Ons beskou die wêreld
DIE BESTE MELK
’n Onlangse studie onder Skotse moeders en hulle pasgebore babas toon dat die voedingswaarde van moedersmelk en die beskerming wat dit verleen nie deur kommersiële formules nagemaak kan word nie. Die studie wat in Le Figaro, ’n Franse koerant, gepubliseer is, toon dat babas wat 13 weke of langer aan die bors gevoed is merkbaar minder infeksies gedurende hulle eerste lewensjaar gehad het as dié wat voor 13 weke heeltemal gespeen is of wat van geboorte bottelformules gegee is. Moedersmelk bevorder die vorming van sekere bakterieë wat die groei van skadelike bakterieë binne-in die baba se ingewande onderdruk. Die komplekse samestelling van moedersmelk verskil ook van dag tot dag na gelang van die ouderdom en behoeftes van die baba, en laat die suigeling selfs toe om by klimaatsveranderinge aan te pas. Le Figaro sê: “Dit het geen gelyke nie.”
MAGTELOSE BISKOPPE
Die Nasionale Kongres van Katolieke Biskoppe in die Verenigde State het onlangs sy voornemens aangekondig om gebruik te maak van die dienste van ’n internasionale skakelfirma. Volgens die National Catholic Reporter is die doel “om ’n sedeboodskap oor te dra wat die biskoppe self nie ingang kan laat vind nie”. Die geskilpunt is die kerk se standpunt oor aborsie, waarmee baie Katolieke nie saamstem nie. Die National Catholic Reporter sê dat “die Amerikaanse biskoppe mense nie eers met 342 biskoppe, 53 000 priesters, 20 000 gemeentes, 100 000 kerkvroue, meer as 230 Katolieke kolleges en universiteite, 7000 parogiale skole en meer as 50 miljoen leke kan oortuig dat aborsie onwettig verklaar moet word nie”.
“VALSE WAARDES”
Boris Becker is op 22-jarige ouderdom een van die beste tennisspelers ter wêreld; hy is ook een van die rykstes—met eiendom ter waarde van ongeveer R195 miljoen. Hy het sy geld gemaak deur tenniswedstryde te wen. Die jong Duitse sportman glo egter dat hy te veel betaal word: “Dit is belaglik as jy daaraan dink—hoeveel ek kry net om ’n tennisbal oor die net te slaan.” Volgens Parade Magazine het hy gesê dat daar in vandag se gemeenskap “soveel geld in omloop is dat niemand honger of dakloos behoort te wees nie. Mense skenk te veel aandag aan valse waardes.”
PLATINUMBRUID
Platinum is kosbaarder as goud, en daar is ’n groot aanvraag daarna as ’n beleggingsartikel. Volgens The Times van Londen is ’n bruidsrok wat van platinum gemaak is tydens ’n reklamevertoning van Platinum 1990, ’n jaarlikse oorsig oor die bedryf, aan die publiek getoon. Die rok is in Japan teen ’n koste van £300 000 (R1416 000) ontwerp en gemaak. Superfyn platinumfoelie, wat aan een kant met Japannese papier bedek is, is in stroke van 0,33 millimeter gesny om geweef te word. Streng instruksies uit Japan het die volgende bondige mededeling ingesluit: “Dit is streng verbode om die rok te stryk.”
SKUDDENDE GEBOUE
Volgens die Tokiose koerant Asahi Sjimboen het ’n aantal inwoners van die stad Kawasaki, Japan, kommer uitgespreek oor wat hulle gedink het ’n reeks aardbewings is. “Daar is tye wanneer ons ’n skudding voel wat tot 5 op die seismiese skaal kan registreer”, het die eienaar van ’n sushi-winkel gesê. Daar het water uit die tenk waarin hy vis vir sushi gehou het op sy klante gespat. Die stad Kawasaki se Buro vir Omgewingsbeskerming het die saak ondersoek en die episentrum opgespoor—’n pas geopende saal vir rock-konserte. “Die oorsaak van die skuddings”, het die Asahi Sjimboen berig, was “rock-liefhebbers wat soos een man ritmies op en af gespring het”. Die mensgemaakte “aardbewings” is binne ’n radius van 250 meter van die konsertsaal gevoel.
VIGS IN CHINA
“Dit is ’n sombere feit dat die Vigs-virus in China kop uitgesteek het”, het die tydskrif China Today gesê. Ja, hierdie uitgestrekte land is onlangs by die lang lys lande gevoeg wat deur Vigs getref is. Die tydskrif voeg by dat “wetenskaplike en mediese pogings om Vigs in China te beheer gevolglik gepaard gaan met pogings om die lelike maatskaplike verskynsels uit te wis wat in die eerste plek tot die siekte kan lei—pornografie, prostitusie, dwelmmisbruik, ensovoorts”. Sommige slagoffers is besmet deurdat hulle inspuitings van bloedprodukte ontvang het. Die Chinese regering beperk gevolglik sedert 1984 die invoer van bloedplasma, in ’n poging om die verspreiding van Vigs te vertraag.
