Jongmense vra . . .

Waarom moet ek die okkulte vermy?

“EK WAS baie geheg aan my oupa”, het die jong meisie gesê, “en toe hy sterf, het dit my swaar getref. Ek wou weet of dit moontlik was om weer met hom in aanraking te kom.” Die jong meisie het dus met die okkulte begin eksperimenteer.

’n Onlangse berig verklaar dat “minstens 200000 kinders en jongmense in die Bondsrepubliek Duitsland by verskeie vorme van die okkulte betrokke was”. Japan het ’n aantal amateurspiritiste in die skool, waarvan sommige in telepatie spesialiseer, ander in hipnose en nog ander in duiwelbeswering. In Nigerië is dit vandag nie ongewoon om van laerskoolkinders te hoor wat toorkuns beoefen nie. En ongelukkig is daar selfs party jongmense wat deur Christenouers grootgemaak word wat, miskien onwetend, by bonatuurlike dinge betrokke geraak het.

Waarom hou die okkulte so ’n betowering vir jongmense in? En waarom is dit so gevaarlik om daarby betrokke te raak?

Waarom hulle daarby betrokke raak

Okkultisme het te doen met die bonatuurlike, ’n verkenning van die geesteryk deur middel van astrologie, waarsêery, towery, goëlery en so meer. En waarom is soveel jongmense gretig om sulke dinge te ondersoek? Dirk het ’n groot begeerte gehad om met sy afgestorwe pa in aanraking te kom. Oortuig daarvan dat hy dit kon doen as hy sy geesteskrag ontwikkel, het hy met ’n meditasieroetine begin waartydens hy probeer het om voorwerpe te laat beweeg sonder dat hy daaraan raak. Sulke meditasie, het Dirk gesê, het hom tot op die drempel van die geesteryk gebring!

Ander jongmense vrees die toekoms. Hulle wil advies hê oor hulle punte of huweliksvooruitsigte, en hulle meen dat die geesteryk hulle kan help. Die aanbidding van Satan self is besonder verontrustend! Wat is die aantrekkingskrag van hierdie afskuwelike godsdiens? “Ek doen dit vir mag”, het ’n Kanadese jeugdige verduidelik wat Satanisme beoefen. “Dit gee my die mag om mense seer te maak.”

Maar volgens baie navorsers is die hoofrede waarom jongmense by okkultisme betrokke raak niks anders as nuuskierigheid nie. “Ek was vreeslik nuuskierig”, het ’n meisie erken wat by die okkulte betrokke geraak het. ’n Ander meisie het gesê: “Ek was eers baie skepties, maar ek het gedink: ‘Jy sal ten minste weet hoe dit werklik is.’” Sy het toe ’n uitnodiging van ’n vriend aanvaar om aan ’n okkulte sessie deel te neem.

Party jongmense, gedryf deur nuuskierigheid, speel met die ouija-bord of improviseer deur die bewegings van ’n omgekeerde glas dop te hou. Daarvandaan is dit ’n kort treetjie na dieper betrokkenheid by spiritisme deur die gebruik van kristalbolle, tarokkaarte, hangertjies, teeblare en horoskoopboeke. Party begin selfs professionele fortuinvertellers of toordokters raadpleeg. Maar baie beroepsokkultiste is niks anders as bedrieërs nie. Alexander het byvoorbeeld ’n toordokter genader in ’n poging om sy punte te verbeter. Nie net het sy punte swak gebly nie, maar hy het ook ’n finansiële verlies gely. Sy geld is verdeel tussen die skyntoordokter en die sogenaamde vriend wat hom aanbeveel het.

Maar vir baie jongmense lei eksperimentering met spiritisme tot iets veel nadeligers as ’n finansiële verlies.

‘Ongelooflike foltering’

“As ek maar net geweet het”, is ’n uitdrukking wat algemeen onder diegene gehoor word wat spyt gekry het oor hul eksperimentering met die bonatuurlike, aldus ’n Suid-Afrikaanse tydskrif, Personality. ’n Tipiese weeklag is: “As ek net nie so naïef was nie. . . . Ek het ongelooflike foltering, stemme, nagmerries, dreigemente verduur, en ek is verstandelik en liggaamlik deur ander Sataniste gefolter toe ek wou wegbreek.”

Ruim 24 persent van die onderwysers wat in Duitsland uitgevra is, het die onrusbarende invloed van okkultisme op leerlinge opgemerk. Party leerlinge was teruggetrokke, het leerprobleme ondervind, in vrees gelewe, aan neerslagtigheid gely en het ’n neiging ontwikkel om hulself of ander leed aan te doen. Dirk kon dikwels snags nie slaap nie. Hy sê: “Omdat ek vreesbevange was dat demone my sou oormeester, het ek my oë nie durf toemaak nie. Ek het met elke geluid ineengekrimp.” ’n Jeugdige genaamd Michael het eweneens ‘slapelose nagte verduur waartydens hy deur demone geteister is’ nadat hy dranke gedrink het wat vir hom voorgeskryf is. Ander berigte beskryf onheilspellende persoonlikheidsveranderinge in mense wat okkulte gebruike beoefen. ’n Meisie het haar ma ontstel toe sy vir haar gesê het dat sy in die toekoms swart gaan dra (die kleur wat sy boonop haar kamer wou verf) en in ’n oop doodskis gaan slaap!

