Die prys van oneerlikheid

CASEY LUNSFORD se niere het begin ingee. Volgens geneeshere sou die drie en ’n halfjarige seuntjie nog net drie of vier maande lewe tensy hy ’n nieroorplanting kry. Sy ouers, wat Getuies van Jehovah is, het ten gunste van die operasie besluit; trouens, Casey se pa sou een van sy eie niere aan die seuntjie skenk.a Hulle enigste voorwaarde was dat geen bloed gebruik moes word nie—Jehovah se Getuies weier bloedoortappings om skriftuurlike redes.—Sien Handelinge 15:20.

Die Lunsfords wou die operasies in ’n hospitaal in Texas laat doen wat daarvoor bekend is dat hulle al suksesvolle nieroorplantings sonder bloedoortappings gedoen het. Maar ’n hospitaal wat ’n paar kilometer van die Lunsfords se huis in Kalifornië is, was bereid om die oorplanting sonder ’n bloedoortapping te doen. Die Lunsfords het hierdie nabygeleë hospitaal gekies.

Die hospitaalpersoneel en die chirurg wat die oorplanting sou doen, het die ouers gedurende die week voor die operasie herhaaldelik verseker dat daar geen nodigheid sou wees vir ’n bloedoortapping of vir ’n hofbevel wat een sou magtig ten spyte van die ouers se beswaar nie. Maar die chirurg het, direk nadat die ouers tot die operasie ingestem het, reëlings begin tref om ’n hofbevel te kry om Casey ’n bloedoortapping te gee. Hy het dit selfs reggekry om ’n maatskaplike werkster wat by die geval betrokke was te laat vervang toe sy daarop aangedring het dat die ouers ’n reg het om te weet as daar ’n hofbevel is. Die oggend van die operasie het die hospitaal ’n skriftelike verklaring ingedien wat ’n hofbevel vra om Casey ’n bloedoortapping te gee. Die verklaring het dit laat klink asof Casey reeds op ’n operasietafel lê en bloei, toe daar in werklikheid nog nie eens met die operasie begin is nie! Casey is ’n uur na die operasie, wat met welslae sonder bloed gedoen is, ’n bloedoortapping gegee.

Die Lunsfords het die chirurg en die hospitaal gedagvaar weens die skending van hulle burgerregte en weens bedrog, aanranding, opsetlike berokkening van emosionele leed en die misbruik van vertroue. Na ’n verhoor van vier weke het die jurie twee en ’n half dae lank beraadslaag en uitspraak teen die chirurg en die hospitaal gelewer. Hulle is beveel om die Lunsfords ’n som van R1300 000 te betaal.

Hoewel die verhoorregter die vonnis oor die skending van burgerregte nou verwerp het en ’n nuwe verhoor vir die bedrog en ander aanklagte gelas het, was die 12 lede van die jurie oortuig dat die hospitaal en die dokter se bedrog die toekenning van R1300-000 geregverdig het. Prokureurs vir die gesin het gesê hulle sal probeer om die jurie se besluit deur middel van ’n appèlsaak te handhaaf.

[Voetnoot]