Hout wat help om mense wakker te hou!
Deur Ontwaak!-medewerker in Swede
DIE druk van die Ontwaak!-tydskrif wat jy in jou hand hou, hang in ’n groot mate af van ’n proses wat in ’n bos begin. Boomstompe verskaf die grondstowwe vir die papier. Dit is hoe dit begin. Maar laat ons nou ’n fototoer onderneem en sien hoe ’n boom ’n tydskrif soos Ontwaak! word.
Die werktuig op die eerste foto is ’n moderne masjien wat bome afkap, ’n verwerker, in aksie. Dit kap nie net die bome af nie maar verwyder ook die takke. Daarna saag dit die stompe in geskikte lengtes. Die hout word per vragmotor of per spoor na die papierfabriek vervoer. ’n Volgelaaide vragmotor lewer 20 ton op ’n keer. By die papierfabriek wat Ontwaak! vir hierdie verslag besoek het, word daar die hele dag lank elke 15 minute ’n vrag hout afgelewer. ’n Hele deel kan vinnig deur reusemasjienhake afgelaai word, soos op die laaste foto op bladsy 25 gesien kan word.
Baie sulke bome is nodig vir slegs een nommer van Ontwaak! Omdat daar elke jaar soveel papier gebruik word, moet baie bome afgekap word. Maar in Swede is dit ’n baie noukeurig beheerde proses. Die owerheid laat afkapping slegs toe mits ’n gelyke oppervlakte herbeplant word, en op hierdie manier word Swede se bosse voortdurend aangevul.
Die diagram op bladsy 25 toon die proses in die papiermasjien. Die pulp word aan die een kant ingevoer, en papier kom aan die ander kant uit. Maar hoe word die pulp vervaardig?
Eers word die hout in geskikte lengtes gesaag en die bas in reusekonkas verwyder. Dan word die hout outomaties volgens dikte en lengte gesorteer. Hout wat aan sekere standaarde voldoen, word tot maalhoutpulp gemaal. Hierdie pulp is een van vier soorte pulp wat by hierdie fabriek vir papiervervaardiging gebruik word. Die oorblywende hout word fyn opgekerf en gebruik om termomeganiese pulp en sulfietpulp te maak. Die vierde soort pulp word van hergebruikte papier gemaak.
Maalhoutpulp word gemaak deur die hout onder druk en tussen groot slypstene met water te maal. Die resultaat is ’n meganies vervaardigde pulp.
Termomeganiese pulp word gemaak deur houtkerfies onder hoë druk en hitte te raffineer sodat die vesels van mekaar geskei word. Dit lewer langer en sterker vesels as die meganiese proses.
Sulfietpulp word chemies vervaardig. Dit word berei in groot houers wat die kerfies laat ontbind deur dit in magnesiumbisulfiet te kook, soos in ’n drukkoker. Van die eerste drie soorte lewer dit die sterkste pulp.
Die vierde soort, pulp van hergebruikte papier, word gemaak nadat die gebruikte papier verpulp en ou ink en gom daaruit verwyder is.
Ten slotte word die groot rolle papier volgens die koper se spesifikasies op die oproltrommel gesny en dan verpak. Die voltooide rolle word volgens bestemming gesorteer en dan per vragmotor, spoor of skip na die koper versend.
Die papier het nou die drukkery in Arboga bereik. Die rol word in ’n masjien ingevoer wat die papier in die geskikte grootte sny vir Swede se nuwe volkleur-velpers. Hierdie nuwe pers is in staat om 15 000 afdrukke per uur te druk.
Elke nommer word aan intekenaars in Swede en in die buiteland gestuur. Daarbenewens word bondels eksemplare vir openbare verspreiding aan honderde gemeentes van Jehovah se Getuies oor die hele land gestuur. Die Getuies versprei duisende eksemplare van hierdie tydskrifte wanneer hulle mense tuis besoek of hulle elders raakloop.
Ja, daardie boomstomp in die bos het sy uiteindelike bestemming bereik—die tydskrif Ontwaak! Let asseblief daarop dat Ontwaak! artikels insluit wat lesers inlig en bewus maak van die betekenis van wêreldgebeure in die lig van Bybelprofesie. Dit help lesers dus om te leer van die mens se Skepper en Sy voornemens vir ons dag. Sulke kennis sal jou help om te verstaan wat in ons tyd gebeur en sal jou ook help om ’n vaste hoop vir ’n beter toekoms te bou.
[Venster/Diagram op bladsy 25]
Die papiermasjien
A. Die pulp wat die papiermasjien bereik, lyk soos dun pap en word in ’n laag wat etlike meters breed is op ’n draadgaasvervoerband uitgesprei. Op hierdie tydstip is die pulp ongeveer 99 persent water. Die meeste van hierdie water word verwyder terwyl die pulp deur die masjien, wat ongeveer 70 meter lank is, beweeg.
B. Die waterinhoud word in die persgedeelte tot ongeveer 60 persent verminder. Die water word meganies uitgepers, dikwels saam met vakuumsuiging.
C. In die droër gedeelte word die papierlaag op stoomverhitte silinders gedroog.
D. Polering maak die papier gladder, en dit word gedoen deur die papier tussen rollers deur te laat. Slegs 5 persent water bly oor wanneer die papier uiteindelik opgerol word.
[Diagram] (Sien publikasie vir oorspronklike teksuitleg)
Hoofkas Draadgedeelte Persgedeelte Droërgedeelte Verglansing
Nat kant Oprol
[Prente op bladsy 26]
Die tak in Arboga, Swede
Papierrolle word opgestapel