Ouers—Beskerm julle kinders!

IN ’N Nigeriese hoërskool het ’n meisie wat berug was weens geslagsonsedelikheid graag vir ander skoolmeisies raad gegee oor geslagsake. Een van haar voorskrifte vir aborsie was moutbier met ’n groot hoeveelheid van ’n sekere tabakbestanddeel daarin. Haar stories, wat sy uit pornografiese lektuur verkry het, het baie van haar skoolmaats geboei. Party het met geslagsomgang begin eksperimenteer, en een van hulle het swanger geword. Om ’n aborsie teweeg te bring, het sy die moutbier-tabak-brousel gedrink. Binne ’n paar uur het sy bloed begin opbring. ’n Paar dae later is sy in die hospitaal oorlede.

In vandag se wêreld praat baie jongmense al hoe meer oor seks, en dit lei tot die ondergang van goedgelowige luisteraars. Tot wie moet jeugdiges hulle wend om juiste kennis te verkry wat hulle sal beskerm? Hoe goed is dit tog as hulle kan reken op hulle godvrugtige ouers, wat die verantwoordelikheid het om hulle in “die dissipline en verstandsregulering van Jehovah” op te voed (Efesiërs 6:4).

Gesindhede in Afrika ten opsigte van seksonderrig

Dwarsoor die wêreld vind baie ouers dit moeilik om geslagsake met hulle kinders te bespreek. Dit is veral in Afrika die geval. Donald, ’n vader in Sierra Leone, het gesê: “Dit word byna nooit gedoen nie. Dit is nie ’n deel van swart mense se kultuur nie.” ’n Nigeriese vrou met die naam Confident stem hiermee saam: “My ouers beskou seks as iets wat nooit openlik gemeld moet word nie; in ons kultuur is dit taboe.”

In sommige swart kulture word dit as onbetaamlik beskou om seksverwante woorde soos penis, sperma of menstruasie te gebruik. Een Christenmoeder het haar dogter selfs verbied om die woord “seks” te gebruik, hoewel sy gesê het dat die dogter die woord “hoerery” mag gebruik. In teenstelling hiermee praat God se Woord die Bybel openlik van geslagsomgang en die geslagsorgane (Genesis 17:11; 18:11, NW; 30:16, 17; Levitikus 15:2, NW). Die doel hiervan is nie om mense te skok of te prikkel nie, maar om God se volk te beskerm en te onderrig.—2 Timoteus 3:16.

Behalwe dat dit ’n kulturele taboe is, is nog ’n rede waarom sommige ouers hiervan wegskram deur ’n Nigeriese vader gemeld: “As ek seks met my kinders bespreek, kan dit hulle aanspoor om hulle aan geslagsonsedelikheid skuldig te maak.” Maar spoor ernstige, Bybelse raad oor seks kinders aan om halsoorkop te gaan eksperimenteer? Nee, glad nie. Trouens, dit is moontlik eerder ’n geval van hoe minder kennis jongmense het, hoe groter is die kans dat hulle in die moeilikheid sal beland. “Wysheid [wat op juiste kennis gegrond is,] is ’n beskutting”, sê die Bybel.—Prediker 7:12.

In Jesus se illustrasie het ’n verstandige man, wat die moontlikheid van toekomstige storms voorsien het, sy huis op ’n rots gebou terwyl ’n dwase man op sand gebou het, wat rampspoedig geblyk het (Matteus 7:24-27). Net so sal verstandige Christenouers, in die wete dat hulle kinders te staan sal kom voor stormagtige druk om die wêreld se losse seksuele standaarde te volg, hulle kinders met die juiste kennis en insig versterk wat hulle sal help om standvastig te bly.

Nog ’n rede waarom baie ouers nie seks met hulle kinders bespreek nie, is deur ’n swart vrou genoem: “Toe ek ’n jong meisie was, het my Getuie-ouers nie geslagsake met my bespreek nie, en daarom het dit nie by my opgekom om hierdie dinge met my kinders te bespreek nie.” Maar daar word meer druk op vandag se jongmense uitgeoefen as op jongmense 10 of 20 jaar gelede. Dit is nie verbasend nie. God se Woord het voorspel dat daar “in die laaste dae . . . goddelose mense en bedrieërs sal [wees wat] voortgaan van kwaad tot erger, terwyl hulle mislei en mislei word”.—2 Timoteus 3:1, 13.

Die probleem word vererger deur die feit dat baie kinders huiwerig of nie in staat is om hulle ouers in hulle vertroue te neem nie. Wedersydse kommunikasie is dikwels swak selfs wat alledaagse sake betref. ’n Negentienjarige jeugdige het gekla: “Ek bespreek sake nie met my ouers nie. Daar is nie goeie kommunikasie tussen my en my pa nie. Hy luister nie.”

