Wat oefening vir jou kan doen
’NMYLPAALSTUDIE onder 17 000 oud-studente van Harvard wat vier jaar gelede in The New England Journal of Medicine beskryf is, het getoon dat liggaamsoefening ’n oorgeërfde neiging tot ’n vroeë dood kan teenwerk. Dr. Ralph S. Paffenbarger jr., direkteur van die studie, het tot die volgende slotsom gekom: “Jy is gesond omdat jy aktief is.”
In Junie 1989 het The Journal of the American Medical Association gesê: “Fisiese aktiwiteit is al met die voorkoming en beheer van etlike mediese toestande, soos koronêre hartsiekte, hipertensie [hoë bloeddruk], . . . en probleme met geestesgesondheid geassosieer.” Dit het bygevoeg: “In ’n persoon wat fisies onaktief is, is die kanse dat koronêre hartsiekte sal ontwikkel 1,9 keer groter as in ’n persoon wat fisies aktief is. Hierdie verband is indrukwekkend.”
In November 1989 het hierdie selfde mediese tydskrif ’n studie gepubliseer waarby 13 344 proefpersone betrokke was, en dit het die waarde van oefening verder toegelig. Die omvattende studie het getoon dat selfs minimale oefening—soos om een keer per dag ’n halfuur lank vinnig te stap—aansienlike beskerming teen sterfte weens ’n groot verskeidenheid oorsake tot gevolg het.
Dr. Norman M. Kaplan, wat aan die Southwestern Medical School van die Universiteit van Texas in Dallas verbonde is, ’n gesaghebbende op die gebied van hipertensie, sê dat hy van mening verander het oor die waarde van oefening in die behandeling van hoë bloeddruk. “Namate ek die getuienis oor die afgelope drie of vier jaar sien ophoop het, het ek mense meer begin aanmoedig om te oefen.”
Dr. Kaplan skryf nou aërobiese oefening voor aan pasiënte met hoë bloeddruk. “Ek raai my pasiënte aan om hulle polsslag te verhoog”, verduidelik hy. “Ek raai mense aan om stadig te begin. Moenie oorhaastig te werk gaan nie. Begin deur te loop en stadig te draf en doen geleidelik meer. Hou onmiddellik op as jy enige probleme ondervind.” Om te verseker dat oefening werklik jou gesondheid bevoordeel, moet jy gereeld oefen, verkieslik drie of vier keer per week en minstens 20 tot 30 minute op ’n keer.