Jongmense vra . . .

Wat van modelwerk en skoonheidswedstryde?

“TOE ons verlede jaar na New York gereis het”, het 12-jarige Amy gesê, “het ’n man wat ’n hotel het vir my ma gesê: ‘Jy moet jou dogter by ’n modelskool laat inskryf. . . . Sy is mooi.’”

’n Aantal aantreklike jongmense het soortgelyke ondervindings gehad. Vyftienjarige Racine het ’n oproep van ’n man gekry wat haar en haar jonger suster se belangstelling in ’n loopbaan as model probeer wek het. ’n Jong vrou in Suid-Afrika is gevra om aan ’n skoonheidswedstryd deel te neem. En dié winsgewende aanbiedinge is nie tot meisies beperk nie. Jong Jonathan is werk as ’n manlike model aangebied.

Ja, oral in die wêreld word jong mans, vroue en kinders van alle ouderdomme gewerf vir ’n loopbaan in modelwerk, vir skoonheidswedstryde en so meer.

Volgens berig word daar in die Verenigde State alleen elke jaar honderdduisende skoonheidswedstryde gehou. Wenners ontvang duisende rande in kontant, pryse en studiebeurse. Dit het vir ’n paar uitgesoektes wat ’n skoonheidswedstryd gewen het tot winsgewende vermaak en loopbane as modelle gelei.

’n Jong vrou meld: “My lewe lank wou ek ’n mannekyn wees—om klere vir plaaslike tydskrifte en modeparades te vertoon. Die betaling wissel van [R65] tot [R260] per uur.” Maar na bewering verdien party topmannekyne salarisse van tot R6 500 per dag! Geen wonder nie dat party jong Christene in die versoeking gekom het om voordeel te trek uit hulle skoonheid. Hoe sou jy reageer as jy so ’n vleiende kans gebied word?

Skoonheid kan voordelig wees

Daar is van die Joodse maagd Ester gesê dat sy “skoon van gestalte en mooi van aansien” was (Ester 2:7). Trouens, jy kan selfs sê dat sy onwillekeurig aan ’n soort skoonheidswedstryd deelgeneem het. Die omstandighede? Die Persiese koningin Vasti is weens opstandigheid van haar amp onthef. Ten einde ’n gepaste plaasvervanger te vind, het koning Ahasveros die mooiste maagde van oor die hele ryk bymekaargebring. Hy het gereël dat die jong vroue oor ’n tydperk van 12 maande op ’n spesiale dieet geplaas word en gereeld met balsemolie en mirre gemasseer word. Elke meisie is toe om die beurt beoordeel. En toe Ester se beurt kom, is sy as die nuwe koningin gekies!—Ester 1:12–2:17.

Maar waarom het Ester deelgeneem? Was sy ’n ydele roemsoeker? Nee, Ester het Jehovah se leiding gevolg wat sy herhaaldelik deur haar godvrugtige neef en oppasser, Mordegai, gesoek het (Ester 4:5-17). ’n Goddelose man, Haman, het planne beraam om God se volk, die nasie Israel, te vernietig. Deur middel van die ‘skoonheidswedstryd’ kon Jehovah dit bewerkstellig dat Ester in ’n prominente posisie kom waar sy hierdie sameswering sou kon verydel. Ester se mooi voorkoms was dus ’n seëning vir God se hele volk!

Wat van vandag? Hoe ’n mens lyk, is beslis nie die belangrikste ding in die lewe nie.a ’n Aantreklike voorkoms kan nietemin ’n bate wees wanneer dit met beskeidenheid en nederigheid gepaard gaan. Maar beteken dit dat modelwerk of die deelname aan skoonheidswedstryde ’n verstandige manier is om hierdie bate te gebruik? Of is daar faktore benewens die verlokking van roem, glorie of rykdom wat oorweeg moet word?

Agter die skittering

Modelwerk het weliswaar ’n bekoring. Mooi klere, duur juwele, goeie betaling, die vooruitsigte om te reis en televisie-optredes—al hierdie dinge is baie aanloklik. Daarbenewens het die opleiding as modelle talle jong vroue en mans gehelp om grasieus te stap en met vertroue en selfversekerdheid te praat. Maar agter die glans, skittering en vertoon kan werklike gevare vir ’n Christen skuil.

Nie dat modelwerk op sigself sleg is nie. Sekere modelwerk is van nut: dit laat ’n produk aantreklik lyk. Dit is een rede waarom pragtige hande gebruik word om naelverf in tydskrifte of op TV te adverteer. Net so word welgevormde mans en vroue gebruik om kledingstukke te vertoon. As sulke klere beskeie is, sal daar moontlik geen beswaar wees as ’n Christen betaal word om dit te vertoon nie.