Jongmense is miskien ook bang dat vrae oor geslagsake slegte gevolge sal meebring. ’n Sestienjarige meisie het gesê: “Ek bespreek nie geslagsprobleme met my ouers nie weens hulle reaksie op sulke dinge. ’n Ruk gelede het my ouer suster my ma ’n paar vrae in verband met seks gevra. In plaas daarvan dat my ma haar met haar probleem gehelp het, het sy agterdogtig geword oor haar bedoelinge. My ma roep my dikwels en vra my uit oor my suster, en soms maak sy insinuasies oor haar sedes. Ek wil nie gevaar loop om my ma se liefde vir my te verloor nie, en daarom vertel ek haar nie van my probleme nie.”

Waarom hulle onderrig?

Dit is nie net reg dat ons ons kinders genoegsame onderrig oor geslagsake gee nie, dit is ook die liefdevolle ding om te doen. As ouers nie hulle kinders oor seks onderrig nie, sal ander dit doen—gewoonlik gouer as wat die ouers dit verwag en byna nooit in ooreenstemming met Goddelike beginsels nie. ’n Dertienjarige meisie het hoerery gepleeg omdat ’n skoolmaat vir haar gesê het dat sy verskriklike pyn in die toekoms sou hê as sy ’n maagd bly. “Hulle sal jou maagdevlies met ’n skêr sny”, is sy vertel. Toe die meisie later gevra is waarom sy nie vir haar Christenmoeder vertel het wat sy gehoor het nie, het sy gesê dat sulke sake nooit met volwassenes bespreek word nie.

’n Nigeriese meisie het gesê: “My skoolmaats het my probeer oortuig dat geslagsomgang iets is wat alle normale mense moet hê. Hulle het my vertel dat ek, as ek nie nou reeds geslagsomgang het nie, op die ouderdom van 21 ’n siekte sou kry wat ’n noodlottige uitwerking op my vroulikheid sou hê. Hulle het gesê dat dit dus goed is om voor die huwelik geslagsomgang te hê sodat ’n mens hierdie verskriklike gevaar kan afweer.”

Omdat daar goeie kommunikasie tussen haar en haar ouers was, het sy onmiddellik besef dat dit in stryd is met wat sy tuis geleer het. “Soos gewoonlik het ek huis toe gegaan en my ma vertel wat hulle by die skool vir my gesê het.” Haar ma kon hierdie valse inligting regstel.—Vergelyk Spreuke 14:15.

Wanneer ouers aan hulle kinders die kennis oordra wat hulle nodig het om Goddelike wysheid aan die dag te lê wat geslagsake betref, rus hulle die kinders toe om gevaarlike situasies te onderskei en om te besef wanneer mense hulle wil uitbuit. Dit help om hulle die hartseer te spaar wat met seksueel oordraagbare siektes en ongewenste swangerskap gepaardgaan. Dit dra by tot hulle selfrespek en die respek wat ander vir hulle het. Dit bevry hulle van wanbegrippe en kommer. Dit bevorder ’n gesonde, positiewe gesindheid ten opsigte van gepaste geslagsomgang, wat tot hulle geluk bydra as hulle later trou. Dit kan hulle help om ’n goedgekeurde posisie voor God te behou. En namate kinders die liefdevolle besorgdheid sien wat teenoor hulle betoon word, kan dit hulle beweeg om groter respek en liefde vir hulle ouers te hê.

Goeie kommunikasie

As ouers hulle raad by die behoeftes van hulle kinders wil aanpas, moet daar wedersydse kommunikasie wees. Tensy ouers weet wat in hulle kinders se verstand en hart is, sal selfs wyse raad moontlik nie veel help nie, soos wanneer ’n dokter medisyne probeer voorskryf sonder dat hy weet watter siekte die pasiënt het. Ouers moet weet wat hulle kinders werklik dink en voel as hulle doeltreffende raad wil gee. Hulle moet verstaan voor watter druk en probleme hulle kinders te staan kom en watter vrae hulle kwel. Dit is belangrik om aandagtig na kinders te luister, om “gou [te] wees om te hoor, stadig om te praat”.—Jakobus 1:19; Spreuke 12:18; Prediker 7:8.

