Waarom “propaganda”?

In 1622 het pous Gregorius XV ’n gemeente, of ’n komitee, gestig wat uit 13 kardinale, 2 prelate en ’n sekretaris bestaan het om toesig te hou oor sendelinge van die Rooms-Katolieke Kerk. Hy het dit die Congregatio de Propaganda Fide—die Gemeente vir die Propagering van die Geloof—of kortweg Propaganda, genoem. Hierdie woord het mettertyd die betekenis aangeneem van enige poging om idees of opvattings te versprei om proseliete te maak.

“Propaganda” word vandag dikwels met ’n verdraaiing van feite verbind, die oneerlike beïnvloeding van mense se gedagtes, soos byvoorbeeld in oorlogstyd. Maar party gesaghebbendes dink dat selfs die beste reklame redelikerwys as propaganda beskryf kan word, veral as oorreding daarby betrokke is. The World Book Encyclopedia sê: “Opvoedkundiges in demokratiese gemeenskappe leer mense hoe om te dink, maar propagandiste sê vir hulle wat om te dink.”