Jongmense vra . . .

Belangstelling in die okkulte—Is dit gevaarlik?

STEL tieners werklik in die okkulte belang? ’n Groep navorsers het dit probeer uitvind deur ’n opname onder leerlinge in 115 hoërskole te doen. Die opname het hierdie interessante feite aan die lig gebring: Meer as die helfte van die jongmense onder wie die opname gedoen is (54 persent), het gesê dat hulle in die okkulte en die bonatuurlike belangstel, terwyl ’n kwart (26 persent) gesê het dat hulle “baie daarin belangstel”.

Navorsers vir die Universiteit van Alaska in Anchorage skryf: “In onlangse jare was daar ’n groot vermeerdering . . . in die aantal koerant- en tydskrifartikels oor die geweldige groei wat vermoedelik in sataniese kultusbedrywigheid plaasvind.” Deskundiges sê dat daar min definitiewe bewyse is om bewerings van wydverspreide Satanisme onder jongmense te staaf. Nogtans ly dit geen twyfel nie dat baie jongmense in aspekte van Satanisme en die okkulte belangstel, al is hierdie belangstelling net oppervlakkig.

‘Is belangstelling in die okkulte gevaarlik?’ kan party jongmense dus vra. In antwoord hierop kan ons kyk na van die maniere waarop jongmense in die eerste plek by die okkulte betrokke raak.

Die aantrekking van die okkulte

’n Artikel in U.S.News & World Report sê dat “kinders en tieners van vandag toegang het tot en blootgestel word aan ’n ongelooflike—dikwels ontstellende—hoeveelheid prente en inligting wat 20 jaar gelede nog ondenkbaar sou gewees het”. Uit nuuskierigheid sal baie jongmense boeke en tydskrifte lees, na video’s kyk of deur webwerwe op die Internet blaai wat inligting oor die okkulte bevat.

BBC News Online sê dat gewilde TV-programme oor die toorkuns en vampirisme “na bewering belangstelling in die toorkuns onder kinders aanmoedig”. Van die heavy-metal-musiek het ook gewelddadige of demoniese temas. Die rubriekskrywer Tom Harpur het in die koerant The Sunday Star van Toronto geskryf: “Ek moet die ernstigste waarskuwing moontlik gee oor wat [in musiek] gebeur. . . . Ek het nog nooit iets so verdorwe gesien nie. Die liedjies is vol waansin, besetenheid, demone, bloed, vloekwoorde, alle soorte geweld, waaronder verkragting, selfverminking, moord en selfmoord. Dood en verwoesting, voorspellings van onheil, die verwerping van alles wat goed is en die aanvaarding van alles wat afskuwelik en boos is—dít is die temas.”

Dra dit regtig tot vernietigende gedrag by as ’n mens na sulke musiek luister? Dit het klaarblyklik in ten minste een geval—dié van ’n 14-jarige jeugdige in die Verenigde State wat sy ma doodgesteek en toe selfmoord gepleeg het. Die mure van sy kamer was vol plakkate van heavy-metal-rockmusikante. Sy pa het later gepleit: “Sê vir ouers dat hulle moet oplet na watter musiek hulle kinders luister.” Hy het gesê dat sy seun die week voordat hy sy ma doodgemaak het, ’n rocklied bly sing het “oor bloed en hoe om jou ma dood te maak”.

Dan is daar karakterspeletjies, waarvan party toelaat dat deelnemers die rol van towenaars en ander beoefenaars van die okkulte aanneem. Baie van hierdie speletjies word deur demonistiese geweld gekenmerk.a

Tog berig die navorsingsorganisasie Mediascope: “Studies toon dat die voorkeur vir heavy metal-musiek ’n belangrike aanduiding kan wees van vervreemding, dwelm- en alkoholmisbruik, sielkundige versteurings, selfmoordgevare . . . of waaghalsige gedrag gedurende die jeugjare, maar musiek veroorsaak nie hierdie gedrag nie. Daar word veronderstel dat tieners wat reeds met daardie probleme sukkel, dalk tot heavy metal-musiek aangetrokke sal wees omdat die lirieke hulle eie kwellende gevoelens uitdruk.”

Navorsers stem moontlik nie almal saam oor die gevare van sataniese musiek nie. Maar kan dit enigiets anders as verderflik wees as ’n mens gereeld blootgestel word aan video’s, musiek of speletjies wat geweld of selfvernietiging voorstaan? Vir Christene hou belangstelling in die okkulte egter selfs groter gevaar in.

God se beskouing van die okkulte

In 1 Korintiërs 10:20 het die apostel Paulus Christene gewaarsku: “Ek wil nie hê dat julle deelgenote met die demone moet word nie.” Wie is die demone nou eintlik, en waarom is dit so gevaarlik om met hulle deurmekaar te raak? Kortom, die demone is gewese engele, wat gekies het om Satan die Duiwel te volg. Satan beteken “Teenstander” en Duiwel beteken “Lasteraar”. Volgens die Bybel het hierdie gewese engeleseun van God homself ’n teenstander en ’n lasteraar gemaak deur te kies om teen God in opstand te kom. Mettertyd het hy ander engele verlok om by hom in sy opstandige weg aan te sluit. So het hierdie bondgenote demone geword.—Genesis 3:1-15; 6:1-4; Judas 6.

