Wat van die toekoms?

Waarom is vrede tussen mens en dier so aanloklik? Dit is omdat die mens oorspronklik geskep is om in vrede met die diere te leef, selfs dié wat as wild beskou word.

Toe God die eerste man en vrou gemaak het, het hy hulle in ’n paradysgebied van die aarde geplaas om die lewe te geniet. Dit was sy voorneme dat hulle kinders moes hê en die grense van daardie oorspronklike Paradys uitbrei totdat dit die hele aarde beslaan het. In daardie hele ryk sou die mens in vrede oor die diere heers.

Die Genesisverslag lui: “Laat hulle heers oor die visse van die see en die voëls van die hemel en die vee en oor die hele aarde en oor al die diere wat op die aarde kruip. . . . Toe sien God alles wat Hy gemaak het, en—dit was baie goed.”—Genesis 1:26-31; 2:9.

Hierdie onderwerping van die diere moes nie met onmenslikheid gepaard gaan nie. Mense en diere moes in vrede saamlewe. Dit blyk uit die feit dat die mens ongewapend was toe die diere voor hom verskyn het om name te kry. En daar word nie gesê dat mens of dier bang was nie.—Genesis 2:19, 20.

Oorspronklike voorneme sal vervul word

Gelukkig sal daardie oorspronklike voorneme van God binnekort uitgevoer word wanneer alle mensgemaakte regerings vervang is deur die Koninkryk van God wat vanuit die hemel regeer (Daniël 2:44; Mattheüs 6:9, 10). Wanneer regering deur God ten volle oor die hele aarde herstel is, sal God se oorspronklike voorneme met die aarde en sy mense- en dierebewoners vervul word.

Die vernuwingseffek van God se regverdige heerskappy word pragtig in baie Bybelprofesieë beskryf. Let byvoorbeeld op wat Jesaja onder inspirasie geskryf het: “Dan wei die wolf by die lam, en die luiperd gaan lê by die bokkie, en die kalf en die jong leeu en die vetgemaakte vee bymekaar, en ’n klein seuntjie sal hulle aanja. Die koei en die berin wei, en hulle kleintjies lê bymekaar; en die leeu eet strooi soos die os. Hulle sal geen kwaad doen of verderf aanrig op my hele heilige berg nie; want die aarde sal vol wees van die kennis van die HERE soos die waters die seebodem oordek.”—Jesaja 11:6, 7, 9.

Ander profesieë toon ook die groot vrede wat daar in God se nuwe wêreld sal bestaan. In hierdie verband het Miga voorspel: “Hulle sal van hul swaarde pikke smee en van hul spiese snoeimesse; nie meer sal nasie teen nasie die swaard ophef nie, en hulle sal nie meer leer om oorlog te voer nie. Maar hulle sal sit elkeen onder sy wingerdstok en onder sy vyeboom, sonder dat iemand hulle verskrik.”—Miga 4:3, 4.

Geeneen van die wilde diere sal dan die mensdom se vrede versteur nie, want God se profetiese woord sê: “Ek sal ’n verbond van vrede met hulle sluit en die wilde diere uit die land laat verdwyn; en hulle sal veilig bly in die woestyn en slaap in die bosse. . . . En hulle sal veilig wees in hul land.”—Esegiël 34:25, 27.

Die vrede en harmonie oor die hele herstelde Paradys sal dus volkome wees. Daarom kan die toestande aldaar soos volg in die laaste boek van die Bybel beskryf word: “God sal al die trane van hulle oë afvee, en daar sal geen dood meer wees nie; ook droefheid en geween en moeite sal daar nie meer wees nie, want die eerste dinge het verbygegaan. En Hy wat op die troon sit, het gesê: Kyk, Ek maak alles nuut. En hy het aan my gesê: Skryf, want hierdie woorde is waaragtig en betroubaar.”—Openbaring 21:4, 5.

Ja, waaragtig en betroubaar. Dit beteken dat ons op God se beloftes kan staatmaak, want in teenstelling met onvolmaakte mense beskik hy oor die mag, die wysheid en die vasberadenheid om sy voornemens uit te voer. Dit is net soos een van God se getroue knegte in die ou tyd gesê het: “Nie een woord van al die goeie woorde wat die HERE julle God oor julle gespreek het, [het] onvervuld gebly . . . nie; alles het vir julle uitgekom, nie een woord daarvan het onvervuld gebly nie.”—Josua 23:14; sien ook Jesaja 55:11.

Ons kan dieselfde vertroue hê dat God se oorspronklike voorneme vir hierdie aarde binnekort in sy nuwe wêreld vir mense en diere vervul sal word. Godgegewe vrede sal ’n wêreldwye werklikheid word. En sulke vrede sal nie net onder mense heers nie, maar dit sal ook in die diereryk weerspieël word.