Daardie onstuimige tienderjare

TIENERS word deur erotiese boodskappe omring. Seks verkoop alles van skoene tot denims. Moderne musiek is vol seksuele suggestie. Op televisie gaan aantreklike volwassenes van die een seksuele verhouding na die ander. Maar is dit reg?

’n Vername Amerikaanse koerant het gesê dat die “groot seksuele inhoud” van TV-programme gedurende primatyd ’n “ontstellende en uiters onverantwoordelike neiging in programme” is. The Journal of the American Medical Association het dit die “uitbuiting van adolessente deur die vermaaklikheids- en reklamemedia” genoem.

Jy moet seker maak dat jou kinders weet dat nie almal so lewe nie. Selfs al het die helfte van Amerika se 17-jarige meisies al seks gehad, soos beweer word, beteken dit steeds die helfte het nie. Soos die voormalige Amerikaanse Minister van Onderwys, William J. Bennett, gesê het: “Nie ‘almal’ doen dit nie, en dalk moet ons daardie jongmense—die helfte van ons sewentienjariges—ook ondersteun en aanmoedig.”

Hy het daarop gewys dat 9 uit 10 meisies jonger as 16, volgens ’n opname wat by die Grady Memorial-hospitaal in Atlanta, Georgia, VSA, gedoen is, “wou leer hoe om ‘nee’ te sê”. Kan jy jou kinders help om oortuig te wees dat, nie net ’n flou en onseker reaksie nie, maar ’n positiewe en ondubbelsinnige nee die enigste regte antwoord op enige onsedelike voorstel is? Kan jy hulle help om te besef dat mense wat saak maak hulle hiervoor sal respekteer? Soos ’n tiener, Emily, vir ’n koerant in Kalifornië, VSA, gesê het: “Die mense wat die meeste gerespekteer word, het nie seks nie.”

Jy moet jou kinders help om te besef dat seks ’n sterk krag is—so sterk dat dit die hele menseras voortgebring het. Maar dit beteken nie dat dit nie beheer kan word nie. Dit beteken eerder dat dit, soos ’n kragtige sportmotor, behoorlik gebruik moet word, volgens die padreëls. As die padreëls op ’n kronkelende bergpad geïgnoreer word, kan dit tot ’n ramp lei. As die godgegewe reëls oor seksuele gedrag geïgnoreer word, sal dit soortgelyke gevolge hê. Hoe kan jy jou kinders, vir wie jy so lief is, help om hierdie feit te besef?

Leer hulle watter waarde kuisheid het

Bespreek die puik Bybelse voorbeeld van die pragtige jong Sulammitiese meisie met jou tiener. Sy kon trots sê: “Ek is ’n muur, en my borste soos torings.” Op sedelike gebied was sy soos ’n onbestygbare muur van ’n vesting met ontoeganklike torings. En in die oë van haar toekomstige man het sy geword soos een “wat vrede vind”. Ja, gemoedsrus wat nie deur die pyn van berou versteur word nie, is ’n ryk voordeel van kuisheid.—Hooglied 8:10.

Maar hoe kan ’n jongmens sedelik so vasstaan soos ’n muur? Voor sulke sake ooit opduik, moet jy seker maak dat jou kind wat grootword, weet hoe belangrik dit is om voorsorgmaatreëls te tref deur omstandighede te vermy wat tot onsedelikheid kan lei—en dikwels wel daartoe lei. Hulle moet byvoorbeeld weet dat, net soos dronkbestuur tot ’n ramp kan lei, jy ’n ramp oor jouself kan bring by ’n tienerpartytjie waar ander sterk drank gebring het en waar daar geen verantwoordelike volwassene teenwoordig is nie.

Help hulle eweneens om in te sien dat hulle die deur vir versoeking oopmaak wanneer hulle alleen in ’n huis (of ’n woonstel) met ’n jong persoon van die ander geslag is. Jongmense moet duidelik besef watter sedelike gevaar dit inhou om enigiemand met wie hulle nie getroud is nie toe te laat om sy of haar hand op hulle geslagsdele, wat die borste insluit, te sit. Verduidelik aan hulle dat verleiding dikwels met die seksueel stimulerende aanraking van sulke liggaamsdele begin.—Vergelyk 1 Korinthiërs 7:1.

Jy moet jou geliefde kinders help om te besef dat ware liefde oneindig meer beteken as seks en dat seks buite die huwelik verkeerd is. Party jongmense het geslagsomgang voordat hulle hulle tot ’n huwelik verbind. Hulle het dalk geslagsomgang met ’n aantal maats sonder om ooit te trou. Dan, namate die jare verbygaan en hulle besef dat hulle werklik ’n huweliksmaat nodig het, vind hulle dat hulle eensaam en alleen is. Dit is waar dat niemand ooit ’n vaste verbintenis van hulle vereis het nie, maar niemand het ooit ’n vaste verbintenis met hulle aangegaan nie.

