Hy was gereed om ander te help

TERWYL een van Jehovah se Getuies in Miami, Florida, by die Kriminele Verkeershof in die Dade-distrik gewerk het, het hy die geleentheid gehad om sy medewerkers geestelik te help. “Op ’n dag”, het Rafael geskryf, “het ’n vrou wat gereeld eksemplare van die Wagtoring en Ontwaak! van my ontvang, gesê dat ’n verkoopsman ’n Bybelensiklopedie van [R1250] vir haar agtjarige seun aan haar wou verkoop, maar dat sy dit nie kon bekostig nie. Ek het dadelik aangebied om vir haar die enkele publikasie My boek met Bybelverhale te bring. Ek het dit die volgende dag gebring, en sy het baie van die illustrasies gehou en die boek geprys.

“Sy het die boek op haar lessenaar neergesit en verder gewerk. Skaars 15 minute later het ’n ander kollega na my lessenaar gekom met My boek met Bybelverhale in haar hande; sy wou weet waar ek dit gekry het. Ek het verduidelik dat die Wagtoringgenootskap dit uitgee. Sy wou drie boeke vir haar kinders hê. Sy is ’n Sondagskoolonderwyseres en het gemeen dat die boek vir haar klas ’n aanwins sou wees. Sy het gesê dat sy my later sou laat weet hoeveel sy nog wou hê.

“’n Halfuur later het nog ’n kollega met die boek na my gekom, en sy wou weet of sy drie kon kry. Gou het ander ook vir boeke gevra, en toe ek my kom kry, het ek bestellings vir 12 eksemplare van My boek met Bybelverhale gehad. Die vroue was selfs kwaad omdat ek nie vroeër vir hulle van die boek vertel het nie! Ek het die boeke die volgende werksdag na die kantoor gebring en hulle aan diegene gegee wat daarvoor gevra het.

“Die Sondagskoolonderwyseres het die daaropvolgende week gesê dat sy nog 15 boeke vir haar leerlinge nodig het. Sy het vir die priester en die skoolsuperintendent se toestemming gewag. Die priester, het sy gesê, het baie van die boek gehou en het die baie illustrasies geprys. Hy het toestemming gegee dat die boeke aangekoop kon word.

“Die Sondagskoolonderwyseres wou die boeke as Kersgeskenke vir die kinders gee. Sy het gesê sy weet ek vier nie Kersfees nie, maar dat die boek ’n puik Kersgeskenk is. Sy het ook vir my gesê hoe maklik dit is om die kinders se aandag te hou wanneer sy vir hulle uit die boek voorlees.

“Een medewerker het gesê dat sy elke aand vir haar kinders uit die boek lees en dat selfs sý dinge leer. Sy het byvoorbeeld nooit geweet dat daar werklik reuse in Noag se dag op die aarde geleef het nie. ’n Ander kollega het gesê dat dit ’n genie moes wees wat die illustrasies in die boek gedoen het. Hulle is so eg. ‘Die boek is ’n juweel’, het sy gesê.

“In ’n kwessie van net ’n paar dae het ek altesaam 32 eksemplare van My boek met Bybelverhale by die werk versprei, en die getal neem steeds toe. Elke keer wanneer ek die boek vir iemand wys, vra hulle: ‘Waar kry jy dit?’”

Is jy wakker om ander geestelik te help? Rafael, nou ’n Christen- ouere man in ’n gemeente van Jehovah se Getuies in Miami, sluit af: “Hierdie ondervinding het my ’n les geleer oor informele getuieniswerk en gewilligheid om ander te help.”