Waarom doen hulle dit dan?
“Ek is self ’n roker, maar ek kan nie die feit ontken dat dit absolute dwaasheid is om te rook nie. Enigeen met ’n bietjie verstand weet nou dat rook ’n mens se gesondheid bedreig. Dit is ’n vuil, smerige gewoonte wat ’n klomp geld kos. . . . Die lewe van rokers word gekenmerk deur vuil asbakkies, nikotienvlekke, brandmerke en hoë rekeninge by die droogskoonmakery—die gevolg van klere wat na rook ruik.”—Diane Francis, die tydskrif Maclean’s, Kanada.
“Rokers kan verwag om korter te lewe as nie-rokers: die lewe van ’n 25-jarige wat 2 pakkies sigarette per dag rook, sal byvoorbeeld 8,3 jaar korter wees as dié van ’n nie-roker. Rokers se kanse om aan longkanker te sterf is 3 maal groter as nie-rokers s’n.”—The Columbia University College of Physicians and Surgeons Complete Home Medical Guide.
“Sigarette veroorsaak elke jaar die dood van meer Amerikaners as wat daar gesamentlik in die Eerste Wêreldoorlog, die Koreaanse oorlog en Viëtnam gedood is; byna net soveel as wat daar in gevegte in die Tweede Wêreldoorlog gesneuwel het. Elke jaar laat sigarette vyf keer meer Amerikaners sterf as wat daar in motorongelukke omkom. Longkanker alleen dood net soveel mense as wat daar op die paaie sterf. Die sigaretbedryf smous met ’n dodelike wapen” (Senator Robert F. Kennedy, Eerste Wêreldkonferensie oor Rook en Gesondheid, 11 September 1967).—The Cigarette Underworld, onder redaksie van Alan Blum, M.D.
“Tabak veroorsaak elke jaar die dood van ongeveer twee en ’n halfmiljoen mense dwarsdeur die wêreld. Dit is die grootste enkele, voorkombare oorsaak van sterftes in die wêreld vandag. . . . In watter vorm dit ook al gebruik word, dit is ’n gevaarlike, duur en verslawende gewoonte.”—Dr. Judith Mackay, uitvoerende direkteur van die Hongkongse Raad oor Rook en Gesondheid, wat in die tydskrif World Health aangehaal is.
“As die tabaknywerheid my brood en botter was, het daardie selfde nywerheid die dood van miljoene mense veroorsaak en sal dit aanhou om die dood van miljoene meer te veroorsaak tensy mense bewus word van die gevare wat sigarette inhou. . . . Ek wil help om mense wakker te skud sodat hulle kan besef hoe giftig sigarette is.”—Patrick Reynolds, kleinseun van die stigter van R. J. Reynolds Tobacco Company.
Waarom rook miljoene mans, vroue en jongmense dan tabak? In party se geval is dit moontlik portuurdwang, die begeerte om gesofistikeerd te lyk. Maar in baie se geval is dit eenvoudig verslawing wat kompulsief word. Soos een mediese raadgewingsdeskundige sê: “Die werklike rede waarom die meeste mense rook, is omdat hulle verslaaf is aan ’n kragtige dwelm wat in tabak gevind word—nikotien.”
Hoe kan ’n roker dan ophou? Deur sterk motivering te verkry, sterker as die liggaam se drang na nikotien. Dit sal beteken dat iemand wat Christelike standaarde probeer handhaaf, ’n liefde vir God en sy naaste moet aankweek wat die selfsugtige begeerte van die vlees sal oormeester.—Mattheüs 22:37-40; 1 Korinthiërs 13:5, 7, 8.
Soos die mediese boek, wat vroeër aangehaal is, sê: “Rokers wat wil ophou, moet die verslawende eienskap van die dwelm nikotien in gedagte hou en daarop voorbereid wees om onttrekkingsimptome te ervaar as ’n natuurlike gevolg wanneer hulle ophou rook. Hulle moet onthou dat onttrekking ’n tydelike toestand is wat, hoewel dit onaangenaam is, nie skadelik is nie. Elke tabakgebruiker, ongeag hoe verslaaf hy is, kan ophou rook.”—The Columbia University College of Physicians and Surgeons Complete Home Medical Guide.
As jy hulp verlang om die soort motivering aan te kweek wat nodig is om op te hou rook, kan jy gerus met Jehovah se Getuies in verbinding tree by hulle Koninkryksaal in jou omgewing of deur die uitgewersadres in hierdie tydskrif.