Jesus het Satan “die heerser van hierdie wêreld” genoem (Johannes 12:31). Satan en sy demone het “groot toorn” oor hulle naderende vernietiging (Openbaring 12:9-12). Dit is geen wonder dat mense wat met die demone deurmekaar geraak het, gevind het dat hulle boosaardig is nie. ’n Vrou in Suriname wat grootgeword het in ’n gesin wat spiritisme beoefen het, het self gesien hoe die demone “dit geniet om hulle onwillige slagoffers te martel”.b Dit is dus uiters gevaarlik om op enige manier met hierdie wrede geesskepsele deurmekaar te raak!

Daarom het God sy eertydse volk, die Israeliete, beveel om alle okkulte gebruike te vermy. “Elkeen wat hierdie dinge doen, is vir die HERE ’n gruwel”, waarsku Deuteronomium 18:10-12. Christene is ook gewaarsku dat “dié wat spiritisme beoefen”, deur God vernietig sal word (Openbaring 21:8). Selfs belangstelling in die okkulte word deur God veroordeel. “Hou op om wat onrein is aan te raak”, beveel die Bybel.—2 Korintiërs 6:17.

Breek los van okkulte gebruike

Het jy die fout gemaak om by die okkulte betrokke te raak? Dink dan aan wat in die eerste-eeuse stad Efese gebeur het. Baie daar het “toorkunste beoefen”. Maar party is geraak deur die kragtige werke wat die apostel Paulus met behulp van die heilige gees gedoen het. Wat was die gevolg? “Heelparty van dié wat toorkunste beoefen het, het hulle boeke bymekaargebring en voor almal verbrand. En hulle het die waarde daarvan bereken en gevind dat dit vyftigduisend silwerstukke werd was. So het die woord van Jehovah op ’n magtige wyse bly groei en seëvier.”—Handelinge 19:11-20.

Wat sê dit vir ons? Dat iemand wat uit die greep van die demone wil loskom, alles moet vernietig wat met sataniese aanbidding verband hou! Dit sluit in alle boeke, tydskrifte, plakkate, strokiesverhale, video’s, gelukbringers (voorwerpe wat vir “beskerming” gedra word) en demonistiese inligting wat van die Internet afgelaai is (Deuteronomium 7:25, 26). Gooi enigiets weg wat in waarsêery gebruik kan word, soos kristalballe of ouija-borde. Raak ook ontslae van musiek of video’s wat oor sataniese onderwerpe handel.

Dit verg moed en vasbeslotenheid om hierdie moedige stappe te doen. Maar dit kan groot voordele inhou. ’n Christenvrou met die naam Jeanc het ’n rekenaarspeletjie gekoop wat aan die begin onskadelik gelyk het. Terwyl sy deur die speletjie se vlakke gegaan het, het sy aspekte van die speletjie ontdek wat ’n spiritistiese inslag het. Kort voor lank het sy verskriklike nagmerries begin kry! “Ek het in die middel van die nag opgestaan”, sê Jean, “en die CD’s van die speletjie vernietig.” Die gevolg? “Ek het nog nie weer probleme gehad nie.”

As jy toon dat jy werklik vasbeslote is om los te breek, sal jy daarin slaag. Dink aan Jesus se vasbeslotenheid toe die Duiwel Jesus probeer verlok het om hom te aanbid. ‘Jesus het vir hom gesê: “Gaan weg, Satan! Want daar staan geskrywe: ‘Dit is Jehovah jou God wat jy moet aanbid, en dit is aan hom alleen wat jy heilige diens moet verrig.’” Toe het die Duiwel hom verlaat.’—Matteus 4:8-11.

Moenie die stryd alleen voer nie

Die apostel Paulus herinner ons daaraan dat alle Christene ‘’n worstelstryd het teen die bose geesmagte in die hemelse plekke’ (Efesiërs 6:12). Maar moenie probeer om die stryd teen Satan en sy demone alleen te voer nie. Kry hulp van jou godvresende ouers en die ouer manne in die plaaslike Christengemeente. Jy sal dalk skaam voel om te erken dat jy betrokke geraak het, maar dit kan daartoe lei dat jy broodnodige ondersteuning kry.—Jakobus 5:14, 15.

Onthou ook dat die Bybel sê: “Staan die Duiwel teë, en hy sal van julle wegvlug. Kom nader aan God, en hy sal nader aan julle kom” (Jakobus 4:7, 8). Ja, jy het Jehovah God se ondersteuning! Hy sal jou help om van die strik van die okkulte los te breek.

[Voetnote]

[Prent op bladsy 26]

Raak ontslae van alle voorwerpe wat met sataniese aanbidding verband hou

[Prent op bladsy 26]

Pas op vir webwerwe wat spiritisme bevorder