Ons beskou die wêreld
Getuies wetlik erken in Mosambiek
Die predikingsbedrywigheid van Jehovah se Getuies het wetlike erkenning gekry in Mosambiek, ’n land in suidoos-Afrika. ’n Brief van die Ministerie van Justisie, gedateer 11 Februarie 1991, lui: “Jehovah se Getuies geniet, soos ander godsdiensinstellings, al die regte en waarborge wat in die grondwet van die Republiek van Mosambiek bepaal is.” Dit is geteken deur die land se Direkteur van Godsdienssake. Hierdie goeie nuus is vreugdevol verwelkom deur die 5235 Getuies in daardie land wat gedurende die afgelope Januarie gerapporteer het dat hulle aan die verkondiging van die Bybelse boodskap deelgeneem het. Die 13 971 byeenkomsgangers wat die drie “Suiwer Taal”-Streekbyeenkomste bygewoon het wat onlangs in Mosambiek gehou is en waartydens 357 gedoop is, is ook dankbaar vir die verklaring van amptelike erkenning.
Goeie nuus uit die USSR
Op 28 Maart 1991 het die Minister van Justisie ’n dokument oorhandig aan verteenwoordigers van Jehovah se Getuies waarin wetlike erkenning aan hulle in die Sowjetunie toegestaan word.
Slagoffers van Buchenwald
Die naam Buchenwald laat gedagtes van afgryse deur die verstande van diegene gaan wat Nazi-Duitsland onthou. Buchenwald is geleë naby Weimar, in wat tot onlangs Oos-Duitsland was, en was ’n konsentrasiekamp wat berug was vir sy wreedheid teenoor ’n kwartmiljoen gevangenes. Vandag is dit ’n openbare gedenkteken en museum vir die slagoffers van hierdie euwels; tog is daar steeds baie geskille daaroor. Ulrich Schneider, die nuwe direkteur van die gedenkteken, is aangestel om lig te werp op die identiteit van die 65 000 slawe-arbeiders wat daar gesterf het. “Dit is byvoorbeeld heeltemal gepas dat hier ’n gedenkteken vir Sowjet-soldate is”, het hy gesê. “Maar baie Franse, Belge en Hollanders het ook hier gesterf, en daar is heeltemal te min aandag aan hulle gegee.” Hy het ook genoem dat dit nodig is om “’n baie duideliker verslag” van ander groepe, waaronder Jehovah se Getuies, te gee.
Akupunktuur vir troeteldiere
Volgens The Wall Street Journal erken die Amerikaanse Veeartsenykundige Mediese Vereniging nou akupunktuur as ’n aanvaarbare behandeling vir siek diere. Die koerant sê dat “veeartsenykundige akupunktuur, wat vroeër as kwaksalwery afgemaak is, homself bewys het as ’n alternatiewe behandeling sonder verdowingsmiddels wat nuttig is wanneer konvensionele metodes misluk”. Sommige veeartse gebruik lae-intensiteit lasers, ultraklank en ander benaderings om die akupunktuurpunte in diere te stimuleer. Na berig word, is dit suksesvol om honde, perde, voëls en selfs goudvissies te behandel deur baie fyn vlekvrye staalnaalde in verskeie reflekspunte in die liggaam te steek.
Godsdiens in Chinese plattelandse gebiede
Wang Zhen, China se vise-president, sê dat boerderygemeenskappe in China deur Westerse godsdienste oorgeneem word, volgens die South China Morning Post en ’n berig in die Verenigde State se Chinese koerant World Daily. Wang Zhen sê in die boerderygemeenskappe, waar 70 persent van die bevolking woon, “wil al hoe meer mense by die kerke aansluit”.
Te veel eer?
Verenigde Metodis-gemeentes moet ander maniere vind om hulle biskoppe te vereer, maniere wat nie ontsaglike finansiële meevallers insluit nie. Dit word aanbeveel deur ’n studie deur ’n Metodistiese teologiese skool in die Verenigde State. Die studie het bevind dat die gemeentes dikwels kontantgeskenke van tot R100 000 en motors ter waarde van tot R50 000 aan biskoppe gee wat aftree of verplaas word. Christianity Today sê: “Daar was ’n tyd toe sulke gawes moes vergoed vir die klein salaris wat kerkamptenare ontvang het. Maar van volgende jaar af sal ’n biskop van die VM [Verenigde Metodiste] se salaris meer as [R165 000] wees. Daarbenewens ontvang biskoppe gratis behuising en ’n kantoortoelaag van [R102 500].”
