dat dit wettig is om gewetensbeswaardes te straf.
1975
Die regering begin militêre diens sonder keuse of uitsondering.
1973
Die regering begin om Getuies wat in die tronk is, te martel. Dit het aangehou tot omtrent 1995.
1953
Die regering sit die eerste Getuie wat ’n gewetensbeswaarde is, in die tronk.