Daar is nietemin baie probleme eie aan modelwerk wat nie altyd maklik is om te vermy nie. Hoe sou jy byvoorbeeld reageer as jy gevra word om iets te dra wat onbeskeie of ongepas vir Christene is? Of as ’n fotograaf van subtiele druk gebruik maak om jou op ’n suggestiewe, verleidelike manier te laat poseer? Buitendien kan ’n mens nie altyd seker wees hoe foto’s gebruik gaan word nie. Die foto’s kan byvoorbeeld op ’n agtergrond verskyn wat valse godsienstige feesdae bevorder of wat ’n immorele ondertoon het.

Dan is daar die uitwerking wat so ’n loopbaan op jou persoonlikheid kan hê deur die ontwikkeling van negatiewe eienskappe te bevorder. Die volgehoue beklemtoning van ’n mens se uiterlike eerder as van “die verborge mens van die hart” het veroorsaak dat party mannekyne uiters ydel geword het (1 Petrus 3:4). En as daar met duur klere, juwele en so meer gewerk word, kan dit materialistiese denke laat posvat.—1 Timotheüs 6:10.

Die mannekynberoep is ook daarvoor berug dat dit ’n mens blootstel aan persone, manlik en vroulik, wat aandring op seksuele gunste in ruil vir loopbaanbevordering. ’n Voormalige mannekyn het opgemerk: “Om die waarheid te sê, jy moet [seksueel] ingee om êrens te kom.” Sommige beweer verder dat homoseksualiteit algemeen onder manlike modelle is. Hoewel dit nie altyd waar is nie, kan dit ’n groter probleem onder modelle wees as in ander beroepe.

Skoonheidswedstryde

Baie van die voorgaande kan ook van skoonheidswedstryde gesê word. Maar daar is boonop ook die druk van intense wedywer. Dit het party deelnemers sover gedryf dat hulle mededingers opsetlike gesaboteer het. Volgens ’n berig is “party deelnemers so desperaat om te wen dat hulle selfs mededingers se baaikostuums met lipstiffie besmeer of hulle aandtabberds ‘per ongeluk’ met Coke bevlek”.

Borge van skoonheidswedstryde verwag boonop absolute toewyding van hulle meisies as hulle verkoops- en publisiteitsverteenwoordigers. Dit vereis dikwels sosiale omgang tot dagbreek toe. Aan ’n jong vrou is gesê: “Skatlam, jy is nooit moeg nie. Onthou dit net. Jy is die eerste om by ’n partytjie op te daag en jy is die laaste om te vertrek.” Op sy allerminste kan dit ’n jong Christen blootstel aan ongesonde omgang en kan selfs daartoe lei dat hy of sy ’n romantiese verhouding met ’n ongelowige aanknoop.—2 Korinthiërs 6:14.

Ten slotte is dit so dat skoonheidswedstryde die Bybelbeginsel in Romeine 1:25 verontagsaam wat diegene veroordeel wat ‘die skepsel vereer en dien bo die Skepper wat geprys moet word’. (Vergelyk Handelinge 12:21-23.) Op grondslag daarvan alleen sal dit vir ’n jong Christen verstandig wees om deelname aan ’n skoonheidswedstryd te weier, selfs al word dit op klein skaal op skool gedoen.

Ware skoonheid

Die jong mense wat vroeër gemeld is, moes hierdie feite sorgvuldig oorweeg toe hulle ’n besluit moes neem. Hoewel dit op sigself nie verkeerd is om as ’n model te werk nie, het Amy en Racine besluit om dit nie te doen nie. Jonathan het eweneens werk as ’n manlike model van die hand gewys en dien tans by die wêreldhoofkwartier van Jehovah se Getuies waar hy ’n loopbaan in die voltydse diens nastreef. Maar ’n ander aantreklike meisie het aan skoonheidswedstryde deelgeneem en twee gewen. Vandag woon sy nie meer Christelike vergaderinge by nie. Hoe waar tog is die spreekwoord: “Wat treffend en mooi is, is nie altyd goed nie; maar wat goed is, is altyd mooi.”

Ons word weer aan Ester herinner. Weens haar fisieke skoonheid is sy ingesluit in die groep waaruit die koning ’n vrou sou kies. Maar dit was haar beskeidenheid, onderdanigheid, gehoorsaamheid en onbaatsugtigheid wat haar ware skoonheid was (Ester 2:13, 15-17). Sy was ’n voorbeeld van Petrus se woorde: “Julle versiering moet nie uiterlik wees nie: haarvlegtery en omhang van goud en aantrek van klere nie, maar die verborge mens van die hart in die onverganklike versiering van ’n sagmoedige en stille gees, wat baie kosbaar is voor God” (1 Petrus 3:3, 4). Op die lange duur sal dit baie voordeliger wees om hierdie Christelike eienskappe aan te kweek as om die kortstondige beloninge van fisieke skoonheid te geniet.

[Voetnote]

[Prente op bladsy 23]

Christelike eienskappe is baie voordeliger as die kortstondige beloninge van fisieke skoonheid