Passiewe rokery
Die rook wat deur tabakrokers uitgeblaas word, word dikwels onwillekeurig deur nie-rokers ingeasem. Volgens ’n onlangse studie eis hierdie passiewe rokery nou die lewe van duisende in Australië. Daar word geglo dat “meer as 1 000 nie-rokende Australiërs elke jaar aan hartsiekte sterf, wat aan passiewe rokery toegeskryf kan word”, het The Australian berig. Die koerant het gesê dat hierdie ‘tweedehandse rook’ koolstofmonoksied en nikotien bevat, wat die werking van die hart en “die vermoë van die bloed om suurstof na die hart en die res van die liggaam te vervoer”, belemmer. Die studie het tot die slotsom gekom dat “vir elke agt rokers wat weens tabak sterf, een nie-roker weens blootstelling aan rook sterf”.
Wêreld se grootste medisyneverbruikers
Die tydskrif L’Express van Parys berig dat die Franse die wêreld se grootste verbruikers van voorskrifmedisyne is. Hulle het in 1989 90 duisendmiljoen frank (R45 miljard) aan medisyne bestee wat ’n gemiddeld is van 1598 frank (R799) per persoon. Volgens die Franse koerant La Croix gebruik die Franse vyf keer meer kalmeermiddels en slaappille as die Amerikaners. Die probleem kom oral voor en raak alle ouderdomsgroepe. Baie vrees nou dat verslawing ’n wesenlike gevaar is. Een uit vyf adolessente verlaat die dokter se spreekkamer met ’n voorskrif vir slaappille of kalmeermiddels. Vyftien persent van kinders onder die ouderdom van een jaar ontvang gereeld kalmeermiddels om senuagtigheid en voedingsprobleme te behandel. Die dagblad Le Figaro berig dat tussen 25 en 30 persent van volwassenes in Frankryk die een of ander soort kalmeermiddel gereeld oor ’n lang tydperk gebruik.
Australiese sonkragwedren
’n Verskeidenheid uitheemse uitvindsels met wiele—39 van hulle van oor die hele wêreld—het op 11 November 1990 van Darwin, in Noord-Australië, na Adelaide aan die suidelike punt van die eilandkontinent vertrek. Die eerste van die voertuie het ses dae later daar aangekom. Hulle het die reis van 3 000 kilometer afgelê deur net die krag van die son se strale te gebruik. Hierdie wedren, die tweede Wêreldsonkrag-uitdaagwedren, is deur die Switserse inskrywing, die Spirit of Biel, gewen. Die wenner se gemiddelde spoed was 70 kilometer per uur, en hy het soms snelhede van tot 100 kilometer per uur bereik. Die naaswenner, wat 400 kilometer agter die wenner was, het sowat R37 500 000 gekos om te bou, berig die tydskrif Asiaweek. Die Spirit of Biel het egter net R1 500 000 gekos.
Boekdiewe
Bibliotekarisse en ander in die boeknywerheid is besorg oor die toename in diefstal van boeke. Volgens The New York Times Book Review sê Mary Ellen Quinn, direkteur van versamelingsontwikkeling vir Chicago se Openbare Biblioteek, dat ‘die biblioteekstelsel elke jaar waarskynlik soveel boeke koop as wat daar gesteel word’. Sommige dokters, joernaliste, prokureurs, seminariste, onderwysers en selfs bibliotekarisse kom voor op die lys van boekdiewe, en een deskundige het gepraat van mense wat boeke steel as “van die beste mense in die wêreld”. Navorsers beweer dat die Bybel “onteenseglik die boek is wat die meeste gesteel word, ’n algehele gunsteling wat mense nie kan weerstaan om te steel nie”.
Hoër risiko vir verwers
Volgens ’n afdeling van die WGO (Wêreldgesondheidsorganisasie) in Lyon, Frankryk, het verwers ’n 20 persent groter kans om kanker te kry as die res van die bevolking. Die Duitse tydskrif Naturwissenschaftliche Rundschau berig: “Die risiko om longkanker te kry word in hierdie beroep tot selfs 40 persent bo die gemiddelde vergroot. Die risiko om ’n siekte van die sentrale en perifere senustelsel te ontwikkel, is ook opvallend hoër.” Die tydskrif beweer dat selfs die kinders van sommige verwers dalk deur hulle ouers se beroep geraak kan word; dit lyk of hulle ’n groter risiko loop om breingewasse en bloedkanker te kry. Volgens die WGO is die oplosmiddels in verf en vernis die bron van die gevaar, nie verfwerk as ’n beroep op sigself nie.
Molestering van vroulike geestelikes
In ’n opname wat gemaak is deur die Verenigde Metodistekerk in die Verenigde State het meer as driekwart van die kerk se vroulike geestelikes gesê dat hulle seksueel lastig geval is. Volgens die Ecumenical Press Service (die nuusdiens van die Wêreldraad van Kerke) het dieselfde opname ook getoon dat 41 persent van daardie kerk se vroulike geestelikes gesê het dat “kollegas of ander pastors hulle seksueel lastig geval het”.