Dit verg tyd, geduld en inspanning as ouers ’n hegte verhouding met hulle kinders wil aankweek en behou, ’n verhouding waarin kinders hulle diepste gevoelens met vrymoedigheid kan openbaar. Maar hoe pragtig is dit tog wanneer hulle daarin slaag! ’n Vader in Wes-Afrika wat vyf kinders het, sê: “Ek is ’n vader sowel as ’n vertroueling. Die kinders bespreek alle onderwerpe, ook seks, openhartig met my. Self die meisies neem my in hulle vertroue. Ons ruim tyd in om hulle probleme te bespreek. Hulle vertel my ook van hulle vreugdes.”

Bola, een van sy dogters, sê: “Ek steek niks vir my pa weg nie. My pa is bedagsaam en toon empatie. Hy intimideer of behandel ons nie hardvogtig nie, selfs wanneer ons iets verkeerds gedoen het. Hy word nie woedend nie, maar sal eerder die saak ontleed en ons wys wat ons moet doen of wat ons nie moes gedoen het nie. Hy verwys dikwels na die Jeug-boek en die Gesinsgeluk-boek.”a

Wanneer moontlik sal dit goed wees as ouers met hulle kinders oor seks begin praat wanneer die kinders redelik jonk is. Dit lê die grondslag vir voortgesette besprekings deur die dikwels moeilike tienerjare. Wanneer daar nie vroeg reeds met besprekings begin word nie, is dit soms moeilik om later daarmee te begin, maar dit kan gedoen word. ’n Moeder van vyf het gesê: “Ek het myself gedwing om daaroor te praat totdat ek uiteindelik nie meer ongemaklik gevoel het nie en die kind ook nie.” Met soveel op die spel is sulke pogings beslis die moeite werd.

Beskerm en gelukkig

Kinders waardeer ouers wat hulle liefdevol toerus met die kennis wat hulle sal beskerm. Beskou die opmerkings van sommige swart Getuies van Jehovah:

Mojisola het op 24-jarige ouderdom gesê: “Ek sal my ma ewig dankbaar wees. Sy het my die nodige seksonderrig op die regte tyd gegee. Hoewel ek verleë gevoel het toe sy lank gelede hierdie sake met my bespreek het, besef ek nou hoe my ma se optrede my tot voordeel gestrek het.”

Iniobong het bygevoeg: “Ek is altyd bly wanneer ek terugdink aan wat my ma vir my gedoen het deur my genoegsame seksonderrig te gee. Dit het my werklik gehelp in my ontwikkeling tot volwassenheid. Dit is my vaste voorneme om dieselfde vir my toekomstige kinders te doen.”

Die 19-jarige Kunle het gesê: “My ouers het my gehelp om die druk te weerstaan wat wêreldse vroue op my uitgeoefen het om onsedelik te wees. As dit nie vir hulle opleiding was nie, sou ek in sonde verval het. Ek sal altyd waardeer wat hulle gedoen het.”

Christiana het gesê: “Dit help my baie dat ek met my ma oor seks kan gesels. Ek is beskerm teen dodelike siektes en ongewenste swangerskap, en ek kon ’n goeie voorbeeld vir my jonger broers en susters stel. Ek het ook mense se respek gewen, en my toekomstige man sal my ook respekteer. Nog belangriker, ek het ’n goeie verhouding met Jehovah God omdat ek sy gebod onderhou.”

Bola, wat vroeër genoem is, het gesê: “Ek het ’n klasmaat gehad wat gesê het dat seks geniet moet word sonder enige huweliksverbintenis. Vir haar was dit pret. Maar toe sy swanger word en nie haar skooleindeksamen saam met ons kon skryf nie, het sy uitgevind dat dit glad nie pret is nie. As ek nie ’n goeie vader gehad het om my van leiding te voorsien nie, sou ek miskien soos sy gewees het en deur bittere ervaring moes leer.”

Wat ’n seëning is dit tog wanneer Christenouers hulle kinders help om “wys [te word] tot redding” in hierdie seksmal wêreld! (2 Timoteus 3:15). Hulle Bybelse onderrigting is soos ’n kosbare halssnoer wat kinders in God se oë versier en verfraai (Spreuke 1:8, 9). Kinders voel veilig, en ouers geniet diepe bevrediging. ’n Vader in Afrika wat altyd die kommunikasiekanale tussen hom en sy kinders probeer oophou, het gesê: “Ons het gemoedsrus. Ons is vol vertroue dat ons kinders weet wat Jehovah behaag; hulle kan nie deur buitestanders mislei word nie. Ons glo vas dat hulle nie dinge sal doen wat die gesin hartseer sal besorg nie. Ek dank Jehovah dat hulle ons vertroue waardig was.”

[Voetnoot]

[Prent op bladsy 10]

Jong Christene wat Bybelse inligting van hulle ouers ontvang, kan die verdraaide stories van ander jongmense verwerp