Die einde van besoedeling in sig?

DIE vooruitsig op ’n skoon aarde verskaf ons waarlik vreugde. Maar is dit realisties? Wel, party lande probeer hard om die toestand met betrekking tot besoedeling te verbeter. Volgens berig is daar nou ’n afname in lugbesoedeling vanweë streng maatreëls om die loodinhoud van motoruitlaatgasse te beheer. In sommige gebiede lyk dit asof industriële besoedeling ook afgeneem het. Maar dit is nie altyd aan streng beheermaatreëls te danke nie. Soms is dit eerder die gevolg van die herstrukturering van industrieë wat deur die wêreld se ekonomiese verknorsing veroorsaak word.

Die aarde—Ontwerp om homself skoon te maak?

Daarbenewens is natuurlike skoonmaakmeganismes aan die werk. Volgens dr. Aubert van die Mediese Oseanografie-sentrum in Nice, Frankryk, is fitoplankton byvoorbeeld een van die see se vernaamste anti-besoedelingsmiddels. Hierdie piepklein organismes skei natuurlike antibiotika af wat infeksie vernietig. Ongelukkig verloor hulle die stryd. In Italië word Venesië en die nabygeleë Adriatiese See deur alge oorweldig. In die Adriatiese See veroorsaak besoedeling “alge, ’n stinkende en slymerige jellie, geel, bruin en grys, wat honderde kilometer suidwaarts versprei” in die somer (The Globe and Mail, Toronto, Kanada). Een bydraende faktor is die Po-rivier se afvloeiwater “met ongesuiwerde riool van meer as 15 miljoen mense, afval van talle van Italië se vernaamste industrië . . . en die mis van meer as vyfmiljoen varke”.

Wat van grondbesoedeling? Navorsing deur ’n groot chemiese maatskappy in samewerking met die Amerikaanse Departement van Energie het aan die lig gebring dat daar talle soorte bakterië, fungi en amebes in die aarde voorkom, sommige tot 260 meter onder die oppervlak. Dr. David Balkwell van die Florida State University het gesê: “Hierdie diep organismes suiwer heel moontlik die natuurlike grondwater.” So nie hoop dr. Balkwell dat genetiese ingenieurs hierdie ondergrondse organismes sal kan prikkel om “spesifieke besoedelstowwe af te breek”.

Maar ons moet op realistiese wyse tot die gevolgtrekking kom dat die huidige toestand niks goeds inhou vir ’n vinnige einde aan die aarde se fisiese besoedeling nie. Tog kan ons seker wees dat die einde van besoedeling in sig is. Waarom?

Sedelike besoedeling word verwyder

As die planeet ’n waarlik skoon tuiste vir die mens moet wees, moet sy bewoners ’n rein volk wees, sedelik sowel as liggaamlik. Mense moet hulle grondliggende egosentrisiteit te bowe kom en onselfsugtige eienskappe aankweek deur hulle medemens en hulle diere in ag te neem. Kan dit gedoen word?

Jehovah se Getuies het deur die dekades heen gevind dat dit gedoen kan word. Hulle het die persoonlikheidsvormende krag van die Bybel op die proef gestel, en het gevind dat hierdie boek die krag het om mense te verander, wat ’n heilsame uitwerking op die omgewing het. Stadionbeamptes raak byvoorbeeld in ekstase oor die ordelikheid en sindelikheid van die skare wat die groot byeenkomste van Jehovah se Getuies bywoon. Daar word dikwels opgemerk dat ‘die stadion skoner agtergelaat is as wat die Getuies dit gekry het’.

’n Personeellid van ’n sportkompleks in Lissabon, Portugal, het aan een van Jehovah se Getuies verduidelik: “Wanneer mense my vra wat ek van julle dink, kan ek nie leuens verkoop nie. Ek sê vir hulle dat Jehovah se Getuies baie goeie maniere, sindelikheid en organisasie het. . . . As julle een ding vuil maak, maak julle 99 skoon!”

Die Getuies se aandrang op liggaamlike reinheid hou verband met hulle hoë sedelike beginsels. Watter beginsels? Die wat in die Bybel, wat God se geskrewe Woord is, beskryf word. Die Bybel sê aangaande sondaars dat God se weë ‘hoër is as hulle weë, en sy gedagtes as hulle gedagtes’ (Jesaja 55:7-9). Tog kan ons God se weë leer omdat God self sy wette beskikbaar stel aan diegene wat daarvolgens wil lewe. Hierdie goddelike opvoeding is noodsaaklik vir ons toekoms.

Vandag probeer miljoene Getuies hard om volgens hierdie rein sedelike standaarde te lewe, en dit strek hulle grootliks tot voordeel. Maar vir talle het dit groot veranderinge in hulle gewoontes en lewenstyle beteken.

Dwelms, slae en oorwinning

Beskou die geval van Marie, een van ’n gesin van 13 uit ’n misdaadgeteisterde gebied in ’n stad in Engeland.

“My gesin was bekend vir hulle boewerye, en net soos die res van hulle was ek ’n bekende afknouer. Toe ek 15 jaar oud was, het ek ’n miskraam gehad. Twee jaar later is my dogter gebore, en ek moes op my eie vir haar sorg. My kêrel is in ’n [verbeter]skool aangehou. Hy het weggeloop en ek het weer swanger geraak. Ek het allerhande maniere probeer om hierdie swangerskap te beëindig en het eindelik daarin geslaag, maar het amper my lewe verloor.