SAKE-ETIEK VAN DIE TOEKOMS
’n Studie wat onder 1100 studente oral in Europa gedoen is, toon dat die sakewêreld van die toekoms moontlik onder die beheer sal staan van ’n “nuwe geslag jong mans en vroue wat vooruitstrewend en winsgeoriënteerd is en nie altyd deur goeie beginsels gelei word nie”, aldus die Duitse koerant Wiesbadener Tagblatt. Die koerant het bygevoeg dat daar ’n duidelike neiging is om goeie sake-etiek in die strewe na sukses prys te gee. Meer as 70 persent van diegene wat ondervra is, is van mening dat beginsels weinig of geen plek in die sakelewe het nie.
DODELIKE KIEME
“In stryd met die algemene opvatting het longontsteking nie na die uitvinding van antibiotika as ’n uiters dodelike siekte verdwyn nie. Dit bly die algemeenste doodsoorsaak weens infeksie en is die sesdegrootste doder van Amerikaners”, berig The New York Times. Terwyl ’n aantal hedendaagse gesondheidsmaatreëls, soos antibiotika en entstowwe, die voorkomssyfer van bakteriële infeksie aansienlik laat afneem het, “kan daar nie altyd op [sodanige maatreëls] staatgemaak word om op die laaste oomblik ’n redmiddel te wees nie, veral nie as die kieme deur die liggaam versprei het en sodoende die oorhand gekry het nie”. Die Times het bygevoeg dat “daar uit nagenoeg 500 aansteeklike siektes, vir ongeveer 200 geen doeltreffende behandeling bestaan nie”.
KATOLIEKE EN DIE BYBEL
Volgens die Daily Mirror van Sydney, Australië, het ’n priester in Sydney in die openbaar erken dat Katolieke tradisioneel min Bybelkennis het. Die Katolieke Kerk het besluit om kursusse oor die Bybel in tien voorstedelike sentrums in verskillende plekke in Sydney aan te bied om hierdie gebrek aan Bybelkennis te help regstel. Die beplande kursus sal oor vier termyne van vyf weke strek, en daar word gehoop dat ongeveer 2000 daarvoor sal inskryf. Die Daily Mirror het gesê dat die Katolieke Kerk en die Bybel “vir talle aanbidders nie hand aan hand gaan nie”, en het dus sy artikel gepas van die volgende opskrif voorsien: “Die gelowiges moet weer van voor af leer.”
ALKOHOLISME EN DIE GENETIKA
In ’n onlangse wetenskaplike studie waaroor daar in The Journal of the American Medical Association berig is, beweer wetenskaplikes dat hulle ’n geen geïsoleer het wat mense die gevaar laat loop om alkoholiste te word. Wetenskaplikes waarsku egter dat nie net één geen tot alkoholisme lei nie. Die hoof van die navorsingspan het gesê: “Die goeie Heer het nie ’n alkoholiese geen gemaak nie, maar wel een wat blykbaar by genotsugtige gedrag betrokke is.” En wat meer is, “party mense wat bestudeer is wat die geen het, het nie alkoholiste geword nie, terwyl party wat nie die geen het nie alkoholiste geword het, het [die navorsers] gesê. Maatskaplike en kulturele faktore kan die probleem vir baie alkoholiste laat ontstaan wat nie geneties vatbaar is [daarvoor] nie.”
KINDERSPANNING
Kinders is nie vry van oormatige spanning nie. Die Brasiliaanse tydskrif Superinteressante berig dat die Wêreldgesondheidsorganisasie sê: “Een uit elke vyf kinders in die Westerse wêreld ly aan spanning.” Die algemeenste oorsake van spanning in kinders wat genoem is, is “die skeiding van die ouers en te veel skoolwerk”. Die tydskrif haal Francisco De Fiore, ’n professor in kindergeneeskunde aan die Universiteit van São Paulo, aan wat verduidelik dat “kinders nie kardiovaskulêre probleme het nie aangesien die steeds groeiende hart al die spanning kan verwerk. Maar dit is nie die geval met die maag en die immuniteitstelsel nie. Spanning in kinders is gevolglik gewoonlik sinoniem met slegte spysvertering, voortdurende verkoues en allerhande allergieë.”
GEESTELIKES SE SEDES
Volgens The Toronto Star het die hof die Ottawa-aartsbisdom van die Rooms-Katolieke Kerk in Kanada onlangs beveel om R390 000 te betaal weens versuim om op ’n klag teen een van sy priesters te reageer. Die priester is daarvan beskuldig dat hy jong seuns seksueel aanrand. Die slagoffers se gesinne “het verplig gevoel om hulle tot ’n siviele regsmiddel te wend, want die amptenare, selfs die aartsbiskop, het hulle geïgnoreer toe hulle hul ná die aanrandings tot die kerk om hulp gewend het”, het een regsgeleerde gesê. Volgens die Star het ’n ander regsgeleerde gesê dat amptenare van die Katolieke Kerk, wanneer hulle van klagtes oor kindermolestering te wete kom, die priesters nog al die jare as geestelikes laat aanbly. Hy het gesê: “Pleks dat hulle die priesters by die polisie aangee of hulle uit hul geledere uitskop soos die meeste ander instellings, het hulle die priesters, uit lojaliteit teenoor hulle eie, net in die geheim rondgeskuif.”