Brief van ’n goedgesinde

’N BRIEF is onlangs ontvang van ’n goedgesinde persoon in ’n Afrika-land waar die werk van Jehovah se Getuies verbied is. Die man het geskryf:

“Geagte Meneer

“Ek sal met die deur in die huis val; ek wil u net daaraan herinner dat die regering hier julle kerk se bedrywighede verbied het. Hoe kwaad maak dit my tog nie!

“Ek kry nie meer my Ontwaak! gereeld nie. Maar dit kan ek sê: Ontwaak! is seker die beste tydskrif wat ek ooit geken het. Dit gee raad aan lesers oor hoe om hulle lewe, op ’n wettige en geestelike wyse, met welslae en behoorlik te rig. Dit is ’n wonder.

“Ek is seker dat geen lektor aan ’n universiteit so baie kennis het of met soveel detail onderrig nie. Ons ‘leraars’ vaar nog slegter. En tog sê ons regering dat hierdie en soortgelyke tydskrifte, wat so leersaam is, verbode is. Waarom? Omdat die uitgewers nie die vlag salueer nie. Goed.

“Maar een vraag: Kan daar gesê word dat iemand wat die vlag salueer en dan die land se geld verduister, omkoopgeskenke aanvaar, belasting ontduik, moord pleeg, ensovoorts getrou is? Dit is wat ons ‘Christene’ doen. Hulle salueer die vlae op die paradeterrein en neem hulle selfs in hulle kerke in om hulle daar te salueer. Danige Christene! Ek weet ek is nie volmaak of selfs goed in God se oë nie. Maar dit is vanselfsprekend nie reg nie.

“Julle Getuies salueer nie die vlag nie, aanvaar nie bloedoortappings nie, vier nie Kersfees of Paasfees nie en neem selfs ’n fermer standpunt in teen misdaad, geldverduistering, omkopery, moord. En julle neem ook nie aan owerspel en hoerery deel nie. Noem die euwels, en die Getuies sal beslis weier om dit te doen.

“Ek hoop en bid dat die regering die ware toedrag van sake sal sien en julle kerk sy vryheid om te onderrig, sal toestaan.”