Jou seuns en dogters moet weet dat hulle maagdelikheid heeltemal te kosbaar is om soos vuil water weggegooi te word. Help jou kind om te verstaan dat seks slegs binne die heilige huweliksreëling ten volle geniet kan word. In pragtige, poëtiese taal sê die Bybel: “Drink water uit jou eie reënbak en strome uit jou eie put. Sal jou fonteine buitentoe oorstroom, waterstrome op die pleine? Mag jou fontein geseënd wees, en verheug jou oor die vrou van jou jeug.”—Spreuke 5:15, 16, 18.

As liefdevolle ouers moet julle ’n spesiale poging aanwend om julle kinders hierdie feite te leer. Dit is vandag ’n spesiale uitdaging, want swangerskappe by ongetroudes word algemeen aanvaar. Lillian, ’n kraamverpleegster, sê dat sy nie meer verbaas is om vrees in ’n 15-jarige ongetroude vader se oë te sien wanneer ’n trotse grootouer die pasgebore seuntjie in sy arms druk, terwyl hy nie voorbereid, gewillig of in staat is om hom te aanvaar nie.

Een televisiekommentator het daarop gewys dat talle “uiters jong, ongetroude vroue met kinders” dikwels nie hul skoolloopbaan kan voltooi, nie kan werk of hulle kinders ’n goeie opvoeding kan gee nie. Hy het gesê dat hierdie tienermoeders “vasgevang is in hulle eie persoonlike tragedies. . . . Armoede is byna onvermydelik en dit word gewoonlik ’n bose kringloop.”

Jou eie voorbeeld

Jou eie gedrag sal ’n groot uitwerking op jou kinders hê. Dit geskied partykeer op baie subtieler maniere as wat jy besef. Wat gebeur wanneer ’n pa dwalende oë het? Of wanneer ’n ma sê: “Wat ’n mooi man!” wanneer ’n aantreklike man verbystap? Moedig sulke ouers hulle tieners aan om kuis te wees? As jy gewoonlik fisiese kenmerke bewonder, moet jy nie verbaas wees as jou kinders vleeslike eienskappe bo sedes, goedhartigheid, ware liefde of die persoon se toewyding aan God stel nie.

Om jou kinders die dinge te leer wat hulle oor seks moet weet, behels dus baie meer as wat jy dalk gedink het. Dit behels jou gesindheid, die atmosfeer wat jy by die huis skep, jou gewilligheid om jou kinders reeds vroeg te leer, asook die voorbeeld wat jy stel. Al hierdie dinge vereis natuurlik tyd en inspanning, maar die beloning is groot!

Sê nou jy het hulle nog nie geleer nie?

Maar sê nou jou kinders is amper al groot, en jy het nog nie hierdie dinge met hulle bespreek nie? Jy kan eenvoudig sê: “Ek het werklik ’n fout gemaak deur so lank te wag om met jou oor hierdie dinge te praat, maar ek wil so graag hê dat jy die beste lewe moontlik geniet dat ek nou net moet probeer.”

Dit is inderdaad beter om hierdie sake met jou kinders te bespreek wanneer hulle ouer is as om dit nooit met hulle te bespreek nie. Om jou kinders sedelik te onderrig, is ’n noodsaaklike verantwoordelikheid en ’n voorreg. Ron Moglia van die New York-universiteit sê: “’n Ouer wat afstand doen van die reg om met sy kind oor seks te praat, verbeur een van die wonderlikste ondervindings wat hy kan hê.”

As jy onlangs God se sedelike vereistes begin waardeer het en jou kinders weet dat jy voorheen nie daarvolgens gelewe het nie, moet jy seker maak dat hulle verstaan waarom jy nou verander het. Jy kan voorstel dat hulle hierdie tydskrif lees en dan reël om die inligting met hulle te bespreek. Moet nooit van stryk gebring word wanneer die kind sê: “O, ek weet dit alles!” nie. Nie mites op die skoolgronde of stories van portuurs of selfs seksuele ondervinding is ’n plaasvervanger vir gesonde sedelike leiding nie. Die waarheid is dat onkunde tot ’n ramp kan lei.

Dit verg dalk groot inspanning om jou kinders te onderrig, maar die beloning kan groot wees! Soos die Bybel eenvoudig en duidelik sê: “Wie in sy regskapenheid wandel as ’n regverdige—gelukkig is sy kinders ná hom.”—Spreuke 20:7.

[Prent op bladsy 9]

Wat leer die televisie ten opsigte van seks?

[Prent op bladsy 10]

As padreëls geïgnoreer word, lei dit dikwels tot ernstige probleme, en dit is ook die geval as die reëls vir godvrugtige gedrag geïgnoreer word