Wie werklik die geesteryk bewoon

Die Skrif stel dit duidelik dat ‘die dooies glad niks weet nie’ (Prediker 9:5). Die geesteryk word dus nie bewoon deur die siele van ontslape geliefdes nie. Wat is dan die rede vir sulke skrikwekkende ondervindinge? Bose demone! Volgens die Bybel is hulle opstandige engele, volgelinge van Satan die Duiwel (1 Petrus 3:19, 20; Openbaring 12:9). Hulle het deur die geskiedenis heen die mens kwaad en geweld aangedoen.

Lukas 9:42 (NAV) vertel byvoorbeeld van ’n duiwelbesetene vir wie ‘die duiwel op die grond neergegooi en hewige stuiptrekkings laat kry het’. Hoe sadisties tog! Handelinge 19:16 beskryf eweneens hoe ’n duiwelbesetene sewe sogenaamde duiwelbesweerders gewelddadig aangeval het. Hedendaagse ondervindinge bevestig duidelik dat die demone hulle venynige metodes hoegenaamd nie verander het nie.

’n Jeugdige wat met BSW, astrologie, tarokkaarte of enige vorm van die okkulte begin eksperimenteer, kan dus die deur vir skrikaanjaende ondervindinge oopmaak. Die tydskrif Personality het gesê: “’n Gemeenskaplike draad wat deur al die ondervindinge loop van almal met wie ons gesels het [wat by die okkulte betrokke geraak het], was dat hulle deur middel van kanale wat op die oog af fatsoenlik voorkom dieper en dieper in die sataniese draaikolk gesuig is.” Ja, die okkulte is niks meer as ’n trapklip tot kontak met Satan en die demone nie!

‘Heuning op ’n skerp mes’

God se Wet aan die Israeliete het gevolglik enige vorm van spiritisme verbied en gesê: “Daar mag niemand by jou gevind word . . . wat met waarsêery, goëlery of met verklaring van voortekens of towery omgaan nie, of wat met besweringe omgaan, of wat ’n gees van ’n afgestorwene vra of ’n gees wat waarsê, of wat die dooies raadpleeg nie.”—Deuteronomium 18:10, 11.

Christene in die eerste eeu het hulself gereinig van enige verbintenis met spiritisme en het alle demonistiese voorwerpe vernietig (Handelinge 19:19). Jongmense wat vandag Jehovah se vriendskap verlang, sal eweneens enigiets vermy wat met die okkulte te doen het. Dit sal alle rolprente, boeke, strokiesverhale en plakkate met spiritistiese botone insluit. Selfs jou keuse van musiek moet noukeurig ondersoek word. Heavy metal-musiek is byvoorbeeld herhaaldelik met Satanisme verbind.

Die Tibetane het ’n gesegde: ‘Dink twee keer voor jy heuning aanvaar wat op ’n skerp mes aangebied word.’ As jy die heuning van die mes probeer aflek, kan jy jou tong verloor! Dit maak eweneens nie saak hoe die bonatuurlike jou nuuskierigheid prikkel nie, dit is dodelik. Weier dus enige uitnodiging om aan ’n okkulte sessie deel te neem of dit selfs by te woon. Iets wat oënskynlik so onskadelik is soos die speletjie waar die glas beweeg, kan tot gevaarlike betrokkenheid by demonisme lei. Jy is miskien wel nuuskierig. Maar sal jy verrotte vleis eet net om uit te vind hoe dit voel om voedselvergiftiging te hê?

Dirk (wat vroeër gemeld is) was in staat om hom van die okkulte te bevry. Deur die Bybel met behulp van die publikasies van die Wagtoringgenootskap te bestudeer, het hy die waarheid oor sy oorlede pa te wete gekom en het hy van die opstandingshoop geleer (Psalm 146:4; Johannes 5:28, 29). Hierdie waarheid het hom vrygemaak van enige begeerte om met die geesteryk te kommunikeer. (Vergelyk Johannes 8:32.) Waar is Dirk nou? Hy het hom by die geledere van Jehovah se Getuies gevoeg en werk as ’n voltydse bedienaar by een van die drukfasiliteite van die Wagtoringgenootskap.

Ja, die Bybel bevredig ons ‘geestelike behoeftes’ (Mattheüs 5:3, NW). En op die lange duur is dít baie voordeliger as dat jy jou morbiede nuuskierigheid deur middel van die gevaarlike, dodelike okkulte bevredig.

[Prent op bladsy 15]

Betrokkenheid by die okkulte kan begin met ’n oënskynlik onskadelike speletjie soos hierdie ouija-bord of die gebruik van ’n omgekeerde glas