“My kêrel het dagga begin rook en baie gewelddadig teenoor my geraak, hoewel ek weer swanger was. Ek het ook betrokke geraak by die rook sowel as die verkoop van die plant. Teen hierdie tyd het ek in ’n huis vol prostitute gewoon. Ek het na hulle kinders gekyk.

“Toe ek in ’n ander ou begin belangstel het, het my kêrel die verhouding beëindig deur hom agt keer met ’n mes te steek. Daarvoor is hy weer in hegtenis geneem. Nadat hy uit die gevangenis vrygelaat is, is ons getroud en het ons albei op groot skaal by die dwelmbedryf betrokke geraak.”

Nadat hierdie jong persoon met Jehovah se Getuies in aanraking gekom het en die Bybel saam met hulle studeer het, het sy Christenvergaderinge begin bywoon en ’n verandering het geleidelik plaasgevind. Marie verduidelik:

“Ek het begin besef dat dit verkeerd is om te rook en dwelms te gebruik. Nadat ek vir my man gesê het dat ek hiermee ophou, het hy gedurig sy daggasigaret se rook in my gesig geblaas en my in die versoeking probeer lei om weer dwelms te gebruik. Ek het nog ’n keer swanger geraak. Kort daarna het my man begin om die hele nag weg te bly.

“Agt maande later het hy al sy goed uit die huis gevat en my verlaat. Ek het tot Jehovah gebid om my te help om daaroor te kom en hy het. Toe, na drie maande, het my man teruggekom. Ek het om krag gebid sodat ek sou doen wat reg was. Ek het weer eens probeer om my huwelik te laat slaag, maar binne ses maande het ek 14 steke om my oog versorg, die gevolg van my man se geweld; dwelms was steeds sy voorliefde. Ons huis het die vernaamste dwelmdepot vir die hele gebied geword. Die huis was vol van sy ‘vriende’, waarvan die meeste in ’n dwelmroes was.

“Met Jehovah se hulp het ek moed bymekaargeskraap en die mans gekonfronteer. Ek het hulle beleef gevra om na buite te gaan as hulle wou aanhou om hulle dwelms te rook. Toe my man dit hoor, het hy sy humeur verloor, my na die kombuis geroep en my kop teen die muur begin stamp. Ek het met ’n gesukkel vir hom gesê dat ek besorg was oor die kinders en hulle die geleentheid wou gee om in ’n skoon, heilsame omgewing groot te word. My man het uitgestorm na sy vriende toe. Ek het biddend gewag. Hy het weer by die kombuis ingekom, en ek het gedink dat hy my gaan doodmaak.

“Maar van toe af het dinge baie bedaar. Ons het later getrek. Wanneer die dwelmslawe kom kuier het, het hulle nie soos voorheen gevloek of oor hulle onsedelike lewens gepraat nie. Dit het gelyk asof hulle ons respekteer het.”

Marie se standpunt ten opsigte van rein sedes en ’n onbesmette lewe het haar man se hart geraak, en hy het ook eindelik die Bybel saam met Jehovah se Getuies studeer. Marie sowel as haar man is nou gedoopte Getuies en help ander om hulle lewens met behulp van Bybelkennis skoon te maak. Marie sê:

“Hoe klop my hart tog wanneer ek my man hoor bid, of wanneer ek hoor hoe hy sy liefde vir Jehovah betuig! Die verandering in sy voorkoms verbaas sy gewese vriende. Nou is ons gesin waarlik verenig. Ek was nog nooit so gelukkig nie, en ek het Jehovah nog nooit ophou dank omdat hy ons uit hierdie besoedelde stelsel van dinge gehaal het nie.”

Sulke sukses met die bekamping van sedelike besoedeling openbaar die krag van God se Woord. Daarbenewens dui dit op die hoop op ’n vroeë einde aan alle vorme van besoedeling. Wat sê die Bybel hieromtrent?

’n Skoon aarde—’n sekerheid

’n Sorgvuldige studie van die Bybel toon dat ons in “die laaste dae” van die huidige stelsel van dinge lewe (2 Timotheüs 3:1-5). Die toestand van die omgewing is net een deel van die bewys hiervoor. Wat beteken dit met betrekking tot ons hoop op ’n skoon aarde?

Dit beteken dat God binnekort in mense-aangeleenthede gaan ingryp. Hy sal binnekort op ’n kragtige wyse optree om alle sedelike en fisiese besoedeling van ons planeet te verwyder. In die boek Openbaring belowe hy om “die verderwers van die aarde te verderf”.—Openbaring 11:18.

Dit is waarlik net God wat die mag het om ’n skoon, onbesoedelde aarde tot stand te bring. Dit is opwindend om te weet dat hy van plan is om juis dit te doen. Wanneer hy in die nabye toekoms optree, sal dit wees asof hy self sê: “Kyk, Ek maak alles nuut” (Openbaring 21:5). Dan sal ons planeet eindelik ’n geskikte tuiste vir skoon, opregte mense wees, wat sy oorvloed vir ewig sal geniet.