Jongmense vra . . .

Hoe kan ek my teen ’n bende-aanval beskerm?

EEN koel herfsaand het die 12-jarige Tom na die winkel in sy buurt geloop om ’n paar goedjies te gaan koop. Tom was senuagtig omdat hy in die gebied van ’n plaaslike straatbende was, en dit was spoedig duidelik dat sy vrese gegrond was. Sonder waarskuwing het verskeie lede van die bende op hom toegesak en hom op die grond neergegooi terwyl hulle vuiste op hom gereën het.

As gevolg van die voorspelde ‘vermeerdering van die ongeregtigheid’ woon baie mense in buurte wat selfs vir die owerhede te gewelddadig is om te beheer (Mattheüs 24:12). En as jy in ’n gebied woon waar bendebedrywighede volop is, klink Tom se ondervinding moontlik vir jou maar alte bekend. Dink byvoorbeeld aan die situasie in die Los Angeles-distrik, VSA. Volgens die tydskrif Maclean’s was die helfte van die 257 bendeverwante moorde, wat in 1988 daar gepleeg is, redelose moorde op nie-bendelede! Gevolglik bevind jongmense wat in gebiede woon waar bendes bedrywig is hulle voor ’n werklike uitdaging: hoe om hulle te beskerm.

’n Vorige artikel het getoon hoe dwaas dit is om by ’n bende aan te sluit.a Dit het verduidelik dat die gevaar om beseer, gearresteer of selfs doodgemaak te word, in werklikheid groter is as jy lid van ’n bende is. En dit sou strydig wees met die Bybel se raad in Jesaja 2:4 en Mattheüs 26:52 om ’n mes, ’n rewolwer of enige ander soort wapen te dra. Boonop is die kanse goed dat dit eerder ’n konfliksituasie sal vererger as om dit te ontlont. Dieselfde geld as ’n mens die verweerkunste, soos judo of karate, as selfverdediging beoefen. Daarom is dit in die eerste plek beter om ’n bendekonfrontasie te vermy. Maar hoe?

Bendes en hulle kleure

Let eerstens op jou kleredrag, persoonsversorging en gedrag. Baie bendes dra kenmerkende klere, kleure of monderings wat hulle van ander bendes onderskei. ’n Serp of selfs die manier waarop ’n hoed gedra word, kan te kenne gee dat jy aan ’n bende behoort. Bendes leer dikwels sekere gebare en hulle eie woordeskat en liggaamshouding aan.

Die probleem is dat bendekleure en ander dergelike kentekens dikwels die mode onder jongmense in die algemeen word—met inbegrip van nie-bendelede. Die Kanadese koerant The Globe and Mail het gesê: “Party adolossente aap die kleredrag van sekere bendes na, al is hulle nie lede nie. . . . Hulle probeer moontlik om ander tieners te beïndruk.”

Party jongmense meen blykbaar dat dié spesiale drag hulle na ’n breker sal laat lyk. Ander redeneer dat hulle ’n mate van beskerming sal geniet as hulle in bendekleure uitgedos is. Hulle meen dat party hulle nie so maklik sal beledig nie, aangesien hulle hulle as lid van ’n sekere bende sal aansien. Is dit ’n gesonde redenasie? Hoegenaamd nie. The Globe and Mail het ronduit gesê: “Hulle loop gevaar om ’n afranseling te kry as die regte bendelede hulle gewaar.”

Bernard, wat vroeër ’n bendelid was maar nou een van Jehovah se Getuies is, bevestig hierdie waarneming. Terwyl hy aan die vroeër jare terugdink, sê hy: “As iemand soos een van ons aangetrek het en hy nie een van ons was nie, sou hy heel waarskynlik ’n teiken gewees het. Hy sou òf by ons moes aansluit òf hy sou seerkry.”

Dit is raadsaam om anders te wees!

Hierdie besef behoort jou in jou keuse van kleredrag te lei. Sê die manier waarop ons aantrek nie tog iets van ons nie—identifiseer dit ons nie selfs nie? Duisende jare gelede toe daar nog aan die Bybel geskryf is, was dit al waar. In die boek 2 Konings lees ons van party boodskappers wat ’n berig aan koning Ahasia van Israel gebring het. Hulle het hom vertel dat hulle ’n man ontmoet het wat hulle ’n sekere boodskap gegee het. Die koning het gevra: “Hoe was die voorkoms van die man?” Toe hulle sy klere beskryf het, het die koning dadelik gesê: ‘Dit was Elia, die profeet!’ Hoe het hy dit geweet? Dit was omdat Elia die kenmerkende kleed van ’n profeet gedra het (2 Konings 1:5-8). Vandag, net soos destyds, kan die manier waarop ons aantrek ons onder sekere klasse mense laat tel, al doen ons nie wat hulle doen of glo ons nie wat hulle glo nie. Ander sal geneig wees om aan te neem dat ons ons ten minste vereenselwig met die klas mense wat so aantrek.

