’n Skoon aarde—Ons het dit nodig

Deur Ontwaak!-medewerker in Brittanje

HET jy geweet dat Londen se taxibestuurders volgens die wet verplig is om hulle taxi’s skoon te hou? As hulle dit nalaat, kan hulle die stad se strate ’n tyd lank belet word. Selfs wanneer padtoestande sleg is en die meeste motors dae lank vuil bly, is die Londense taxi silwerskoon. Die voertuig se blink oppervlakke wek ’n gevoel van trots en genoeë by die bestuurder en sy passasiers.

Wanneer ons huis, ons klere en ons besittings skoon is, bevorder dit eweneens ’n gevoel van welsyn in ons. Wee die skoolseun wie se ma hom sien wanneer hy die huis inkom en met sy vuil skoene modderspore op die mat agterlaat!

Trouens, goeie gesondheid hang grootliks af van persoonlike sindelikheid. Ons liggaam moet gereeld versorg en skoongemaak word om vuiligheid te verwyder wat ’n vastrapplek vir siekte kan voorsien. Handelsmaatskappye maak ontsaglike winste uit die verkoop van reinigingsmiddels, wasmiddels, politoere, sepe, sjampoes en ontsmettingsmiddels wat ons gebruik om onsself en ons onmiddellike omgewing skoon te hou. Die meeste mense is ongetwyfeld bewus van die behoefte aan sindelikheid. Maar as jy in ’n stad woon, weet jy dat dit nie al is nie.

Gevaar—besoedeling

Stadsbewoners is deeglik bewus van besoedeling en die besmette omgewing. Hulle sien dit aan onverwyderde vullis, aan rommel wat onverskillig op die strate gestrooi word en aan growwe graffiti op openbare geboue. Hulle ruik dit aan die verstikkende dampe van swaar verkeer en aan die skerp rookmis waarvan party stede las het.

Dit is miskien waarom talle wat in stede woon soms probeer om tyd op die platteland deur te bring. Hulle geniet dit om hulle longe met skoon lug te vul, miskien selfs om kristalhelder water uit ’n bergstroom te drink. Ander hou daarvan om strand toe te gaan en op die sand te ontspan of om deur ’n verfrissende swem in die see af te koel.

Maar wag ’n bietjie! Vuiligheid en besoedeling skuil ook daar. ‘Hoe kan dit wees?’ vra jy. ‘Dit lyk so skoon.’ Wel, kom ons beskou daardie “skoon” lug en “helder” water ’n bietjie van naderby.