Michael, ’n gewese bendelid wat in Sports Illustrated aangehaal is, sê: “Die skoene, die baadjies en die hoede is net simbole . . . Ek kan in die straat af ry en ’n bendelid uitken net aan die manier waarop hy of sy aantrek.”

Hoe onverstandig sal dit tog van ’n jong Christen wees om in sy persoonsversorging, manier van aantrek, loop en praat, of selfs sy liggaamshouding, die lede van ’n straatbende na te volg! Jesus se raad om “nie van die wêreld” te wees nie, sal veral in dié verband baie gepas wees (Johannes 17:16). Trouens, bendelede vind dit gewoonlik nie moeilik om diegene uit te ken wat nie by hulle hoort nie. Michael sê: “Ons sien ’n ou met ’n deftige langbroek, ’n mooi oortrektrui en leerskoene. Jy sou my nie kon oortuig dat hy ’n bendelid is nie.”

Bernard, wat vroeër aangehaal is, voeg by: “Bendelede trek dikwels volgens die nuutste mode aan.” In die lig hiervan moet ons versigtigheid en sorg aan die dag lê voordat ons die kleredrag en persoonsversorging volg wat miskien by die skool of in die buurt gewild is, maar wat jou maklik weens ’n misplaaste identiteit die teiken vir bendegeweld kan maak. Dit kan ’n beskerming wees om op ’n beskeie manier aan te trek.—Vergelyk 1 Timotheüs 2:9.

Wees ook versigtig watter taal en woordeskat jy gebruik. As jy probeer wys dat jy soos die ander is deur sleng te gebruik wat algemeen onder bendelede gebruik word, kan jy maklik die aandag van bendelede op jou vestig. Vermy dit om voor te gee dat jy ’n breker is. Onthou: “’n Lewendige hond is beter as ’n dooie leeu.”—Prediker 9:4.

Nog ’n voorsorgmaatreël is om nie “’n vriend van die wêreld” in jou keuse van metgeselle te wees nie (Jakobus 4:4). Jy reken dalk dat dit tot jou voordeel kan strek om ’n paar “breker”-vriende te hê. Maar na aanleiding van sy ondervinding met bendes sê Bernard: “As jy vriende het wat aan ’n bende behoort, sal hulle heel waarskynlik druk op jou uitoefen om by die bende aan te sluit.” Jy moet selfs versigtig wees as jy bendelede op die pad na die lewe probeer help.—Mattheüs 28:19.

Ja, jou beste beskerming kan heel moontlik jou reputasie as ’n voorbeeldige Christen wees. Omdat jy nie saam met ‘hulle in dieselfde uitgieting van losbandigheid loop nie laster hulle’ jou (1 Petrus 4:4). Maar hulle sal jou dalk ook teësinnig respekteer. Moontlik sal hulle jou ten minste as ’n onwaarskynlike kandidaat vir hulle bende beskou.

Vermy gevaar

’n Goeie reputasie is nietemin nie altyd genoeg om jou teen gevaar te beskerm nie. Spreuke 27:12 gee hierdie goeie raad: “As ’n skrandere die onheil sien, verberg hy hom; maar die eenvoudiges gaan verder, word gestraf.” Hierdie goeie raad beklemtoon hoe belangrik dit is om onderskeidingsvermoë aan die dag te lê en waaksaam te wees wanneer jy jou in potensieel gevaarlike situasies bevind. As jy byvoorbeeld na ’n sekere plek of geleentheid genooi word, vra jou af: Wie sal daar wees? Is dit ’n bekende bendevergaderplek?

Een gewese bendelid gee soortgelyke raad: “Vermy plekke waar bendes bymekaarkom. As dit moontlik is, neem ’n alternatiewe roete.” Ja, vermy dit om onnodig in gebiede in te gaan wat daarvoor bekend is dat hulle onveilig is. En as geweld uitbreek, moet jy nie toelaat dat nuuskierigheid jou jou lewe kos nie. Spreuke 17:14 sê: “Die begin van ’n onenigheid is soos water wat jy laat deurbreek; daarom, laat die twis vaar voordat dit losbreek.”

Maar sê nou jy word deur persone gekonfronteer wat wil hê jy moet by hulle bende aansluit ten spyte van al jou pogings om probleme te vermy? Sê kalm dat jy nie by hulle kan aansluit nie. Jong Getuies van Jehovah voeg dikwels by dat hulle hul tyd en energie in die Christelike bediening gebruik. Wat jy ook al sê, vermy ’n oneerbiedige of vyandige houding. Jesus het in Mattheüs 10:16 vir sy dissipels gesê: “Wees dan versigtig soos die slange en opreg soos die duiwe.” Jou gedrag, kleredrag en persoonsversorging moet weer eens strook met die standpunt wat jy ingeneem het.

Jy moet egter besef dat selfs die beste voorsorg nie jou veiligheid geheel en al kan waarborg nie (Prediker 9:11). Maar met redelike inspanning kan jy dit heel moontlik vermy om ’n slagoffer van bendegeweld te word.

[Voetnoot]

[Prent op bladsy 19]

Vermy tonele van geweld. Moenie toelaat dat nuuskierigheid jou jou lewe kos nie